തിരുവനന്തപുരം: (KVARTHA) തപാൽ വോട്ടുകൾ തിരുത്തിയെന്ന വിവാദ വെളിപ്പെടുത്തലിൽ മുൻ മന്ത്രി ജി സുധാകരൻ നിയമനടപടിയിലേക്ക്. സുധാകരന്റെ പ്രസ്താവനയിൽ എഫ്‌ഐആർ രജിസ്റ്റർ ചെയ്ത് കേസെടുത്ത് അന്വേഷണം നടത്താൻ മുഖ്യ തിരഞ്ഞെടുപ്പ് ഓഫീസർ നിർദ്ദേശം നൽകി. വിശദമായ അന്വേഷണം നടത്താനാണ് നിർദ്ദേശം. അടിയന്തര നടപടി സ്വീകരിക്കാൻ ആലപ്പുഴ ജില്ലാ തിരഞ്ഞെടുപ്പ് ഓഫീസർക്ക് മുഖ്യ തിരഞ്ഞെടുപ്പ് ഓഫീസർ നിർദ്ദേശം നൽകിയിട്ടുണ്ട്.

സുധാകരന്റെ വെളിപ്പെടുത്തലിൽ തുടർനടപടികൾക്കായി നിയമവശം പരിശോധിക്കുകയാണെന്നും ഇത് അത്യന്തം ഗൗരവമുള്ള വിഷയമാണെന്നും മുഖ്യ തിരഞ്ഞെടുപ്പ് ഓഫീസർ നേരത്തെ വ്യക്തമാക്കിയിരുന്നു. ഇതിന് പിന്നാലെയാണ് കേസെടുക്കാൻ നിർദ്ദേശം വന്നിരിക്കുന്നത്. ആലപ്പുഴയിൽ എൻജിഒ യൂണിയൻ സമ്മേളനത്തിൽ നടത്തിയ വെളിപ്പെടുത്തലാണ് സിപിഎം നേതാവും മുൻ മന്ത്രിയുമായ ജി സുധാകരന് വിനയായിരിക്കുന്നത്.

തപാൽ വോട്ടുകൾ പൊട്ടിച്ച് തിരുത്തി സിപിഎം സ്ഥാനാർത്ഥിക്ക് അനുകൂലമാക്കിയെന്നാണ് സുധാകരൻ്റെ വെളിപ്പെടുത്തൽ. കമ്മീഷൻ കേസെടുത്താലും കുഴപ്പമില്ലെന്നും അദ്ദേഹം പറഞ്ഞിരുന്നു. തിരഞ്ഞെടുപ്പ് ക്രമക്കേടിനെക്കുറിച്ചുള്ള ഈ വെളിപ്പെടുത്തൽ തിരഞ്ഞെടുപ്പ് കമ്മീഷന് അവഗണിക്കാനാവില്ല. ഈ സാഹചര്യത്തിലാണ് കമ്മീഷൻ തുടർനടപടികളുടെ നിയമവശം പരിശോധിച്ചത്.

1989 ലെ പാർലമെൻ്റ് തിരഞ്ഞെടുപ്പിൽ ആലപ്പുഴയിൽ കെ വി ദേവദാസ് സിപിഎം സ്ഥാനാർത്ഥിയായി മത്സരിച്ചപ്പോഴാണ് താനും മറ്റുള്ളവരും ചേർന്ന് തപാൽ വോട്ടുകൾ തിരുത്തിയതെന്ന് സുധാകരൻ പറഞ്ഞത്. സിപിഎം ജില്ലാ കമ്മിറ്റി ഓഫീസിൽ വെച്ച് സർക്കാർ ജീവനക്കാരുടെ തപാൽ വോട്ടുകൾ തിരുത്തിയെന്നാണ് അദ്ദേഹം വെളിപ്പെടുത്തിയത്. അന്ന് സിപിഎം സർവീസ് സംഘടനകളിൽ അംഗങ്ങളായിരുന്നവരിൽ 15 ശതമാനം പേരുടെ വോട്ട് ദേവദാസിന് ലഭിച്ചിരുന്നില്ലെന്നും സുധാകരൻ കൂട്ടിച്ചേർത്തു. ഈ തിരഞ്ഞെടുപ്പിൽ കോൺഗ്രസ് സ്ഥാനാർത്ഥി വക്കം പുരുഷോത്തമനാണ് വിജയിച്ചത്.

ജി സുധാകരനെതിരായ തിരഞ്ഞെടുപ്പ് കമ്മീഷൻ്റെ ഈ നടപടി ശരിയാണോ? ഇങ്ങനെയുള്ള വെളിപ്പെടുത്തലുകൾ രാഷ്ട്രീയ രംഗത്ത് എന്ത് സന്ദേശമാണ് നൽകുന്നത്? വാർത്ത ഷെയർ ചെയ്യുക.

Article Summary: The Chief Electoral Officer has directed the registration of an FIR and investigation into former minister G. Sudhakaran's controversial revelation about tampering with postal votes during the 1989 elections in Alappuzha to benefit the CPI(M) candidate.

#GSudhakaranCase, #ElectionFraudKerala, #PostalVoteTampering, #KeralaPolitics, #ElectionCommission, #LegalAction