സംസ്ഥാനത്ത് യുഡിഎഫ് തരംഗം; ധർമ്മടത്ത് മുഖ്യമന്ത്രി പിന്നിൽ; 100 സീറ്റുകളിൽ യുഡിഎഫ് മുന്നേറ്റം

കണ്ണൂർ: (KVARTHA) സംസ്ഥാനത്ത് എൽഡിഎഫിന് കനത്ത തിരിച്ചടി നൽകി വ്യക്തമായ യുഡിഎഫ് തരംഗം. തിങ്കളാഴ്ച, 2026 മേയ് നാല്-ന് നിയമസഭാ തിരഞ്ഞെടുപ്പിൻ്റെ വോട്ടെണ്ണൽ പുരോഗമിക്കുമ്പോൾ യുഡിഎഫ് ലീഡ് നില 100 എന്ന മാന്ത്രിക സംഖ്യയിലെത്തി. 

എൽഡിഎഫിന് നിലവിൽ 39 സീറ്റുകളിൽ മാത്രമാണ് മേധാവിത്വമുള്ളത്. നേമത്തെ ഒരു സീറ്റിൽ മാത്രമാണ് ബിജെപിക്ക് ലീഡുള്ളത്. കൊല്ലം, ആലപ്പുഴ, കോഴിക്കോട് ജില്ലകളിലും യുഡിഎഫ് വലിയ മുന്നേറ്റമാണ് നടത്തുന്നത്. സംസ്ഥാനത്ത് ശക്തമായ ഭരണവിരുദ്ധ വികാരം പ്രകടമാകുന്നതിൻ്റെ സൂചനകളാണ് പുറത്തുവരുന്നത്.

ധർമ്മടത്ത് മുഖ്യമന്ത്രി പിന്നിൽ

സിപിഎം പാർട്ടിക്കോട്ടകൾ ഇളകുന്ന കാഴ്ചയാണ് ധർമ്മടത്ത് കാണുന്നത്. കഴിഞ്ഞ തവണ 50,000-ത്തിലേറെ വോട്ടുകൾക്ക് വിജയിച്ച ധർമ്മടത്ത് അഞ്ചാം റൗണ്ട് എണ്ണിക്കഴിയുമ്പോഴും മുഖ്യമന്ത്രി പിണറായി വിജയൻ പിന്നിലാണ്. 

മുഖ്യമന്ത്രി ഉൾപ്പെടെ എൽഡിഎഫ് മന്ത്രിസഭയിലെ 14 മന്ത്രിമാർ നിലവിൽ പിന്നിലാണെന്നാണ് റിപ്പോർട്ടുകൾ. പോസ്റ്റൽ വോട്ടുകൾ എണ്ണിയപ്പോൾ ഒപ്പത്തിനൊപ്പമായിരുന്നെങ്കിലും പിന്നീട് യുഡിഎഫ് കുതിപ്പ് തുടരുകയായിരുന്നു.

മൂന്നാം ഘട്ടത്തിൽ മുഖ്യമന്ത്രി 2077 വോട്ടുകൾക്ക് പിന്നിലായിരുന്നു. അഞ്ചരക്കണ്ടി, ചെമ്പിലോട് പഞ്ചായത്തുകൾ ഉൾപ്പെടുന്ന ആദ്യത്തെ നാല് റൗണ്ട് വോട്ടെണ്ണൽ നടന്നപ്പോൾ യുഡിഎഫ് സ്ഥാനാർത്ഥി വി പി അബ്ദുറഷീദ് 2812 വോട്ടുകൾക്ക് ലീഡ് ചെയ്തു. അഞ്ചാം റൗണ്ടിലും മുഖ്യമന്ത്രി 1090 വോട്ടുകൾക്ക് പിന്നിലാണ്.

 പാർട്ടിക്കോട്ടകളായ ചെമ്പിലോട്, വേങ്ങാട്, അഞ്ചരക്കണ്ടി ഉൾപ്പെടെയുള്ള എട്ട് പഞ്ചായത്തുകളിലെ വോട്ടുകൾ എണ്ണിയപ്പോഴാണ് ചരിത്രത്തിലാദ്യമായി എൽഡിഎഫ് സ്ഥാനാർത്ഥി പിന്നിലായത്. ഇനി സിപിഎം ഭരിക്കുന്ന കടമ്പൂർ, പെരളശ്ശേരി പഞ്ചായത്തുകളിലെ വോട്ടുകളാണ് എണ്ണാൻ ബാക്കിയുള്ളത്.

കണ്ണൂരിലെ മറ്റ് മണ്ഡലങ്ങൾ

കണ്ണൂർ ജില്ലയിലെ മറ്റ് മണ്ഡലങ്ങളിലും എൽഡിഎഫിന് കടുത്ത പോരാട്ടമാണ് നേരിടേണ്ടി വരുന്നത്. തളിപ്പറമ്പിൽ എൽഡിഎഫ് സ്ഥാനാർത്ഥി പി കെ ശ്യാമള പിന്നിലാണ്; ഇവിടെ യുഡിഎഫിനാണ് നേരിയ ലീഡ്. പേരാവൂരിൽ എൽഡിഎഫ് സ്ഥാനാർത്ഥി കെ കെ ശൈലജയ്ക്ക് നേരിയ ഭൂരിപക്ഷം മാത്രമാണുള്ളത്. അതേസമയം പയ്യന്നൂർ, മട്ടന്നൂർ, അഴീക്കോട്, കൂത്തുപറമ്പ്, കല്യാശ്ശേരി എന്നിവിടങ്ങളിൽ എൽഡിഎഫ് സ്ഥാനാർത്ഥികൾ തന്നെയാണ് മുന്നിലുള്ളത്.

തിരഞ്ഞെടുപ്പ് ഫലങ്ങളുടെ വിവരങ്ങൾക്കും വിശേഷങ്ങൾക്കുമായി ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. അഭിപ്രായം ഞങ്ങളുടെ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്താൻ മറക്കരുത്.

Article Summary: The UDF is sweeping the 2026 Kerala Assembly Elections, leading in 100 seats while the LDF is limited to 39. CM Pinarayi Vijayan and 13 other ministers are trailing in their respective constituencies, including Dharmadam.

#KeralaElectionResult2026 #UDFWave #Dharmadam #PinarayiVijayan #KeralaPolitics #BreakingNews #MalayalamNews #KannurNews #LDF #LiveCounting