ജില്ലാ പഞ്ചായത്ത് തിരഞ്ഞെടുപ്പ്: പി പി ദിവ്യയ്ക്ക് പകരം കെ അനുശ്രീ; സിപിഎം പട്ടിക പ്രഖ്യാപിച്ചു

കണ്ണൂര്‍: (KVARTHA) ജില്ലാ പഞ്ചായത്തിലേക്കുള്ള സിപിഎം സ്ഥാനാർഥികളെ പ്രഖ്യാപിച്ചപ്പോൾ പ്രമുഖർ പലരും പുറത്തായി. മുൻ ജില്ലാ പഞ്ചായത്ത് പ്രസിഡന്റുമാരായ പി പി ദിവ്യ, അഡ്വ. കെ രത്നകുമാരി, സ്റ്റാൻഡിങ് കമ്മിറ്റി ചെയർപേഴ്സൺ അഡ്വ. ടി സരള, കെ വി ബിജു, ചന്ദ്രൻ കല്ലാട്ട് തുടങ്ങിയ പ്രമുഖർക്കാണ് ഇത്തവണ സ്ഥാനം നഷ്ടപ്പെട്ടത്. 

സിപിഎം കണ്ണൂർ ജില്ലാ സെക്രട്ടറി കെ കെ രാഗേഷ് പാർട്ടിയുടെ സ്ഥാനാർഥികളെ ജില്ലാ കമ്മിറ്റി ഓഫീസായ അഴീക്കോടൻ മന്ദിരത്തിൽ നടത്തിയ വാർത്താസമ്മേളനത്തിൽ പ്രഖ്യാപിച്ചു. എ ഡി എം നവീൻബാബുവിന്റെ മരണത്തിൽ ആരോപണവിധേയയായ മുൻ ജില്ലാ പഞ്ചായത്ത് പ്രസിഡന്റ് പി പി ദിവ്യയ്ക്ക് ഇത്തവണ സീറ്റുണ്ടാവില്ലെന്ന് പാർട്ടി വൃത്തങ്ങളിൽ നേരത്തെതന്നെ അഭ്യൂഹമുണ്ടായിരുന്നു. 

അതേസമയം, എസ്എഫ്‌ഐ മുൻ സംസ്ഥാന പ്രസിഡന്റും സിപിഎം കണ്ണൂർ ജില്ലാ കമ്മിറ്റിയംഗവുമായ കെ അനുശ്രീ പിണറായി ഡിവിഷനിൽ സ്ഥാനാർഥിയാകും. സിപിഎം സ്ഥാനാർഥി പട്ടികയിൽ ബിനോയ് കുര്യൻ ഒഴികെയുള്ളവരെല്ലാം ജില്ലാ പഞ്ചായത്തിലേക്കുള്ള തിരഞ്ഞെടുപ്പിൽ പുതുമുഖങ്ങളാണ്.

മുൻ ജില്ലാ പഞ്ചായത്ത് പ്രസിഡന്റ് പി പി ദിവ്യ പ്രതിനിധീകരിച്ചിരുന്ന കല്യാശ്ശേരി ഡിവിഷനിൽ സിപിഎം ലോക്കൽ കമ്മിറ്റിയംഗം വി വി പവിത്രനാണ് സ്ഥാനാർഥി. എസ്എഫ്‌ഐ മുൻ സംസ്ഥാന പ്രസിഡന്റ് കെ അനുശ്രീ പിണറായി ഡിവിഷനിലാണ് മത്സരിക്കുക. 

കണ്ണൂർ സർവകലാശാല കാമ്പസിലെ ജേണലിസം വിഭാഗം രണ്ടാംവർഷ വിദ്യാർഥിനിയും എസ്എഫ്‌ഐ പേരാവൂർ ഏരിയ സെക്രട്ടറിയുമായ നവ്യ സുരേഷ് പേരാവൂർ ഡിവിഷനിൽ സ്ഥാനാർഥിയാകും. നിലവിലെ ജില്ലാ പഞ്ചായത്ത് വൈസ് പ്രസിഡന്റായ ബിനോയ് കുര്യൻ പെരളശ്ശേരിയിൽനിന്ന് ജനവിധി തേടും.

എല്ലാ ഘടകങ്ങളും പരിഗണിച്ചുകൊണ്ടാണ് സ്ഥാനാർഥി പട്ടിക തയ്യാറാക്കിയതെന്ന് സിപിഎം ജില്ലാ സെക്രട്ടറി കെ കെ രാഗേഷ് പറഞ്ഞു. പ്രസിഡന്റ് സ്ഥാനാർഥിയെ മുൻകൂട്ടി പറയാറില്ലെന്നും ‘ഈ പാനലിൽ പ്രസിഡന്റാകാൻ കഴിയുന്ന പലരുമുണ്ട്, എല്ലാവരും അതിന് യോഗ്യതയുള്ളവരാണ്’ എന്നും അദ്ദേഹം കൂട്ടിച്ചേർത്തു.

ഈ വാർത്ത പങ്കുവെക്കൂ. നിങ്ങളുടെ അഭിപ്രായങ്ങൾ കമൻ്റ് ചെയ്യുക.

Article Summary: CPM announced its Kannur District Panchayat candidates, dropping prominent names like PP Divya and K Ratnakumari, fielding mostly newcomers.

#KannurElections #CPMKannur #PPDivya #KAnushree #LocalBodyElections #KeralaPolitics