മാടായിപ്പാറയിൽ പ്രതിഷേധം നടത്തിയ 30 ബിജെപി പ്രവർത്തകർക്കെതിരെ കേസ്

കണ്ണൂർ: (KVARTHA) പഴയങ്ങാടിയിലെ മാടായിപ്പാറയെ രാജ്യദ്രോഹ ശക്തികളുടെ താവളമാക്കാൻ ശ്രമിക്കുന്നുവെന്ന് ആരോപിച്ച് പ്രതിഷേധ പ്രകടനം നടത്തിയ ബിജെപി നോർത്ത് ജില്ലാ പ്രസിഡന്റ് കെ.കെ. വിനോദ് കുമാർ ഉൾപ്പെടെ മുപ്പതോളം പേർക്കെതിരെ പഴയങ്ങാടി പോലീസ് കേസെടുത്തു. 

മാടായിപ്പാറ റോഡിലെ പൊതുഗതാഗതം തടസ്സപ്പെടുത്തിയതിനും സമൂഹത്തിൽ ലഹളയുണ്ടാക്കണമെന്ന ഉദ്ദേശ്യത്തോടെ പ്രകോപനപരമായ മുദ്രാവാക്യം വിളിച്ചതിനുമാണ് ഭാരതീയ നീതിന്യായ നിയമസംഹിത പ്രകാരം കേസെടുത്തത്.

ബിജെപി മാടായി മണ്ഡലം കമ്മിറ്റിയുടെ നേതൃത്വത്തിൽ ഞായറാഴ്ച വൈകിട്ടാണ് മാടായിപ്പാറയിൽ പ്രതിഷേധ കൂട്ടായ്മ നടത്തിയത്. തീവ്രവാദ ശക്തികളെ കൂട്ടുപിടിച്ച് കലാപം സൃഷ്ടിക്കാനുള്ള ഗൂഢശ്രമം തിരിച്ചറിയണമെന്ന് പ്രതിഷേധ കൂട്ടായ്മ ഉദ്ഘാടനം ചെയ്തുകൊണ്ട് കെ.കെ. വിനോദ് കുമാർ പറഞ്ഞു.

വിശ്വാസികളുടെ പുണ്യഭൂമിയായ മാടായിപ്പാറ ദേവസ്വം ഭൂമിയിൽ അതിക്രമിച്ചു കയറി ഫലസ്തീൻ അനുകൂല, ഇന്ത്യാ വിരുദ്ധ മുദ്രാവാക്യം വിളിച്ചത് അപലപനീയമാണ്. ഇത്തരം പ്രവർത്തനവുമായി ഇനി ഈ പുണ്യഭൂമിയിൽ കാലുകുത്തിയാൽ ജനം പ്രതിരോധിക്കുമെന്നും അദ്ദേഹം പറഞ്ഞു. 

ജമാഅത്തെ ഇസ്‌ലാമി നടത്തുന്ന സ്കൂൾ ബസ് ഇതിനായി ഉപയോഗിച്ചത് ആർടിഒ പരിശോധിക്കണമെന്നും, പെൺകുട്ടികളെപ്പോലും തീവ്രവാദ പ്രവർത്തനങ്ങൾക്ക് ഉപയോഗിക്കുന്നതിൻ്റെ നേർചിത്രമാണ് മാടായിപ്പാറയിലെ സംഭവമെന്നും അദ്ദേഹം കൂട്ടിച്ചേർത്തു. ഗേൾസ് ഇസ്ലാമിക് ഓർഗനൈസേഷൻ നേതാവ് അർഫ ശിഹാബെന്ന മലപ്പുറത്തുകാരിയെക്കുറിച്ച് പോലീസ് അന്വേഷിക്കണമെന്നും അദ്ദേഹം ആവശ്യപ്പെട്ടു.

പരിപാടിയിൽ പങ്കെടുത്ത മണ്ഡലം പ്രസിഡന്റ് സുജിത്ത് വടക്കൻ, ജില്ലാ വൈസ് പ്രസിഡന്റ് എ.വി. സനൽ, ഗംഗാധരൻ കാളിശ്വരം, മാടായി മണ്ഡലം പ്രഭാരി അരുൺ തോമസ്, സംസ്ഥാന സമിതി അംഗം സി. നാരായണൻ, കോഴിക്കോട് മേഖല സെക്രട്ടറി ബാലകൃഷ്ണൻ പനക്കിൽ, രമേശൻ ചെങ്ങുനി, കെ.ടി. മുരളി തുടങ്ങി മുപ്പതോളം പേർക്കെതിരെയാണ് കേസെടുത്തത്.

മാടായിപ്പാറയിലെ ഈ വിഷയത്തെക്കുറിച്ച് നിങ്ങളുടെ അഭിപ്രായമെന്താണ്? ഈ വാർത്ത സുഹൃത്തുക്കളുമായി പങ്കുവെയ്ക്കൂ.

Article Summary: Police case against 30 BJP activists for Madayipara protest.

#KeralaNews #Madayipara #BJPProtest #KannurPolice #KeralaPolitics #Pazhayangadi