ഇനി വെറും സഹയാത്രികനല്ല; സിപിഎം അംഗത്വം സ്വീകരിച്ചതിനെ കുറിച്ച്  ഡോ കെ ടി ജലീൽ, ഒപ്പം ഭാര്യയും; പാർട്ടി പ്രതിസന്ധിയിലുള്ളപ്പോൾ ഒപ്പം നിൽക്കേണ്ടത് ധർമമെന്ന് പ്രതികരണം

മലപ്പുറം: (KVARTHA) ഇനി വെറും സഹയാത്രികൻ മാത്രമല്ല, കമ്മ്യൂണിസ്റ്റ് പാർട്ടിയുടെ ഔദ്യോഗിക അംഗമായി മാറിയതിനെ കുറിച്ച്  വിശദീകരണവുമായി  മുൻ മന്ത്രിയും എംഎൽഎയുമായ ഡോ. കെ ടി ജലീൽ. താനും തൻ്റെ ഭാര്യയും സിപിഎം അംഗത്വം സ്വീകരിക്കുകയാണെന്ന് അദ്ദേഹം തൻ്റെ ഔദ്യോഗിക ഫേസ്ബുക്ക് കുറിപ്പിലൂടെയാണ് അറിയിച്ചത്. കഴിഞ്ഞ രണ്ട് പതിറ്റാണ്ടായി പാർട്ടിയുമായി തുടരുന്ന ആത്മബന്ധം ചൂണ്ടിക്കാട്ടിയാണ് പ്രതിസന്ധി ഘട്ടത്തിൽ പാർട്ടിയുടെ ഭാഗമാകാനുള്ള തീരുമാനം അദ്ദേഹം പരസ്യമാക്കിയത്.

തൻ്റെ പൊതുജീവിതത്തിൽ വലിയ താങ്ങും തണലും നൽകിയ പാർട്ടിയാണ് സിപിഎം എന്ന് അദ്ദേഹം വ്യക്തമാക്കി. 2006-ൽ തുടങ്ങിയ ആത്മബന്ധം ഒരു ഘട്ടത്തിലും ദുർബലമായിട്ടില്ല. സഹയാത്രികനായിരിക്കെ തന്നെ മുഖ്യമന്ത്രി പിണറായി വിജയൻ നയിച്ച രണ്ട് സംസ്ഥാന ജാഥകളിലും, എം വി ഗോവിന്ദൻ മാസ്റ്റർ നയിച്ച ഒരു ജാഥയിലും തന്നെ അംഗമാക്കിയതിലൂടെ പാർട്ടി വലിയ വിശ്വാസമാണ് അർപ്പിച്ചത്. ആരുടെയും പിന്നാലെ നടക്കാതെയും ശുപാർശയില്ലാതെയും മലപ്പുറം ജില്ലയിൽ നിന്ന് തുടർച്ചയായി നാല് തവണ എംഎൽഎ ആക്കിയതിനും അഞ്ച് വർഷം മന്ത്രിയാക്കിയതിനും പാർട്ടിയോട് എക്കാലവും കടപ്പാടുണ്ടാവുമെന്നും അദ്ദേഹം കുറിച്ചു.

പ്രതിസന്ധി ഘട്ടത്തിൽ പാർട്ടിക്കൊപ്പം

കഴിഞ്ഞ തിരഞ്ഞെടുപ്പിലെ പരാജയത്തെ തുടർന്ന് സിപിഎം വലിയ തോതിൽ വിമർശനങ്ങൾ നേരിടുകയാണെന്ന് ഡോ. കെ ടി ജലീൽ ചൂണ്ടിക്കാട്ടി. വലതുപക്ഷ പിന്തിരിപ്പൻമാരും വർഗീയ ശക്തികളും പാർട്ടിയെ നഖശിഖാന്തം എതിർക്കുകയാണ്. വർഗീയ ഫാസിസ്റ്റുകൾ പിടിമുറുക്കുന്ന വർത്തമാനകാല ഇന്ത്യൻ സാഹചര്യത്തിൽ മുഴുവൻ ജനങ്ങൾക്കും ഒരു പൊതു പ്ലാറ്റ്ഫോം ഒരുക്കി ആശയ രംഗത്തും കർമ മേഖലയിലും പൊരുതിനിൽക്കുന്നത് കമ്മ്യൂണിസ്റ്റ് പാർട്ടികൾ മാത്രമാണെന്ന് അദ്ദേഹം അവകാശപ്പെട്ടു.

ഇടതുപക്ഷ ചേരി ദുർബലമായാൽ അതിൻ്റെ ആത്യന്തികമായ നഷ്ടം സംഭവിക്കുന്നത് ദുർബല ജനവിഭാഗങ്ങൾക്കും മതന്യൂനപക്ഷങ്ങൾക്കുമാണെന്നും അദ്ദേഹം പറഞ്ഞു. പശ്ചിമ ബംഗാളിൽ കമ്മ്യൂണിസ്റ്റ് പാർട്ടി ദുർബലമായപ്പോൾ ഉയർന്നുവന്ന തൃണമൂൽ കോൺഗ്രസിന് 15 വർഷത്തെ ആയുസ്സ് മാത്രമേ ഉണ്ടായുള്ളൂവെന്നും അവിടെ ഇപ്പോൾ ബിജെപിയാണ് ഭരിക്കുന്നതെന്നുമാണ് അദ്ദേഹത്തിൻ്റെ വാദം. സമാനമായ സാഹചര്യം കേരളത്തിൽ ഉണ്ടാകാതിരിക്കാൻ കമ്മ്യൂണിസ്റ്റ് പാർട്ടി ഊർജസ്വലതയോടെ നിലനിൽക്കേണ്ടതുണ്ടെന്നും അദ്ദേഹം ഓർമിപ്പിച്ചു.

വിശ്വാസിക്കും കമ്മ്യൂണിസ്റ്റാകാം

മതാചാരങ്ങൾ പിന്തുടരുന്ന ഒരു വിശ്വാസിക്ക് സിപിഎമ്മിൽ അംഗത്വം എടുക്കാൻ കഴിയില്ലെന്നും അത്തരക്കാർ മതത്തിന് പുറത്താകുമെന്നും വർഗീയ ശക്തികൾ പ്രചരിപ്പിക്കുന്നുണ്ട്. കമ്മ്യൂണിസ്റ്റ് പാർട്ടിയിൽ അംഗത്വമെടുക്കുന്നതിൽ നിന്ന് ഹിന്ദു, മുസ്ലിം, ക്രൈസ്തവ വിശ്വാസികളെ പിന്തിരിപ്പിക്കാനുള്ള ഈ അപകടകരമായ നീക്കം തിരിച്ചറിയണം. എല്ലാ വർഗീയ, ജാതീയ സങ്കുചിത ശക്തികളും ഒന്നിക്കുന്നത് കമ്മ്യൂണിസ്റ്റ് പാർട്ടികളെ ക്ഷയിപ്പിക്കുക എന്ന ലക്ഷ്യത്തോടെയാണ്. ഇതിനെതിരായ ശക്തമായ പ്രതിരോധമാണ് തങ്ങളുടെ പാർട്ടി പ്രവേശനമെന്നും ഡോ. കെ ടി ജലീൽ വ്യക്തമാക്കി.

നല്ലൊരു വിശ്വാസിക്കും നല്ലൊരു കമ്മ്യൂണിസ്റ്റുകാരനാകാൻ കഴിയുമെന്ന് ജീവിതം കൊണ്ട് തെളിയിച്ച നിരവധി പേരുണ്ട്. ലോക മുതലാളിത്തത്തിനെതിരെ ഇറാനും ചൈനയും റഷ്യയും ഉത്തര കൊറിയയും ഒരുമിച്ച് നിൽക്കുന്ന കാഴ്ച ആവേശം നൽകുന്നതാണ്. ലോക ഫാസിസത്തിനെതിരായി കമ്മ്യൂണിസ്റ്റുകാരും വിശ്വാസികളും തീർത്ത ഐക്യനിര മുൻധാരണകളെ തിരുത്തിക്കുറിച്ചു. ഇന്ത്യയിലും സമാനമായ വേദികൾ ഉയർന്നു വരേണ്ടത് അനിവാര്യമാണെന്ന് അദ്ദേഹം നിരീക്ഷിച്ചു.

നേതാക്കളുടെ വ്യക്തിവിശുദ്ധി

സമകാലിക രാഷ്ട്രീയത്തിൽ കാപട്യക്കാരും അഭിനേതാക്കളും നിറഞ്ഞുനിൽക്കുമ്പോൾ, സ്വന്തം ജീവിത സാഹചര്യങ്ങൾ രൂപപ്പെടുത്തിയ ശൈലി പിന്തുടരുന്നത് കൊണ്ടാണ് കമ്മ്യൂണിസ്റ്റ് പാർട്ടി നേതാക്കൾ വിമർശിക്കപ്പെടുന്നതെന്ന് അദ്ദേഹം അഭിപ്രായപ്പെട്ടു. മറ്റ് രാഷ്ട്രീയ നേതാക്കളുമായി താരതമ്യം ചെയ്യുമ്പോൾ നാട്ടുകാരെ പറ്റിക്കാതെയും ധാർമിക ബോധത്തോടെയും പ്രവർത്തിക്കുന്നവരാണ് ബഹുഭൂരിപക്ഷം കമ്മ്യൂണിസ്റ്റ് നേതാക്കളും. അപവാദങ്ങളായിട്ടുള്ള ന്യൂനപക്ഷത്തെ മാറ്റിനിർത്താൻ ഇടതുപക്ഷ കക്ഷികൾ മടി കാണിക്കാറില്ല. മറ്റു പാർട്ടികളെ അപേക്ഷിച്ച് തട്ടിപ്പുകാർ ഏറ്റവും കുറഞ്ഞ പാർട്ടിയാണിതെന്നും നേതാക്കളുടെ വ്യക്തിവിശുദ്ധിയും മതേതര നിലപാടും തനിക്ക് ബോധ്യമുള്ള കാര്യമാണെന്നും അദ്ദേഹം കൂട്ടിച്ചേർത്തു.

മതങ്ങളെയും മതചിഹ്നങ്ങളെയും ചൂഷണോപാധിയാക്കി ജനങ്ങളെ പറ്റിച്ച് പണം സമ്പാദിക്കുകയും അധികാരം കയ്യാളി ആഡംബരത്തിൽ ജീവിക്കുകയും ചെയ്യുന്ന വിദ്വേഷ പ്രചാരകരോടുള്ള വിയോജിപ്പ് കൂടിയാണ് തൻ്റെ പാർട്ടി പ്രവേശനമെന്ന് ഡോ. ജലീൽ വ്യക്തമാക്കി. പ്രസ്ഥാനം സമൃദ്ധിയിലായിരിക്കുമ്പോൾ ആർക്കും പാർട്ടിയിൽ ചേരാം. എന്നാൽ പാർട്ടി പ്രതിസന്ധി നേരിടുമ്പോൾ നിസ്വാർത്ഥരായ ലക്ഷക്കണക്കിന് സഖാക്കൾക്കൊപ്പം നിൽക്കാതിരിക്കുന്നത് സമൂഹത്തോട് ചെയ്യുന്ന അപരാധമാണ്.

കർഷകർ, തൊഴിലാളികൾ, അധസ്ഥിതർ, സ്ത്രീകൾ, പിന്നോക്കക്കാർ, ന്യൂനപക്ഷങ്ങൾ, സാധാരണക്കാർ, സർക്കാർ ജീവനക്കാർ, ചെറുകിട കച്ചവടക്കാർ, വ്യാപാരികൾ, അധ്യാപകർ, വ്യവസായികൾ, പ്രൊഫഷണലുകൾ, വിദ്യാസമ്പന്നർ, ബുദ്ധിജീവികൾ, വിദ്യാർഥികൾ, യുവാക്കൾ, പ്രവാസികൾ, കുട്ടികൾ, മധ്യവയസ്കർ, വയോജനങ്ങൾ എന്നിങ്ങനെ എല്ലാ ജാതിമതസ്ഥരും അടങ്ങുന്ന കൂട്ടായ്മയിൽ അണിചേരുക എന്നതാണ് ഓരോ മനുഷ്യ സ്നേഹിയുടെയും ധർമമെന്നും അദ്ദേഹം വിശദീകരിച്ചു.

കെ ടി  ജലീലിന്റെ  ഫേസ്ബുക്ക്  കുറിപ്പിന്റെ പൂർണ രൂപം

ഇനി സഹയാത്രികനല്ല

പാർട്ടിയുടെ ഭാഗം

എൻ്റെ പൊതുജീവിതത്തിൽ വലിയ താങ്ങും തണലും നൽകിയ പാർട്ടിയാണ് സി.പി.ഐ(എം). 2006-ൽ തുടങ്ങിയ ആത്മബന്ധം രണ്ടു പതിറ്റാണ്ടിനിടയിൽ ഒരു ഘട്ടത്തിലും ദുർബലമായിട്ടില്ല. സഹയാത്രികനായിരിക്കെ പാർട്ടി സെക്രട്ടറിയായ സ: പിണറായി വിജയൻ നയിച്ച 2 സംസ്ഥാന ജാഥയിലും, ഗോവിന്ദൻ മാസ്റ്റർ നയിച്ച ഒരു ജാഥയിലും ഈയുള്ളവനെ അംഗമാക്കിയ സി.പി.ഐ(എം) എന്നിലർപ്പിച്ച വിശ്വാസം വളരെ വലുതാണ്. ഒരാളുടെയും പിന്നാലെ നടക്കാതെയും ഒരാളെക്കൊണ്ടും ശുപാർശ ചെയ്യിക്കാതെയും മലപ്പുറം ജില്ലയിൽ നിന്ന് തുടർച്ചയായി 4 പ്രാവശ്യം എം.എൽ.എയും അഞ്ചുവർഷം മന്ത്രിയുമാക്കിയ പാർട്ടിയോട് എക്കാലവും ഞാൻ കടപ്പെട്ടിരിക്കും.

കഴിഞ്ഞ തെരഞ്ഞെടുപ്പിൽ നേരിട്ട പരാജയത്തെ തുടർന്ന് വിമർശന ശരങ്ങൾ ഒരുപാട് ഏറ്റുവാങ്ങേണ്ടി വന്ന സി.പി.ഐ(എം), വലതുപക്ഷ പിന്തിരിപ്പൻമാരാലും വർഗ്ഗീയ ശക്തികളാലും നഖശിഖാന്തം എതിർക്കപ്പെടുന്ന സാഹചര്യമാണ് നിലവിലുള്ളത്. വർഗ്ഗീയ ഫാഷിസ്റ്റുകൾ ഫണം വിടർത്തി ആടുന്ന വർത്തമാന ഇന്ത്യൻ സാഹചര്യത്തിൽ മുഴുവൻ ജനങ്ങളുടെയും ഒരു പൊതു പ്ലാറ്റ്ഫോമൊരുക്കി ആശയ രംഗത്തും കർമ്മ മേഖലയിലും അക്ഷരാർത്ഥത്തിൽ പൊരുതിനിൽക്കുന്നത് കമ്മ്യൂണിസ്റ്റ് പാർട്ടികളാണ്. ഇടതുപക്ഷ ചേരി ദുർബലമായാൽ ആത്യന്തികമായി നഷ്ടം സംഭവിക്കുക ദുർബല ജനവിഭാഗങ്ങൾക്കും മതന്യൂനപക്ഷങ്ങൾക്കുമാണെന്ന സത്യം പകൽവെളിച്ചം പോലെ വ്യക്തമാണ്. പശ്ചിമബംഗാളിൽ കമ്മ്യൂണിസ്റ്റ് പാർട്ടി ദുർബലമായപ്പോൾ ഉണ്ടായ ടി.എം.സിയുടെ ആയുസ്സ് വെറും 15 വർഷമാണ്. ഇപ്പോൾ അവിടം ഭരിക്കുന്നത് ബി.ജെ.പിയാണ്. സമാന സാഹചര്യം കേരളത്തിൽ ഉണ്ടാകാതിരിക്കാൻ കമ്മ്യൂണിസ്റ്റ് പാർട്ടി ഊർജസ്വലതയോടെ നിലനിൽക്കണം.

കാപട്യക്കാരും അഭിനേതാക്കളും കളം നിറഞ്ഞാടുന്ന സമകാലിക രാഷ്ട്രീയത്തിൽ ജീവിത സാഹചര്യങ്ങൾ രൂപപ്പെടുത്തിയ ശൈലി പിന്തുടരുന്നത് കൊണ്ടു മാത്രം വിമർശിക്കപ്പെടുന്നവരാണ് കമ്മ്യൂണിസ്റ്റ് പാർട്ടി നേതാക്കൾ. ഇതര രാഷ്ട്രീയ പാർട്ടി നേതാക്കളുമായും പ്രവർത്തകരുമായും തുലനം ചെയ്യുമ്പോൾ നാട്ടുകാരെ പറ്റിക്കാതെയും ധാർമ്മിക ബോധം സ്വജീവിതത്തിൽ പ്രയോഗവൽക്കരിച്ചും പൊതുരംഗത്ത് പ്രവർത്തിക്കുന്നവരാണ് മഹാഭൂരിഭാഗം കമ്മ്യൂണിസ്റ്റ് നേതാക്കളും പ്രവർത്തകരും. അപവാദമുണ്ടാകാം. ഞാൻ നിഷേധിക്കുന്നില്ല. അത്തരക്കാർ പക്ഷെ ന്യൂനാൽ ന്യൂനപക്ഷമാണ്. അതു തെളിഞ്ഞാൽ അവരെ മാറ്റി നിർത്താൻ മടി കാണിക്കാത്തവരാണ് ഇടതുപക്ഷ കക്ഷികൾ. മറ്റു രാഷ്ട്രീയ പാർട്ടികളെ അപേക്ഷിച്ച് തരികിടക്കാരും തട്ടിപ്പൻമാരും ഏറ്റവും കുറഞ്ഞ പാർട്ടിയാണ് കമ്മ്യൂണിസ്റ്റു പാർട്ടി എന്നർത്ഥം. വ്യക്തി വിശുദ്ധിയുടെ കാര്യത്തിലും സ്ഥിതി ഭിന്നമല്ല. കറകളഞ്ഞ മതേതരവാദികളുമാണ് അവർ. ഇതെല്ലാം എനിക്കു ബോദ്ധ്യമായ കാര്യങ്ങളാണ്. ആരും പറഞ്ഞു തന്നതല്ല.

മതാചാരങ്ങൾ പിന്തുടരുന്ന ഒരു വിശ്വാസിക്ക് സി.പി.ഐ(എം)മ്മിൽ മെമ്പർഷിപ്പെടുക്കാൻ കഴിയില്ലെന്നും അത്തരക്കാർ മതത്തിൽ നിന്ന് പുറത്താണെന്നുമുള്ള വാദമുയർത്തി കമ്മ്യൂണിസ്റ്റ്‌ പാർട്ടിയിൽ അംഗത്വമെടുക്കുന്നതിൽ നിന്ന് ഹൈന്ദവ-മുസ്ലിം-ക്രൈസ്തവ വിശ്വാസികളെ പിന്തിരിപ്പിക്കാനുള്ള നീക്കങ്ങൾ അതതു വിഭാഗങ്ങളിലെ വർഗ്ഗീയ വിഷം ചീറ്റുന്നവർ നാട്ടിൽ പ്രചരിപ്പിക്കുന്ന അത്യന്തം അപകടകരമായ അവസ്ഥ കാണാതിരുന്നു കൂട. ലോകത്തുള്ള എല്ലാ വർഗ്ഗീയ-ജാതീയ- സങ്കുചിത ശക്തികളും ഒരുമിക്കുന്ന ഏക ബിന്ദു, കമ്മ്യൂണിസ്റ്റ് പാർട്ടികളെ ക്ഷയിപ്പിക്കുക എന്നിടത്താണ്. അതിനെതിരായ ശക്തമായ പ്രതിരോധവും കൂടിയാണ് സി.പി.ഐ(എം)മ്മിൽ അംഗത്വമെടുക്കാനുള്ള ഞങ്ങളുടെ തീരുമാനം.

ഒരാൾക്ക് നല്ല വിശ്വാസിയും നല്ല കമ്മ്യൂണിസ്റ്റുകാരനുമാകാൻ കഴിയുമെന്ന് സ്വജീവിതം കൊണ്ട്  തെളിയിച്ച പലരുമുണ്ട്. ലോക മുതലാളിത്വത്തിനെതിരെ ഇറാനും ചൈനയും റഷ്യയും ഉത്തര കൊറിയയും ഒരുമിച്ചു നിൽക്കുന്ന കാഴ്ച ആരെയാണ് ആവേശം കൊള്ളിക്കാത്തത്? ലോക ഫാസിസത്തിനെതിരായി കമ്മ്യൂണിസ്റ്റുകാരും വിശ്വാസികളും ഒരുമിച്ച് പടുത്തുയർത്തിയിരിക്കുന്ന ഐക്യനിര എല്ലാ "മുൻധാരണ"കളെയും കീഴ്മേൽ മറിച്ചിരിക്കയാണ്. ഇന്ത്യയിലും സമാന വേദികൾ ഉയർന്നു വരേണ്ടത് അനിവാര്യമാണ്. മതങ്ങളുടെയും മതചിഹ്നങ്ങളുടെയും പവിത്രത ജീവിതത്തിൽ പകർത്താതെ അവയെ ചൂഷണോപാധിയാക്കി സാധാരണ ജനങ്ങളെ പറ്റിച്ച് ധനസമ്പാദനം നടത്തുകയും അധികാരം കയ്യാളുകയും ആഢംഭരത്തിൽ ആറാടുകയും ചെയ്യുന്ന  വിദ്വേഷ പ്രചാരകരോടുള്ള വിയോജിപ്പു കൂടിയാണ് എൻ്റെയും സഹധർമ്മിണിയുടെയും പാർട്ടി പ്രവേശം.

പ്രസ്ഥാനത്തിൻ്റെ സമൃദ്ധ കാലത്ത് ഏതു പാർട്ടിയിൽ ചേരാനും ഒരുപാടുപേർ കാണും. എന്നാൽ പാർട്ടി വലിയ പ്രതിസന്ധികളെ അഭിമുഖീകരിക്കുമ്പോൾ പാർട്ടിയുടെ കൂടെ  നിൽക്കുന്ന നിസ്വാർത്ഥരായ ലക്ഷക്കണക്കിന് സഖാക്കൾക്കൊപ്പം അവരിൽ ഒരാളായി നിൽക്കാതെ മാറി നിന്നാൽ സമൂഹത്തോട് ചെയ്യുന്ന കൊടിയ അപരാധമാകും അത്. കർഷകരും തൊഴിലാളികളും അധസ്ഥിതരും സ്ത്രീകളും പിന്നോക്കക്കാരും ന്യൂനപക്ഷങ്ങളും സാധാരണക്കാരും സർക്കാർ ജീവനക്കാരും ചെറുകിട കച്ചവടക്കാരും വ്യാപാരികളും അദ്ധ്യാപകരും വ്യവസായികളും പ്രൊഫഷണലുകളും വിദ്യാസമ്പന്നരും ബുദ്ധിജീവികളും വിദ്യാർത്ഥികളും യുവാക്കളും പ്രവാസികളും കുട്ടികളും മദ്ധ്യവയസ്കരും വയോജനങ്ങളും എല്ലാ ജാതിമതസ്ഥരും അടങ്ങുന്ന കൂട്ടായ്മയിൽ അണിചേരുക എന്നത് ഓരോ മനുഷ്യ സ്നേഹിയുടെയും ജീവിത ധർമ്മമാണെന്നാണ് ഞങ്ങളുടെ ഉറച്ച വിശ്വാസം. ആ മഹത്തായ ദൗത്യമാണ് പാർട്ടി അംഗങ്ങളാകുന്നതിലൂടെ സഫലമാകുന്നത്.

രാഷ്ട്രീയ വാർത്തകളും വിവരങ്ങളും അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായം ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്താനും മറക്കരുത്.

Article Summary: Former Kerala minister and MLA Dr. KT Jaleel announced that he and his wife are officially taking CPI(M) membership, transitioning from his long-time status as a fellow traveler, and emphasized that true believers can be good communists while fighting communal fascism.

#KTJaleel #CPIM #KeralaPolitics #LeftDemocraticFront #KeralaNews #CommunistParty #Kvartha #Anjananews