കുടുംബത്തിനും കുട്ടികൾക്കുമൊപ്പം കൂടുതൽ സമയം ചിലവഴിക്കാൻ തീരുമാനം; വൈറ്റ് ഹൗസ് പ്രസ് സെക്രട്ടറി കാരലൈൻ ലെവിറ്റ് സ്ഥാനമൊഴിയുന്നു; ഉപദേശകയായി തുടരും
ADVERTISEMENT
● യുഎസ് പ്രസിഡൻ്റ് ഡൊണാൾഡ് ട്രംപ് ആണ് ഇക്കാര്യം സാമൂഹിക മാധ്യമത്തിലൂടെ അറിയിച്ചത്
● വൈറ്റ് ഹൗസ് വക്താവാകുന്ന ഏറ്റവും പ്രായംകുറഞ്ഞയാളെന്ന നേട്ടത്തിന് ഉടമയാണ് ലെവിറ്റ്
● മേയിൽ തനിക്ക് രണ്ടാമത്തെ കുഞ്ഞ് പിറന്നതായി ലെവിറ്റ് അറിയിച്ചിരുന്നു
● അവസരം നൽകിയതിന് ട്രംപിനോട് നന്ദി അറിയിച്ച് കാരലൈൻ ലെവിറ്റ് രംഗത്തെത്തി
വാഷിങ്ടൺ: (KVARTHA) വൈറ്റ് ഹൗസ് പ്രസ് സെക്രട്ടറി കാരലൈൻ ലെവിറ്റ് സ്ഥാനമൊഴിയുന്നു. യുഎസ് പ്രസിഡൻ്റ് ഡൊണാൾഡ് ട്രംപ് ആണ് ഇക്കാര്യം അറിയിച്ചത്. 2026 ഓഗസ്റ്റ് അവസാനത്തോടെ കാരലൈൻ ലെവിറ്റ് പദവിയൊഴിയുമെന്നാണ് വിവരം. കുട്ടികൾക്കും കുടുംബത്തിനും ഒപ്പം കൂടുതൽ സമയം ചെലവഴിക്കാനാണ് അവർ സ്ഥാനമൊഴിയുന്നതെന്ന് ട്രംപ് സാമൂഹിക മാധ്യമത്തിൽ കുറിച്ചു. അമേരിക്കൻ ഭരണകൂടത്തിലെ സമ്മർദം നിറഞ്ഞ പദവികളിൽ ഒന്നാണ് വൈറ്റ് ഹൗസ് പ്രസ് സെക്രട്ടറിയുടേത്. അതേസമയം, വൈറ്റ് ഹൗസ് പ്രസ് സെക്രട്ടറി പദവി ഒഴിയുമെങ്കിലും ലെവിറ്റ് തൻ്റെ ഉപദേശകയായി തുടരുമെന്നും ട്രംപ് അറിയിച്ചു.
നന്ദി പറഞ്ഞ് ലെവിറ്റ്
സ്ഥാനമൊഴിയുമെന്ന് ട്രംപ് അറിയിച്ചതിന് പിന്നാലെ സ്ഥിരീകരണവുമായി കാരലൈൻ ലെവിറ്റും സാമൂഹിക മാധ്യമത്തിൽ കുറിപ്പ് പോസ്റ്റ് ചെയ്തു. വൈറ്റ് ഹൗസ് പോഡിയത്തിൽ പ്രസിഡൻ്റിന് വേണ്ടി സംസാരിക്കാനുള്ള അവസരം നൽകിയതിന് പ്രസിഡൻ്റ് ട്രംപിനോട് നന്ദിയുണ്ടെന്ന് അവർ വ്യക്തമാക്കി. ലിബറൽ മാധ്യമങ്ങളെ ഉത്തരവാദിത്ത ബോധമുള്ളവരാക്കാനും പ്രസിഡൻ്റ് ട്രംപിനെക്കുറിച്ചുള്ള സത്യങ്ങൾ ജനങ്ങൾ അറിയുന്നുവെന്ന് ഉറപ്പാക്കാനും ഇക്കാലയളവിൽ കഴിഞ്ഞുവെന്നും അവർ പറഞ്ഞു. മാധ്യമങ്ങളുടെ നിരന്തരമുള്ള ചോദ്യങ്ങളെയും വിമർശനങ്ങളെയും സമചിത്തതയോടെയാണ് ലെവിറ്റ് നേരിട്ടിരുന്നതെന്നാണ് പൊതുവെയുള്ള വിലയിരുത്തൽ.
ഏറ്റവും പ്രായംകുറഞ്ഞ വക്താവ്
യുഎസ് പ്രസിഡൻ്റ് ഡൊണാൾഡ് ട്രംപിൻ്റെ വിശ്വസ്തരിൽ ഒരാളാണ് 28 കാരിയായ കാരലൈൻ ലെവിറ്റ്. യുഎസ് പ്രസിഡൻ്റിൻ്റെ മുഖ്യവക്താവാകുന്ന ഏറ്റവും പ്രായംകുറഞ്ഞയാളെന്ന നേട്ടവും ലെവിറ്റിനായിരുന്നു. പത്രസമ്മേളനങ്ങൾ അനായാസം കൈകാര്യംചെയ്ത് ചുരുങ്ങിയ നാളുകൾക്കുള്ളിൽത്തന്നെ ലെവിറ്റ് ശ്രദ്ധേയയായി. കഴിഞ്ഞ മേയിൽ തനിക്ക് രണ്ടാമത്തെ കുഞ്ഞ് പിറന്നതായി കാരലൈൻ ലെവിറ്റ് അറിയിച്ചിരുന്നു. വിവിയാന എന്നാണ് കുഞ്ഞിന് പേരിട്ടതെന്നും അവർ അന്ന് വ്യക്തമാക്കിയിരുന്നു. കുടുംബ കാര്യങ്ങൾക്ക് മുൻഗണന നൽകുന്നതിൻ്റെ ഭാഗമായാണ് ഔദ്യോഗിക പദവികളിൽ നിന്നുള്ള ഈ താൽക്കാലിക പിന്മാറ്റമെന്നാണ് രാഷ്ട്രീയ നിരീക്ഷകർ കരുതുന്നത്.
അമേരിക്കൻ രാഷ്ട്രീയത്തിലെ ഈ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതല് അന്താരാഷ്ട്ര വാർത്തകള് അറിയാന് ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.
Article Summary: Karoline Leavitt to step down as White House Press Secretary.
#KarolineLeavitt #WhiteHouse #DonaldTrump #USPresident #InternationalNewsMalayalam #USPolitics #SobhaNews
