'ഇതാണ് റിയൽ കേരള സ്റ്റോറി'; മുഖ്യമന്ത്രിയെ കോൺഗ്രസ് നേതൃത്വം തീരുമാനിക്കും; വിജയത്തിന് പിന്നിൽ ഇന്ദിരാ ഗ്യാരണ്ടിയെന്ന് കെ സി വേണുഗോപാൽ

തിരുവനന്തപുരം: (KVARTHA) അഴിമതിയും ധിക്കാരവും സ്വജനപക്ഷപാതവും അക്രമരാഷ്ട്രീയവും കേരളത്തിലെ ജനങ്ങൾ അംഗീകരിക്കില്ലെന്നും, മതത്തിൻ്റെ പേരിൽ ജനങ്ങളെ വിഭജിച്ച് കേരളം കൈയടക്കാൻ ആർക്കും കഴിയില്ലെന്നും തെളിയിക്കുന്ന യഥാർത്ഥ 'കേരള സ്റ്റോറി'യാണ് സംസ്ഥാനത്തെ നിയമസഭാ തിരഞ്ഞെടുപ്പ് ഫലമെന്ന് എഐസിസി ജനറൽ സെക്രട്ടറി കെ സി വേണുഗോപാൽ എംപി അഭിപ്രായപ്പെട്ടു. 

യുഡിഎഫിൻ്റെ കൂട്ടായ പ്രവർത്തനവും, രാഹുൽ ഗാന്ധി അവതരിപ്പിച്ച പ്രകടനപത്രികയിലെ ഇന്ദിരാ ഗ്യാരണ്ടിയും തിരഞ്ഞെടുപ്പ് വിജയത്തിൽ മുഖ്യപങ്കുവഹിച്ചതായും അദ്ദേഹം പറഞ്ഞു. തിങ്കളാഴ്ച, 2026 മേയ് നാല്-ന് കെപിസിസി ആസ്ഥാനത്ത് നടത്തിയ വാർത്താസമ്മേളനത്തിൽ സംസാരിക്കുകയായിരുന്നു അദ്ദേഹം.

ഇന്ദിരാ ഗ്യാരണ്ടിയും യുഡിഎഫ് ഐക്യവും

പത്തു വർഷത്തെ എൽഡിഎഫിൻ്റെ ധിക്കാരം നിറഞ്ഞ ദുർഭരണത്തിനെതിരായ ജനവികാരമാണ് ഈ തിരഞ്ഞെടുപ്പ് ഫലം. യുഡിഎഫ് പ്രവർത്തകർ മാത്രമല്ല, യഥാർത്ഥ കമ്മ്യൂണിസ്റ്റുകാരും ഇത്തവണ യുഡിഎഫിന് വോട്ട് ചെയ്തു. കോൺഗ്രസ് പ്രവർത്തകരും നേതാക്കളും ഈ തിരഞ്ഞെടുപ്പിനു വേണ്ടി രണ്ടു വർഷമായി ഒറ്റക്കെട്ടായി കഠിനാധ്വാനം നടത്തുകയായിരുന്നു. 

രാഹുൽ ഗാന്ധി, പ്രിയങ്ക ഗാന്ധി, മല്ലികാർജുൻ ഖാർഗെ, ദീപ ദാസ് മുൻഷി എന്നിവരടക്കമുള്ള കേന്ദ്ര നേതൃത്വവും കെപിസിസി പ്രസിഡൻ്റ് സണ്ണി ജോസഫ്, പ്രതിപക്ഷ നേതാവ് വി ഡി സതീശൻ, തിരഞ്ഞെടുപ്പ് പ്രചാരണ കമ്മിറ്റി ചെയർമാൻ രമേശ് ചെന്നിത്തല എന്നിവരുൾപ്പെടെയുള്ള നേതാക്കളും യുഡിഎഫിലെ മുഴുവൻ ഘടകകക്ഷി നേതാക്കളും ഈ വിജയത്തിനു വേണ്ടി ഒരേ മനസ്സോടെ ഒറ്റക്കെട്ടായി പ്രവർത്തിച്ചു. ഇന്ദിരാ ഗ്യാരണ്ടിയിലെ വാഗ്ദാനങ്ങൾ താഴേത്തട്ടിലെ ജനങ്ങളിലെത്തിക്കാൻ പ്രവർത്തകർക്ക് കഴിഞ്ഞുവെന്നും അദ്ദേഹം വ്യക്തമാക്കി.

സിപിഎം കോട്ടകളിൽ വിള്ളൽ

മികച്ച തിരഞ്ഞെടുപ്പ് തന്ത്രങ്ങൾ ആവിഷ്കരിക്കുന്നതിലും സ്ഥാനാർത്ഥികളെ നിർണ്ണയിക്കുന്നതിലും കോൺഗ്രസ് പുലർത്തിയ മികവ് വിജയത്തെ സഹായിച്ചു. സിപിഎമ്മിലെ അഴിമതിയിലും സ്വജനപക്ഷപാതത്തിലും പ്രതിഷേധിച്ച് പാർട്ടി വിട്ട നേതാക്കളെ യുഡിഎഫിൻ്റെ സ്ഥാനാർത്ഥികളാക്കാനുള്ള തീരുമാനം വൻ വിജയത്തിന് കാരണമായി. 

കണ്ണൂരിലെ സിപിഎം കോട്ടകളിൽ പോലും യുഡിഎഫിനെ വിജയിപ്പിക്കാൻ ആ തീരുമാനത്തിന് സാധിച്ചു. തൻ്റെ നാടായ പയ്യന്നൂരിൽ സിപിഎം സ്ഥാനാർത്ഥി തോൽക്കുമെന്ന് താൻ പോലും ഒരിക്കലും കരുതിയതല്ലെന്നും തളിപ്പറമ്പിലെ വിജയവും വലിയ നേട്ടമാണെന്നും അദ്ദേഹം പറഞ്ഞു. മുഖ്യമന്ത്രി പിണറായി വിജയൻ സ്വന്തം തട്ടകത്തിൽ പോലും കഷ്ടിച്ച് കടന്നുകൂടുകയായിരുന്നുവെന്നും അദ്ദേഹം പരിഹസിച്ചു.

അക്രമ രാഷ്ട്രീയത്തിന് മധുരപ്രതികാരം

ടി പി ചന്ദ്രശേഖരൻ്റെ കൊലപാതകം ഉൾപ്പെടെയുള്ള സിപിഎമ്മിൻ്റെ അക്രമരാഷ്ട്രീയത്തിൽ വിറങ്ങലിച്ചു പോയ കേരള മനസ്സാക്ഷി, ടി പിയുടെ രക്തസാക്ഷി ദിനത്തിൽ ഉയിർത്തെണീറ്റ് നടത്തിയ മധുരപ്രതികാരം കൂടിയാണ് ഈ ജനവിധി. വർഗ്ഗീയത പ്രചരിപ്പിച്ച് മതത്തിൻ്റെ പേരിൽ ജനങ്ങളെ വിഭജിക്കാനുള്ള ബിജെപിയുടെയും സിപിഎമ്മിൻ്റെയും അജണ്ട കേരളത്തിൽ ചെലവാകില്ലെന്ന് ഫലം തെളിയിച്ചു. മലപ്പുറം തവനൂരിലെ സ്ഥാനാർത്ഥി വി എസ് ജോയ് ഉൾപ്പെടെയുള്ളവർക്കെതിരെ മതത്തിൻ്റെ പേരിൽ സിപിഎം നടത്തിയ പ്രചാരണം ജനം തള്ളിക്കളഞ്ഞു. ഒന്നോ രണ്ടോ സീറ്റുകളിൽ ബിജെപി ജയിച്ചിട്ടുണ്ടെങ്കിൽ അത് സിപിഎമ്മിൻ്റെ ചിലവിലാണെന്നും അദ്ദേഹം കുറ്റപ്പെടുത്തി.

ആലപ്പുഴയിലെ വിജയം ജനരോഷം

മുഖ്യമന്ത്രിക്കെതിരെ കരിങ്കൊടി പ്രതിഷേധം നടത്തിയതിന് പിണറായി വിജയൻ്റെ ഗൺമാൻ്റെ മർദ്ദനത്തിനിരയായ യൂത്ത് കോൺഗ്രസ് നേതാവ് എ ഡി തോമസ് ആലപ്പുഴയിൽ നേടിയ വൻ വിജയം സിപിഎമ്മിൻ്റെ ധാർഷ്ട്യത്തിനുള്ള ജനങ്ങളുടെ പ്രതികാരമാണ്. 

കഴിഞ്ഞ 10 വർഷത്തെ ഇടത് ഭരണത്തിൽ ഒട്ടേറെ യുവജന പ്രവർത്തകർ പോലീസിൻ്റെ മർദ്ദനത്തിനിരയായിട്ടുണ്ട്. ഭരണമേറ്റെടുക്കുമ്പോൾ ആരോടും പ്രതികാരം ചെയ്യാൻ യുഡിഎഫ് ഉദ്ദേശിക്കുന്നില്ലെങ്കിലും, കുറ്റം ചെയ്തവർ രക്ഷപ്പെടാൻ അനുവദിക്കില്ലെന്ന് അദ്ദേഹം വ്യക്തമാക്കി.

മുഖ്യമന്ത്രിയെ പാർട്ടി തീരുമാനിക്കും

മുഖ്യമന്ത്രിയെ നിശ്ചയിക്കാൻ കോൺഗ്രസിന് ഒട്ടും ബുദ്ധിമുട്ടുണ്ടാകില്ല. അതിന് പാർട്ടിക്ക് വ്യവസ്ഥാപിതമായ പരമ്പരാഗത മാർഗ്ഗങ്ങളുണ്ട്. ബന്ധപ്പെട്ടവരുമായി കൂടിയാലോചിച്ച് കോൺഗ്രസ് നേതൃത്വം ഒട്ടും വൈകാതെ മുഖ്യമന്ത്രിയെ തീരുമാനിക്കും. പാർട്ടി നേതൃത്വത്തിൻ്റെ ഏതു തീരുമാനവും അംഗീകരിക്കുന്ന പ്രവർത്തകനാണ് താൻ. 

പതിമൂന്നാം വയസ്സിൽ കോൺഗ്രസിനു വേണ്ടി പൊതുപ്രവർത്തനം തുടങ്ങിയ ആളാണ് താൻ. ജീവൻ പോയാലും പാർട്ടിയുടെ തീരുമാനത്തിനൊപ്പം നിൽക്കുമെന്നും അദ്ദേഹം കൂട്ടിച്ചേർത്തു. തമിഴ്നാട്ടിൽ ഡിഎംകെ - കോൺഗ്രസ് സഖ്യത്തിനുണ്ടായ തിരിച്ചടി അമ്പരപ്പിക്കുന്നതാണെന്നും ബംഗാളിലെയും തമിഴ്നാട്ടിലെയും ഫലങ്ങൾ പാർട്ടി വിലയിരുത്തുമെന്നും അദ്ദേഹം പറഞ്ഞു. തമിഴ്നാട് നിയമസഭാ തിരഞ്ഞെടുപ്പിൽ വിജയ് നേടിയ വിജയത്തിൽ അദ്ദേഹത്തെ അഭിനന്ദിക്കുന്നതായും കെ സി വേണുഗോപാൽ അറിയിച്ചു.

പുതിയ വാർത്തകൾക്കും വിശേഷങ്ങൾക്കുമായി ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. അഭിപ്രായം ഞങ്ങളുടെ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്താൻ മറക്കരുത്.

Article Summary: AICC General Secretary KC Venugopal stated that the UDF's historic win in the 2026 Kerala Assembly Election is a mandate against corruption and arrogance, crediting the success to unity and the 'Indira Guarantee'.

#KeralaElectionResult2026 #KCVenugopal #UDFVictory #CongressKerala #IndiraGuarantee #PinarayiVijayan #BreakingNews #MalayalamNews #KeralaPolitics #LDFDefeat