ഗോവിന്ദച്ചാമി രക്ഷപ്പെട്ടത് എങ്ങനെ? ചിത്രങ്ങളും വാദങ്ങളും

(KVARTHA) കൊടുംകുറ്റവാളി ഗോവിന്ദച്ചാമിയുടെ കണ്ണൂർ സെൻട്രൽ ജയിലിൽ നിന്നുള്ള ജയിൽചാട്ടം ഇപ്പോഴും ദുരൂഹതകൾ നിറഞ്ഞതാണ്. ജയിൽ അധികൃതരുടെ ഒത്താശയോടെയാണ് ഗോവിന്ദച്ചാമി രക്ഷപ്പെട്ടതെന്ന ആരോപണവുമായി പി വി അൻവർ രംഗത്തെത്തിയതിന് പിന്നാലെ, ഗോവിന്ദച്ചാമി കിടന്ന സെല്ലിന്റെ ചിത്രം പുറത്തുവിട്ടു. ഈ ചിത്രം കണ്ണൂർ ജയിലിൽ അധികൃതർക്ക് വലിയ വീഴ്ച സംഭവിച്ചുവെന്നതിന്റെ വ്യക്തമായ തെളിവാണ്.

സെല്ലിന്റെ താഴ്ഭാഗത്തെ കമ്പികളാണ് ഗോവിന്ദച്ചാമി രക്ഷപ്പെടാനായി മുറിച്ചുമാറ്റിയത്. അഴികൾ മുറിച്ചുമാറ്റിയത് ആരുടെയും ശ്രദ്ധയിൽപ്പെടാതിരിക്കാൻ, ഈ ഭാഗത്ത് നൂലുകൾ കെട്ടി മറച്ചതായും പുറത്തുവന്ന ചിത്രത്തിൽ വ്യക്തമാണ്. ഓരോ ദിവസവും ഉപ്പ് ശേഖരിച്ച് സെല്ലിലെ കമ്പികൾ ദ്രവിപ്പിച്ചെന്നും അരം ഉപയോഗിച്ച് ദിവസങ്ങളെടുത്താണ് കമ്പികൾ മുറിച്ചതെന്നും ഗോവിന്ദച്ചാമി നേരത്തെ മൊഴി നൽകിയിരുന്നു. 

ഇത് ശരിവയ്ക്കുന്നതാണ് ഞായറാഴ്ച പുറത്തുവന്ന ചിത്രം. സെല്ലിൽനിന്ന് കമ്പി മുറിക്കുമ്പോൾ ആരെങ്കിലും ശ്രദ്ധിക്കുമെന്ന് കരുതി, മൂടിപ്പുതച്ച് കിടന്നുകൊണ്ടാണ് ഗോവിന്ദച്ചാമി ഇത് ചെയ്തതെന്നും അതിനാലാണ് താഴ്ഭാഗത്തെ കമ്പി മുറിച്ചുമാറ്റാൻ കാരണമെന്നും മൊഴിയിൽ പറയുന്നു. ഏകദേശം അഞ്ചിടങ്ങളിലാണ് കമ്പി മുറിച്ചതെന്നും ചിത്രത്തിൽ കാണാം.

ജയിൽ ജീവനക്കാർ മുഴുവൻ സമയവും ഫോണിലാണെന്നും ആരും ശ്രദ്ധിക്കാറില്ലെന്നും ഗോവിന്ദച്ചാമി മൊഴി നൽകിയിരുന്നു. ദിവസങ്ങളെടുത്താണ് ഇത്രയേറെ ഭാഗം മുറിച്ചുമാറ്റിയിട്ടും ജയിൽ ജീവനക്കാർ ആരും കണ്ടില്ലെന്നത് ഏറെ അത്ഭുതപ്പെടുത്തുന്ന കാര്യമാണ്. 

ജയിലിൽ തടവുകാർ ഏറ്റുമുട്ടിയാൽ പോലും കേസെടുക്കില്ലെന്ന് ഒരു വിഭാഗം ജയിൽ ജീവനക്കാർ ആക്ഷേപം ഉന്നയിക്കുന്നുണ്ട്. കണ്ണൂർ ജയിലിൽ രാത്രികാല പരിശോധന ശക്തമല്ലെന്നും മൂന്നുമാസം കൂടുമ്പോൾ തടവുകാരെ സെൽ മാറ്റണമെന്ന നിർദേശം കണ്ണൂരിൽ പാലിക്കപ്പെടുന്നില്ലെന്നും വിവരങ്ങളുണ്ട്.

അതേസമയം, ജയിൽചാട്ടം ഉദ്യോഗസ്ഥരുടെ ഒത്താശയോടെയാണെന്ന് സമർത്ഥിക്കാൻ പി വി അൻവർ എംഎൽഎ മഞ്ചേരിയിലെ സ്വന്തം സ്ഥലത്ത് വെച്ച് ജയിൽചാട്ടത്തിന്റെ ഡെമോ നടത്തി. മുഖ്യമന്ത്രി പിണറായി വിജയന് വേണ്ടി ജയിൽ വകുപ്പ് തന്നെ ഗോവിന്ദച്ചാമിയെ പുറത്തേക്ക് വിട്ടതാണെന്ന് അൻവർ ആരോപിച്ചു. 

വണ്ണമുള്ള ജയിലിന്റെ ഇരുമ്പ് കമ്പി ഉപ്പ് തേച്ച് തുരുമ്പാക്കി ഹാക്ക്സോ ബ്ലേഡ് ഉപയോഗിച്ച് മുറിച്ചു എന്നാണ് ഗോവിന്ദച്ചാമിയുടെ മൊഴിയായി പോലീസ് പറയുന്നത്. എന്നാൽ, ഹാക്ക്സോ ബ്ലേഡ് ഉപയോഗിച്ച് കമ്പി മുറിച്ച്, വളച്ച് പുറത്തുകടക്കാൻ കഴിയില്ലെന്ന് അൻവർ വാദിച്ചു. കമ്പി മുറിക്കാൻ ശ്രമിച്ചാണ് അദ്ദേഹം ഇത് വിശദീകരിച്ചത്. 

തുടർന്ന് മതിൽ ചാടുന്ന രീതിയും അദ്ദേഹം ഡെമോയിലൂടെ കാണിച്ചു. മൂന്ന് പ്ലാസ്റ്റിക് ഡ്രം വെച്ച് അതിന് മുകളിൽ കയറി തുണികൊണ്ട് വടംകെട്ടി പുറത്തുചാടുന്നത് ഗോവിന്ദച്ചാമി പറന്നാൽ പോലും സാധിക്കില്ലെന്ന് അൻവർ ചൂണ്ടിക്കാട്ടി. പത്ത് ഗോവിന്ദച്ചാമി വന്നാലും ഈ രീതിയിൽ ഒരു മതിൽചാട്ടം സാധ്യമാകില്ലെന്നും അതിനാൽ വിശദമായ അന്വേഷണം വേണമെന്നും പി വി അൻവർ ആവശ്യപ്പെട്ടു.

കണ്ണൂർ സെൻട്രൽ ജയിലിൽനിന്ന് രക്ഷപ്പെട്ടശേഷം പിടിയിലായ ഗോവിന്ദച്ചാമിയെ ഇപ്പോൾ തൃശ്ശൂരിലെ അതിസുരക്ഷാ ജയിലിലെത്തിച്ചിരിക്കുകയാണ്. നടപടികൾ പൂർത്തിയാക്കി അദ്ദേഹത്തെ താഴത്തെ നിലയിലെ ഒന്നാമത്തെ ബ്ലോക്കിലുള്ള ഏകാന്ത തടവിൽ പാർപ്പിച്ചു. 

തൊട്ടടുത്ത മുറിയിൽ നിന്ന് ജയിൽ ജീവനക്കാരുടെ നിരീക്ഷണമുണ്ട്. ഏകാന്ത സെല്ലിലേക്ക് പലഭാഗങ്ങളിൽ നിന്ന് ക്യാമറാ നിരീക്ഷണവുമുണ്ട്. സെല്ലിനുള്ളിലും ക്യാമറ സ്ഥാപിച്ചിട്ടുണ്ട്.

ഗോവിന്ദച്ചാമിയുടെ ജയിൽചാട്ടത്തെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Govindachami's jailbreak from Kannur prison raises questions.

#Govindachami #Jailbreak #KannurJail #KeralaPolice #PVAnvar #PrisonSecurity