കണ്ണൂർ റെയിൽവേ ഭൂമി വിറ്റഴിച്ചു? കെ സുധാകരന്റെ ഞെട്ടിക്കുന്ന ആരോപണം

കണ്ണൂർ: (KVARTHA) നൂറ്റിയിരുപത്തിയാറ് കോടി രൂപ മതിപ്പുവിലയുള്ള ഏഴ് ഏക്കറോളം വരുന്ന കണ്ണൂർ റെയിൽവേ ഭൂമി, കേന്ദ്ര ആഭ്യന്തര മന്ത്രിയുടെ മകന്റെ അനുയായിക്ക് വെറും 24.63 കോടി രൂപയ്ക്ക് 45 വർഷത്തേക്ക് പാട്ടത്തിന് നൽകിയത് വൻ അഴിമതിയാണെന്ന് കോൺഗ്രസ് പ്രവർത്തകസമിതി അംഗം കെ. സുധാകരൻ എം.പി. ആരോപിച്ചു. കണ്ണൂർ ബ്ലോക്ക് കോൺഗ്രസ് കമ്മിറ്റി റെയിൽവേ സ്റ്റേഷൻ പരിസരത്ത് സംഘടിപ്പിച്ച പ്രതിഷേധ സംഗമം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

നിരവധി തവണ കേന്ദ്ര റെയിൽവേ മന്ത്രിയെ കണ്ട ശേഷമാണ് കണ്ണൂർ റെയിൽവേ സ്റ്റേഷനെ അമൃത് ഭാരത് പദ്ധതിയിൽ ഉൾപ്പെടുത്തി 32 കോടി രൂപ അനുവദിച്ചത്. എന്നാൽ, മറ്റ് സ്റ്റേഷനുകളിൽ നിർമ്മാണ പ്രവൃത്തികൾ പൂർത്തിയാകുമ്പോൾ കണ്ണൂരിൽ പണി മന്ദഗതിയിലാണെന്നും അദ്ദേഹം ചൂണ്ടിക്കാട്ടി. 

ഇതിനെല്ലാം പുറമെയാണ് കണ്ണൂർ റെയിൽവേ സ്റ്റേഷൻ പരിസരത്തെ തന്ത്രപ്രധാനമായ ഭൂമി സ്വകാര്യ കമ്പനിക്ക് പാട്ടത്തിന് നൽകിയിരിക്കുന്നത്. വർഷം 122 കോടി രൂപ വരുമാനമുള്ളതും 72 ലക്ഷത്തിലധികം യാത്രക്കാർ വന്നുപോകുന്നതുമായ കണ്ണൂർ റെയിൽവേ സ്റ്റേഷന് വികസനം അനിവാര്യമാണ്. അപ്പോഴാണ് 'ടെക്സ്റ്റ് വർക്ക് ഇന്റർനാഷണൽ' എന്ന സ്വകാര്യ കമ്പനിക്ക് ഈ ഭൂമി പാട്ടത്തിന് നൽകിയിരിക്കുന്നത്. 

റെയിൽവേ സ്റ്റേഷൻ സംരക്ഷിക്കേണ്ട റെയിൽവേ മന്ത്രാലയം തന്നെ പാലക്കാട് ഡിവിഷനിലെ ചില ഉന്നത ഉദ്യോഗസ്ഥരുടെ സഹായത്തോടെ ഈ കൊടിയ അഴിമതിക്ക് കൂട്ടുനിൽക്കുകയാണെന്നും സുധാകരൻ ആരോപിച്ചു. 122 കോടി രൂപയുടെ ഭൂമി വെറും 24.63 കോടി രൂപയ്ക്ക് പാട്ടത്തിന് നൽകാൻ കൂട്ടുനിന്ന പാലക്കാട് ഡിവിഷനിലെ ഉദ്യോഗസ്ഥർ തന്നെയാണ് വരുമാന നഷ്ടം പറഞ്ഞ് ചിറക്കൽ റെയിൽവേ സ്റ്റേഷൻ അടച്ചുപൂട്ടാൻ ഉത്തരവിട്ടതെന്നും അദ്ദേഹം ഓർമ്മിപ്പിച്ചു. 

‘പാലക്കാട് ഡിവിഷനിലെ ചില തലയ്ക്കു വെളിവില്ലാത്ത ഉദ്യോഗസ്ഥർ കാട്ടിക്കൂട്ടുന്ന കോപ്രായങ്ങൾ അടിയന്തരമായി നിർത്തണം. ഇന്ത്യൻ റെയിൽവേയുടെ മുഖമുദ്ര വരുമാനം ഉണ്ടാക്കുക മാത്രമല്ല, അതിനുപുറമെ സേവനവും കൂടിയുണ്ടെന്ന പൊതുതത്വം ഇവർ മനസ്സിലാക്കണം,’ സുധാകരൻ എം.പി. കൂട്ടിച്ചേർത്തു.

റെയിൽവേ മന്ത്രാലയം കണ്ണൂർ റെയിൽവേ സ്റ്റേഷനോട് കാണിക്കുന്ന അവഗണനയ്ക്കും, സാധാരണക്കാർ ഉപയോഗിച്ചിരുന്ന റെയിൽവേ ഓവർ ബ്രിഡ്ജ് നടപ്പാത പൊളിച്ചിട്ട് മാസങ്ങളായിട്ടും പരിഹാരം കാണാത്തതിനും എതിരെയായിരുന്നു പ്രതിഷേധ സംഗമം.

കണ്ണൂർ റെയിൽവേ ഭൂമി പാട്ടത്തിന് നൽകിയതിനെക്കുറിച്ചുള്ള കെ. സുധാകരന്റെ ആരോപണത്തെക്കുറിച്ച് നിങ്ങളുടെ അഭിപ്രായം പങ്കുവെക്കുക.

Article Summary: K. Sudhakaran alleges massive corruption in Kannur railway land lease deal.

#Kannur #Railway #Corruption #KSudhakaran #LandScam #KeralaPolitics