അർഹരായ മുഴുവൻ ആളുകളെയും വോട്ടർ പട്ടികയിൽ ഉൾപ്പെടുത്താൻ സർക്കാർ നടപടി; രേഖകൾ നൽകാൻ ഫീസ് ഈടാക്കില്ല

തിരുവനന്തപുരം: (KVARTHA) അർഹരായ മുഴുവൻ ആളുകളെയും വോട്ടേഴ്സ് ലിസ്റ്റിൽ ഉൾപ്പെടുത്തുന്നതിനായി സർക്കാർ അടിയന്തര നടപടികൾ തീരുമാനിച്ചു. മതിയായ രേഖകൾ കൈവശമില്ലാത്തവർക്ക് അവ യുദ്ധകാലാടിസ്ഥാനത്തിൽ ലഭ്യമാക്കുന്നതിന് ആവശ്യമായ നടപടികൾ സ്വീകരിക്കാൻ ജില്ലാ കളക്ടർമാർക്ക് നിർദ്ദേശം നൽകി. ഇത്തരത്തിൽ രേഖകൾ ലഭിക്കുന്നതിന് പൊതുജനങ്ങളിൽ നിന്നും ഒരു ഫീസും ഈടാക്കില്ലെന്ന് സർക്കാർ വ്യക്തമാക്കി. നിലവിൽ ഏതെങ്കിലും ഫീസുകൾ ഉണ്ടെങ്കിൽ അവ ഈ കാലയളവിൽ ഒഴിവാക്കാനും തീരുമാനമായിട്ടുണ്ട്.

വോട്ടർ പട്ടികയിൽ പേര് ഉൾപ്പെടുത്താൻ ജനങ്ങളെ സഹായിക്കുന്നതിനായി പ്രാദേശികാടിസ്ഥാനത്തിൽ സഹായ കേന്ദ്രങ്ങൾ (help desk) സ്ഥാപിക്കാൻ മന്ത്രിസഭാ യോഗം നേരത്തെ തീരുമാനിച്ചിരുന്നു. ഇതിന്റെ തുടർച്ചയായി, പൊതുജനങ്ങൾക്ക് ബുദ്ധിമുട്ടുണ്ടാകാത്ത രീതിയിൽ ഹിയറിംഗ് കേന്ദ്രങ്ങൾ സജ്ജമാക്കാനും അവിടെ അടിസ്ഥാന സൗകര്യങ്ങൾ ഉറപ്പുവരുത്താനും ജില്ലാ കളക്ടർമാരെ ചുമതലപ്പെടുത്തി. ആവശ്യമുള്ള സ്ഥലങ്ങളിൽ ഹിയറിംഗ് ഉദ്യോഗസ്ഥർക്ക് പുറമെ വോളന്റിയർമാരുടെ സേവനവും ലഭ്യമാക്കും. എല്ലാ സഹായ കേന്ദ്രങ്ങളിലും ഓൺലൈനായി ഫോമുകൾ സമർപ്പിക്കാനുള്ള സൗകര്യമുണ്ടാകും. അക്ഷയ സെന്ററുകൾ ഈടാക്കുന്ന ഫീസ് ലഘൂകരിക്കുന്ന കാര്യത്തിൽ ആവശ്യമായ നടപടി സ്വീകരിക്കാൻ ഐടി വകുപ്പിനോട് ആവശ്യപ്പെട്ടു.

ഉദ്യോഗസ്ഥ തലത്തിലുള്ള ക്രമീകരണങ്ങളിലും സർക്കാർ കർശന നിർദ്ദേശങ്ങൾ പുറപ്പെടുവിച്ചിട്ടുണ്ട്. ബിഎൽഒ (Booth Level Officer) തസ്തികകളിൽ ഒഴിവുള്ള പോളിംഗ് സ്റ്റേഷനുകളിൽ രണ്ടു ദിവസത്തിനകം നിയമനം നടത്തണം. ഇആർഒ, എഇആർഒ, അഡീഷണൽ എഇആർഒ തസ്തികകളിൽ വിരമിക്കൽ മൂലം ഉണ്ടാകുന്ന ഒഴിവുകൾ ഉടനടി നികത്തണം. പകരം ആളെ നിയമിക്കുന്ന മുറയ്ക്ക് മാത്രമേ വിരമിക്കുന്നതിന് മുൻപുള്ള അവധി (LPR) അനുവദിക്കാവൂ എന്നും നിർദ്ദേശമുണ്ട്. ഈ കാലയളവിൽ ബന്ധപ്പെട്ട ഉദ്യോഗസ്ഥരെ സ്ഥലം മാറ്റാൻ പാടില്ലെന്നും മുൻകൂർ അനുമതിയില്ലാതെ അവധി അനുവദിക്കരുതെന്നും സർക്കാർ വ്യക്തമാക്കി.

കരട് പട്ടികയിൽ ഉൾപ്പെടാതെ പോയ അർഹരായ എല്ലാവരെയും വോട്ടർ പട്ടികയിൽ ചേർക്കുന്നതിനായി വിപുലമായ ബോധവത്കരണ പരിപാടികൾ സംഘടിപ്പിക്കും. കെ-സ്മാർട്ട് സംവിധാനം വഴി ലഭ്യമാകേണ്ട സർട്ടിഫിക്കറ്റുകൾക്ക് കാലതാമസം നേരിടുകയാണെങ്കിൽ അവ നേരിട്ട് പഞ്ചായത്ത് മുഖേന ലഭ്യമാക്കുന്ന കാര്യം പരിശോധിക്കാൻ തദ്ദേശ സ്വയംഭരണ വകുപ്പിനോട് ആവശ്യപ്പെട്ടിട്ടുണ്ട്. ക്യാമ്പുകളിൽ കെ-സ്മാർട്ട് ഹെൽപ്പ് ഡെസ്കുകൾ സജ്ജമാക്കാനും നിർദ്ദേശമുണ്ട്. ചീഫ് സെക്രട്ടറിയുടെ നേതൃത്വത്തിൽ ചേർന്ന യോഗം ഈ കാര്യങ്ങൾ വിശദമായി വിലയിരുത്തി.

അർഹരായ എല്ലാവർക്കും വോട്ടവകാശം ഉറപ്പാക്കുക എന്നതാണ് സർക്കാരിന്റെ നയമെന്ന് മുഖ്യമന്ത്രിയുടെ ഓഫീസ് അറിയിച്ചു. എസ്ഐആർ (SIR) പ്രക്രിയയിൽ അർഹരായ ഏവരേയും ഉൾപ്പെടുത്തണമെന്ന് സംസ്ഥാന സർക്കാർ നിരന്തരം ആവശ്യപ്പെട്ടിരുന്നുവെങ്കിലും അതിന് അനുകൂലമായ തീരുമാനങ്ങളല്ല ഉണ്ടായത്. ഈ പശ്ചാത്തലത്തിലാണ് വില്ലേജ് തലത്തിൽ ഹെൽപ്പ് ഡെസ്കുകൾ ആരംഭിക്കാൻ സർക്കാർ തീരുമാനിച്ചത്. വോട്ടർ പട്ടികയിൽ നിന്നും വിട്ടുപോയ മുഴുവൻ ആളുകളും ഈ സൗകര്യം പ്രയോജനപ്പെടുത്തണമെന്ന് സർക്കാർ അഭ്യർത്ഥിച്ചു.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യുക.

Article Summary: Kerala government initiates mission mode action to ensure all eligible citizens are included in the voters list with free documents.

#VotersList #KeralaGovernment #ElectionUpdates #HelpDesk #KeralaNews #DemocraticRights