ഫസൽ വധക്കേസ് പ്രതി കാരായി ചന്ദ്രശേഖരൻ നഗരസഭാ ചെയർമാൻ സ്ഥാനാർത്ഥി: സിബിഐ കോടതി വിധി വരാനിരിക്കെ സിപിഎം തീരുമാനം

കണ്ണൂ‌ർ: (KVARTHA) തലശ്ശേരി സൈദാർ പള്ളിയിലെ എൻ.ഡി.എഫ്. പ്രവർത്തകൻ മുഹമ്മദ് ഫസൽ വധക്കേസിലെ പ്രതിയായ സി.പി.എം. നേതാവ് കാരായി ചന്ദ്രശേഖരൻ തലശ്ശേരി നഗരസഭയിൽ സി.പി.എം. സ്ഥാനാർത്ഥിയായി മത്സരിക്കും. തലശ്ശേരി നഗരസഭയിലെ ചെള്ളക്കര വാർഡിലാണ് ചന്ദ്രശേഖരൻ ജനവിധി തേടുന്നത്. 

ഫസൽ വധക്കേസിൽ ഗൂഢാലോചനക്കുറ്റമാണ് ചന്ദ്രശേഖരനെതിരെ ചുമത്തിയിട്ടുള്ളത്. സി.ബി.ഐ. കോടതിയുടെ അന്തിമ വിധി വരാനിരിക്കെയാണ് സി.പി.എം. ഈ നിർണായക തീരുമാനം എടുത്തിരിക്കുന്നത്.

2015-ൽ കാരായി ചന്ദ്രശേഖരൻ തലശ്ശേരി നഗരസഭാ ചെയർമാനായിരുന്നു. എന്നാൽ, ഫസൽ വധക്കേസിലെ ജാമ്യവ്യവസ്ഥ പ്രകാരം ജില്ലയിൽ പ്രവേശിക്കുന്നതിന് തടസ്സമുണ്ടായതിനെ തുടർന്ന് അദ്ദേഹത്തിന് ചെയർമാൻ സ്ഥാനം രാജി വെക്കേണ്ടി വന്നിരുന്നു. 

ഇത്തവണ കാരായി ചന്ദ്രശേഖരനെ വിജയിപ്പിച്ച് വീണ്ടും ചെയർമാനാക്കാനാണ് സി.പി.എം. ലക്ഷ്യമിടുന്നത്. തലശ്ശേരിയിലെ മുതിർന്ന സി.പി.എം. നേതാക്കളിലൊരാളാണ് നിലവിൽ സി.പി.എം. ഏരിയാ കമ്മിറ്റിയംഗമായ കാരായി ചന്ദ്രശേഖരൻ.

159 വർഷം പിന്നിട്ട തലശ്ശേരി നഗരസഭയിൽ ഇക്കുറിയും ഇടതു ആധിപത്യം തുടരുമെന്നാണ് എൽ.ഡി.എഫ്. പ്രതീക്ഷിക്കുന്നത്. വർഷങ്ങളായി 'ചുവന്ന' തലശ്ശേരിയുടെ തിലകക്കുറി ഇക്കുറിയും മായില്ലെന്ന് ഉറപ്പുവരുത്തുകയാണ് ഇടതുമുന്നണിയുടെ പ്രധാന ലക്ഷ്യം.

വാർഡുകളുടെ എണ്ണം 52-ൽ നിന്നും ഇക്കുറി 53 ആയി വർധിച്ചിട്ടുണ്ട്. 53 വാർഡുകളിലും സീറ്റ് വിഭജനം പൂർത്തിയാക്കി ഒരുപടി മുന്നിലെത്തിയിരിക്കുകയാണ് എൽ.ഡി.എഫ്. സി.പി.എം. 46 സീറ്റിലും സി.പി.ഐ. അഞ്ച് സീറ്റിലും മത്സരിക്കും. എൻ.സി.പി., ഐ.എൻ.എൽ. എന്നീ ഘടകകക്ഷികൾക്ക് ഓരോ സീറ്റ് വീതം നൽകാനാണ് ധാരണ.

യു.ഡി.എഫിൽ സീറ്റ് വിഭജന ചർച്ചകൾ അന്തിമ ഘട്ടത്തിലാണ്. പുതുതായി വന്ന വാർഡിൽ കോൺഗ്രസിനും മുസ്ലിം ലീഗിനും താൽപ്പര്യമുണ്ട്. സൈദാർപള്ളി വാർഡിന്റെ ഭാഗങ്ങൾ ഉൾപ്പെടുന്നതിനാൽ മുസ്ലിം ലീഗിനും സെയ്ന്റ് പീറ്റേഴ്സ് വാർഡിന്റെ ഭാഗമായതിനാൽ കോൺഗ്രസിനും ഈ സീറ്റിൽ ഏറെ പ്രതീക്ഷയുണ്ട്. 

ബാക്കി വാർഡുകളിൽ കഴിഞ്ഞ തവണത്തെ പോലെ കോൺഗ്രസ് 35 വാർഡുകളിലും മുസ്ലിം ലീഗ് 17 വാർഡുകളിലും മത്സരിക്കാനാണ് നിലവിലെ ധാരണ. നേതാക്കളായ എ.കെ. അബൂട്ടി ഹാജി, എ.കെ. സക്കരിയ, നിലവിലെ കൗൺസിലർ ടി.വി. റാഷിദ എന്നിവർ ലീഗ് സ്ഥാനാർത്ഥികളാകും. ചിത്രകാരൻ ബി.ടി.കെ. അശോകിന്റെ ഭാര്യ രമ്യ അശോക് ഇക്കുറി കോൺഗ്രസ് സ്ഥാനാർത്ഥി പട്ടികയിലുണ്ട്. നിലവിൽ യു.ഡി.എഫിന് 7 കൗൺസിലർമാരാണുള്ളത്. ഇതിൽ കോൺഗ്രസിന് മൂന്നും മുസ്ലിം ലീഗിന് നാലുമാണ് കൗൺസിലർമാർ.

എൻ.ഡി.എ.യുടെ സ്ഥാനാർത്ഥി പ്രഖ്യാപനം അടുത്ത ദിവസങ്ങളിൽ ഉണ്ടാകുമെന്നാണ് സൂചന. കണ്ണൂർ ജില്ലയിൽ ബി.ജെ.പിക്ക് ഏറ്റവും കൂടുതൽ കൗൺസിലർമാരുള്ളത് തലശ്ശേരി നഗരസഭയിലാണ്. 

അതുകൊണ്ടുതന്നെ സീറ്റുകൾ വർദ്ധിപ്പിക്കാനാണ് ബി.ജെ.പി.യുടെ ശ്രമം. ബി.ജെ.പി. നേതാവായ ലിജേഷ് പുന്നോൽ വധക്കേസിലെ പ്രതിയായതും ആക്രമ രാഷ്ട്രീയത്തിൽ ഏറ്റവും ഒടുവിൽ പഴി ചാരപ്പെട്ടതും ബി.ജെ.പി.യെ പ്രതിരോധത്തിലാക്കിയിട്ടുണ്ട്.

തലശ്ശേരിയിൽ ബി.ജെ.പി.യും ആർ.എസ്.എസ്.സും തമ്മിൽ അത്ര നല്ല സുഖത്തിലല്ല മുൻപോട്ടു പോകുന്നത്. ഏറെക്കാലമായി തിരഞ്ഞെടുപ്പ് പ്രവർത്തനങ്ങളുമായി ആർ.എസ്.എസ്. സഹകരിക്കാറില്ല. പുന്നോൽ ഹരിദാസ് വധക്കേസിലെ പ്രതികളെ പരസ്യമായി ആർ.എസ്.എസ്. തള്ളിപ്പറഞ്ഞിരുന്നു.

തലശ്ശേരി നഗരസഭയിലെ രാഷ്ട്രീയ നീക്കങ്ങളെക്കുറിച്ചുള്ള ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായം കമൻ്റ് ചെയ്യുക.

Article Summary: CPM fields Fazal murder case accused Karayi Chandrasekharan for Thalassery Municipality Chairman post.

#KarayiChandrasekharan #Thalassery #FazalCase #CPMKerala #KeralaLocalBodyPolls #KannurPolitics