മുഖ്യമന്ത്രിക്കെതിരായ പ്രതിഷേധം: ഫർസീൻ മജീദിന് ശമ്പള വർധനവ് നിഷേധിച്ചു; നീതി നിഷേധമെന്ന് യൂത്ത് കോൺഗ്രസ്

കണ്ണൂര്‍: (KVARTHA) മുഖ്യമന്ത്രി പിണറായി വിജയനെ വിമാനത്തിൽ വെച്ച് ആക്രമിക്കാൻ ശ്രമിച്ച കേസിൽ പ്രതിയായ യൂത്ത് കോൺഗ്രസ് കണ്ണൂർ ജില്ലാ വൈസ് പ്രസിഡന്റ് ഫർസീൻ മജീദിന് ശമ്പള വർധനവ് നിഷേധിച്ച സ്കൂൾ മാനേജ്‌മെന്റിന്റെ നടപടി വലിയ വിവാദമായി മാറിയിരിക്കുന്നു. 

ചാലോട് മുട്ടന്നൂർ യുപി സ്കൂൾ മാനേജ്‌മെന്റാണ് അധ്യാപകനായ ഫർസീന്റെ ഒരു വർഷത്തെ ശമ്പള വർധന തടഞ്ഞത്. സ്ഥാപന മേധാവിയെ അറിയിക്കാതെ യാത്ര ചെയ്തു എന്ന കാരണം പറഞ്ഞാണ് നടപടിയെങ്കിലും, മുഖ്യമന്ത്രിക്കെതിരെ ആക്രമണശ്രമം നടത്തി അധ്യാപക പദവിക്ക് കളങ്കം വരുത്തി എന്നും ഉത്തരവിൽ പറയുന്നു. പതിനാല് ദിവസത്തിനകം മറുപടി നൽകിയില്ലെങ്കിൽ ഉത്തരവ് അന്തിമമായിരിക്കുമെന്നും മാനേജ്‌മെന്റ് അറിയിച്ചിട്ടുണ്ട്.

എന്നാൽ, തനിക്കെതിരെയുള്ളത് രാഷ്ട്രീയ പ്രേരിതമായ പ്രതികാര നടപടിയാണെന്ന് ഫർസീൻ മജീദ് ആരോപിച്ചു. ‘ഇത് തികച്ചും പ്രതികാര നടപടിയാണെന്ന് നാട്ടിലെ ജനാധിപത്യ വിശ്വാസികൾക്ക് ബോധ്യമുണ്ട്. ഈ പ്രതികാര നടപടിയെ നിയമപരമായി നേരിടും,’ ഫർസീൻ പറഞ്ഞു. 

മൂന്ന് വർഷമായിട്ടും ഈ കേസിൽ കുറ്റപത്രം സമർപ്പിക്കാൻ പോലും പോലീസിന് കഴിഞ്ഞിട്ടില്ലെന്നും, അന്വേഷണ ഉദ്യോഗസ്ഥർക്ക് പോലും ഒന്നും കണ്ടെത്താൻ സാധിച്ചിട്ടില്ലെന്നും അദ്ദേഹം ചൂണ്ടിക്കാട്ടി. താൻ കുറ്റക്കാരനാണെങ്കിൽ, മുഖ്യമന്ത്രിയുടെ ഗൺമാൻ, മുൻ എൽഡിഎഫ് കൺവീനർ ഇ.പി. ജയരാജൻ, മുഖ്യമന്ത്രിയുടെ പി.എ. എന്നിവരും തങ്ങൾ നൽകിയ കേസിലെ പ്രതികളാണെന്നും, എന്നാൽ ഇവർക്കെതിരെ കേസെടുക്കാൻ പോലും പോലീസ് തയ്യാറായിരുന്നില്ലെന്നും, പിന്നീട് കോടതിയാണ് കേസെടുക്കാൻ നിർദേശിച്ചതെന്നും ഫർസീൻ കൂട്ടിച്ചേർത്തു. 

ഈ വിഷയത്തിൽ ഒത്തുതീർപ്പിന് താൻ തയ്യാറല്ലെന്നും, ആദ്യം കരിങ്കൊടി കാണിച്ചതായിരുന്നു പ്രശ്നമെങ്കിൽ ഇപ്പോൾ വിദ്യാലയത്തിൽ നിന്ന് സ്ഥാപന മേധാവിയുടെ ഉത്തരവില്ലാതെ യാത്ര ചെയ്തു എന്നതിനാണ് നടപടിയെന്നും ഫർസീൻ വ്യക്തമാക്കി.

2022 ജൂൺ 12-നാണ് കേസിനാസ്പദമായ സംഭവം നടന്നത്. ഇൻഡിഗോ വിമാനം കണ്ണൂരിൽ നിന്ന് തിരുവനന്തപുരത്തേക്ക് പോകുന്നതിനിടെയായിരുന്നു യൂത്ത് കോൺഗ്രസ് പ്രവർത്തകരായ ഫർസീൻ മജീദ്, നവീൻ കുമാർ, സുനിത് നാരായണൻ എന്നിവർ മുഖ്യമന്ത്രിയെ വധിക്കാൻ ശ്രമിച്ചുവെന്ന കേസ് രജിസ്റ്റർ ചെയ്തത്. 

വധശ്രമം, ഗൂഢാലോചന, വ്യോമയാന നിയമത്തിലെ വകുപ്പുകൾ എന്നിവ ചേർത്താണ് കേസെടുത്തിരിക്കുന്നത്. 13 ദിവസം ജയിലിൽ കിടന്ന ശേഷമാണ് ഹൈകോടതി ഉത്തരവിലൂടെ ഇവർക്ക് ജാമ്യം ലഭിച്ചത്. ഇതിനുശേഷം ഫർസീനെതിരെ സി.പി.എം. പ്രവർത്തകരിൽ നിന്ന് ഭീഷണി ഉയർന്നതിനെ തുടർന്ന് പോലീസ് സംരക്ഷണം ഏർപ്പെടുത്തിയിരുന്നു.

ഫർസീൻ മജീദിനെതിരായ നടപടി: മട്ടന്നൂരിൽ യൂത്ത് കോൺഗ്രസ് പ്രതിഷേധ യോഗം

ഫർസീൻ മജീദിനെതിരായ നടപടി നീതിന്യായ വ്യവസ്ഥയോടുള്ള വെല്ലുവിളിയാണെന്ന് യൂത്ത് കോൺഗ്രസ് സംസ്ഥാന ജനറൽ സെക്രട്ടറി രാഹുൽ വെച്ചിയോട്ട് അഭിപ്രായപ്പെട്ടു. മൂന്ന് വർഷമായിട്ടും കേസിൽ കുറ്റപത്രം പോലും നൽകാൻ സാധിക്കാതെ പോലീസ് ഇരുട്ടിൽ തപ്പുന്ന സാഹചര്യത്തിൽ, വിദ്യാഭ്യാസ വകുപ്പിനെ ഉപയോഗിച്ച് എടുത്ത ഈ തെറ്റായ നടപടിയെ യൂത്ത് കോൺഗ്രസ് നിയമപരമായും ജനകീയമായും നേരിടുമെന്നും അദ്ദേഹം പറഞ്ഞു.

യൂത്ത് കോൺഗ്രസ് മട്ടന്നൂർ നിയോജകമണ്ഡലം കമ്മിറ്റിയുടെ നേതൃത്വത്തിൽ മട്ടന്നൂരിൽ നടന്ന പ്രതിഷേധ യോഗം ഉദ്ഘാടനം ചെയ്ത് സംസാരിക്കുകയായിരുന്നു രാഹുൽ വെച്ചിയോട്ട്. യൂത്ത് കോൺഗ്രസ് ജില്ലാ പ്രസിഡന്റ് വിജിൽ മോഹനൻ മുഖ്യപ്രഭാഷണം നടത്തി. യൂത്ത് കോൺഗ്രസ് മട്ടന്നൂർ നിയോജകമണ്ഡലം ഉപാധ്യക്ഷൻ അഷ്‌റഫ് എളമ്പാറ അധ്യക്ഷത വഹിച്ചു. 

കോൺഗ്രസ് മട്ടന്നൂർ ബ്ലോക്ക് പ്രസിഡന്റ് സുരേഷ് മാവില, യൂത്ത് കോൺഗ്രസ് സംസ്ഥാന സെക്രട്ടറി നിമിഷ രഘുനാഥ്, വിജിത്ത് നിലാഞ്ചേരി, നിധിൻ കോമത്ത്, ശ്രുതി കയനി, ടി.വി. രവീന്ദ്രൻ, നിധിൻ നടുവനാട്, പുത്തൻപുരയിൽ രാഹുൽ, ഹരികൃഷ്ണൻ പാളാട്, കെ. പ്രശാന്തൻ, ആർ.കെ. നവീൻ കുമാർ, കെ.സി. ബൈജു, ഒ.കെ. പ്രസാദ്, ശ്രീനേഷ് മാവില, സുനിത്ത് നാരായണൻ, വിനീത് കുമ്മാനം, ജിഷ്ണു പെരിയച്ചൂർ, അരുൺ തൊടികുളം, ജിബിൻ കുന്നുമ്മൽ, ഹരികൃഷ്ണൻ പൊറോറ തുടങ്ങിയവർ പ്രതിഷേധത്തിന് നേതൃത്വം നൽകി.

ഈ വിഷയത്തെക്കുറിച്ചുള്ള നിങ്ങളുടെ അഭിപ്രായം പങ്കുവെക്കൂ!

Article Summary: Teacher Farzeen Majeed's salary increment denied due to protest.

#FarzeenMajeed #KeralaPolitics #YouthCongress #SalaryDispute #KannurNews #Protest