കൊടിക്ക് മുകളിൽ ആരും പറക്കില്ല: കൊടി സുനിക്കും സംഘത്തിനുമെതിരെ നടപടിയില്ലാതെ പൊലീസ്; പരസ്യ മദ്യപാനത്തിൽ പരാതിയില്ലെന്ന് വാദം

കണ്ണൂർ: (KVARTHA) കൊടി സുനിക്കും സംഘത്തിനുമെതിരെ നടപടിയെടുക്കാൻ മടിച്ച് തലശ്ശേരി ടൗൺ പൊലീസ്. ആർ.എം.പി നേതാവ് ടി.പി. ചന്ദ്രശേഖരൻ വധക്കേസിലെ പ്രതിയായ കൊടി സുനിയും സംഘവും പൊതുസ്ഥലത്ത് മദ്യപിച്ചിട്ടും കേസെടുക്കാതെ ഒഴിഞ്ഞുമാറുകയാണ് പൊലീസ്. 

പൊതുസ്ഥലത്ത് മദ്യപിച്ച സംഭവത്തിൽ ആരും പരാതി നൽകാത്തതുകൊണ്ട് കേസെടുക്കാനാകില്ലെന്നാണ് പൊലീസിന്റെ നിലപാട്. സ്വമേധയാ കേസെടുക്കാൻ തെളിവില്ലെന്നും കഴിച്ചത് മദ്യമാണെന്ന് തെളിയിക്കാനാവില്ലെന്നും പൊലീസ് വാദിക്കുന്നു.

അതേസമയം, കണ്ണൂരിലെത്തിയ ഡി.ജി.പി. ഷെയ്ഖ് ദർബേഷ് സാഹിബ് ജില്ലയിലെ പൊലീസ് ഉദ്യോഗസ്ഥരുമായി യോഗം ചേർന്നു. കൊടി സുനിയുടെ മദ്യപാനം ഉൾപ്പെടെയുള്ള വിഷയങ്ങളിൽ അദ്ദേഹം വിവരങ്ങൾ തേടുകയും കൂടുതൽ ഉദ്യോഗസ്ഥർക്കെതിരെ നടപടിയെടുക്കാൻ നിർദേശിക്കുകയും ചെയ്തു. കൊടി സുനിക്കെതിരെ കേസെടുക്കുമെന്നും അച്ചടക്കലംഘനം നടന്നിട്ടുണ്ടോയെന്ന് വിശദമായി അന്വേഷിക്കുമെന്നും ഡി.ജി.പി മാധ്യമങ്ങളോട് പറഞ്ഞു.

പൊലീസ് കാവലിൽ ടി.പി. വധക്കേസിലെ പ്രതി മദ്യപിച്ചത് സേനയ്ക്ക് വലിയ നാണക്കേടുണ്ടാക്കിയിരുന്നു. സംഭവത്തിൽ പൊലീസ് ഉദ്യോഗസ്ഥർക്കെതിരെ നടപടിയെടുത്തുവെന്ന് സ്പീക്കർ എ.എൻ. ഷംസീറും സി.പി.എം നേതാവ് പി. ജയരാജനും പ്രതികരിച്ചിരുന്നു. 

എന്നാൽ, കേസെടുത്താൽ പ്രതികളുടെ പരോൾ ഉൾപ്പെടെ മുടങ്ങുമെന്നതുകൊണ്ടാണ് കേസെടുക്കാൻ മടിക്കുന്നതെന്ന് എം.എൽ.എ. കെ.കെ. രമ ആരോപിച്ചു.

ജയിലിൽ കഴിയുന്ന പ്രതികൾക്ക് ലഭിക്കുന്ന പരോളിനെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Police reluctant to file case against Kodi Suni for public drinking.

#KodiSuni, #KeralaPolice, #TPChandrasekharan, #Kannur, #Controversy, #PublicDrinking