ബൂത്ത് പിടിത്തം ആൾമാറാട്ടം പിടിവീഴും സുരക്ഷ ഉറപ്പാക്കാൻ സ്ഥിരം ക്രിമിനലുകൾക്ക്‌ ബോണ്ട്

കണ്ണൂർ: (KVARTHA) തദ്ദേശ തിരഞ്ഞെടുപ്പ് സമാധാനപരമായി നടത്തുന്നതിനായി സമാധാനം തകർക്കാൻ സാധ്യതയുള്ള ക്രിമിനലുകൾക്കെതിരെ കർശന നടപടിയെടുക്കാൻ പോലീസ് തീരുമാനിച്ചു. മൂന്ന് ക്രിമിനൽ കേസുകളിൽവരെ പ്രതികളായവരുടെ പട്ടികയാണ് ഇതിനായി തയ്യാറാക്കുന്നത്. ഈ പട്ടികയിലുള്ളവരിൽനിന്ന് പോലീസ് ബോണ്ടുകൾ എഴുതിവാങ്ങും.

തിരഞ്ഞെടുപ്പ് കാലയളവിൽ വീണ്ടും ക്രിമിനൽ കേസുകളിൽ ഉൾപ്പെട്ടാൽ ഭാരതീയ നാഗരിക് സുരക്ഷാസംഹിത (ബിഎൻഎസ്എസ്)-നൂറ്റിയിരുപത്തിയാറ് വകുപ്പ് പ്രകാരം കേസെടുത്ത് മുൻകരുതൽ തടങ്കലിൽ പാർപ്പിക്കാനാണ് നിർദേശം. സമൂഹത്തിൽ സമാധാനഭംഗമുണ്ടാക്കുന്ന ഇത്തരം ആളുകൾക്കെതിരെ പരമാവധി കേസെടുക്കണമെന്നാണ് പോലീസ് ഉദ്യോഗസ്ഥരുടെ ആദ്യ യോഗത്തിൽ ഡിജിപി നിർദേശം നൽകിയത്.

പ്രധാന കേസുകളിൽ ജില്ലാ പോലീസ് മേധാവിമാർ മേൽനോട്ടം വഹിക്കണമെന്നും ഉന്നത പോലീസ് ഉദ്യോഗസ്ഥരുടെ യോഗത്തിൽ നിർദേശം നൽകിയിട്ടുണ്ട്. ഇതിന്റെ ഭാഗമായി, ഗുണ്ടകൾക്കെതിരെ പോലീസ് നടത്തുന്ന 'ഓപ്പറേഷൻ ആഗ്' തിരഞ്ഞെടുപ്പിന് മുന്നോടിയായി ശക്തമാക്കും. 

പല ജില്ലകളിലുമുള്ള ഗുണ്ടാപട്ടികയിലുള്ളവരിൽ ഭൂരിഭാഗത്തിനും കക്ഷിരാഷ്ട്രീയ ബന്ധങ്ങളുണ്ട്. രാഷ്ട്രീയസംഘർഷത്തിലൂടെ വളർന്നുവരികയും പിന്നീട് പാർട്ടിയുടെ പേരിൽ റിയൽ എസ്റ്റേറ്റ്, പണമിടപാട് തർക്കങ്ങളിൽ ഇടപെടുന്നതായും പോലീസ് കണ്ടെത്തിയിട്ടുണ്ട്.

ക്രിമിനൽ കേസുകളിൽ പ്രതിയായവരുടെ വീടുകളിലെത്തി രഹസ്യാന്വേഷണവിഭാഗം വിവരങ്ങൾ ശേഖരിക്കും. ഇവർ നാട്ടിലുണ്ടോ, തിരഞ്ഞെടുപ്പിന്റെ മറവിൽ പ്രദേശത്ത് സംഘർഷമുണ്ടാക്കാൻ സാധ്യതയുണ്ടോ തുടങ്ങിയ കാര്യങ്ങളാണ് അന്വേഷണത്തിൽ പ്രധാനമായും ശ്രദ്ധിക്കുക.

പ്രശ്‌നബാധിത സ്ഥലങ്ങളിലെ ബൂത്തുകളിൽ ക്രമസമാധാനം ഉറപ്പാക്കാൻ പ്രത്യേക നിർദേശവുമുണ്ട്. ഇതിനായി അതത് പോലീസ് സ്റ്റേഷനുകളിലെ ഉദ്യോഗസ്ഥന് അധിക ചുമതലയും നൽകും. രണ്ടായിരത്തിയിരുപതിലെ തദ്ദേശ തിരഞ്ഞെടുപ്പിൽ പോലീസ് സ്വീകരിച്ച നടപടിക്രമങ്ങൾ അതേപടി ഈ തിരഞ്ഞെടുപ്പിലും തുടരാനാണ് തീരുമാനം.

ആൾമാറാട്ടം, ബൂത്ത് പിടിക്കൽ, തട്ടിക്കൊണ്ടുപോകൽ തുടങ്ങിയ പ്രവർത്തനങ്ങളിൽ ഏർപ്പെടാൻ സാധ്യതയുള്ളവരുടെ പട്ടിക വേറെയും തയ്യാറാക്കും. ഇവരെക്കുറിച്ചുള്ള വിവരങ്ങൾ പോലീസ് ഇൻസ്പെക്ടർ റിപ്പോർട്ടായി എക്സിക്യൂട്ടിവ് മജിസ്ട്രേട്ട് കൂടിയായ ആർഡിഒയ്ക്ക് കൈമാറും. ഈ റിപ്പോർട്ട് പ്രകാരം ആ വ്യക്തിയെ ആർഡിഒ വിളിച്ചുവരുത്തും.

രണ്ട് ജാമ്യക്കാരുടെ സാന്നിധ്യത്തിൽ ബോണ്ടിൽ ഒപ്പിടീക്കും. 'തിരഞ്ഞെടുപ്പ് കാലത്ത് ആൾമാറാട്ടം, ബൂത്ത് പിടിക്കൽ, തട്ടിക്കൊണ്ടുപോകൽ തുടങ്ങിയ പ്രവർത്തനങ്ങളിൽ ഏർപ്പെട്ടാൽ ബിഎൻഎസ്എസ്-നൂറ്റിയിരുപത്തിയാറ് വകുപ്പ് പ്രകാരം അറസ്റ്റ്ചെയ്യും', ഉന്നത പോലീസ് ഉദ്യോഗസ്ഥൻ വ്യക്തമാക്കി.

ഈ വാർത്ത ഷെയർ ചെയ്യുക. കമൻ്റ് ചെയ്യുക.

Article Summary: Police to take strict measures, including bonds and preventive detention, against repeat offenders and booth capturing during local body elections.

#KeralaElections #PoliceAction #LocalBodyPolls #ElectionSecurity #OperationAAG #BNSS