കോട്ടയം:  (KVARTHA) മുൻ എംഎൽഎയും ബിജെപി നേതാവുമായ പി സി ജോർജ് നടത്തിയ വിവാദ ലൗ ജിഹാദ് പ്രസംഗത്തിൽ കേസെടുക്കേണ്ടതില്ലെന്ന് പൊലീസിന് നിയമോപദേശം ലഭിച്ചു. പാലായിൽ നടന്ന ലഹരിവിരുദ്ധ സെമിനാറിൽ പി സി ജോർജ് നടത്തിയ പ്രസംഗമാണ് വിവാദങ്ങൾക്ക് തിരികൊളുത്തിയത്. ഈ പ്രസംഗത്തിൽ പി സി ജോർജിനെതിരെ കേസെടുക്കണോ എന്ന കാര്യത്തിൽ പൊലീസ് നിയമ വിദഗ്ദ്ധരുമായി ആലോചിച്ചതിന് ശേഷമാണ് ഇങ്ങനെയൊരു നിഗമനത്തിൽ എത്തിയത്. പി സി ജോർജിന്റെ പ്രസംഗത്തിൽ കേസെടുക്കാൻ തക്കതായ യാതൊരു കാര്യവുമില്ലെന്നാണ് പൊലീസിന് ലഭിച്ച നിയമോപദേശം.

സെമിനാറിൽ പി സി ജോർജ് കേരളത്തിൽ ലൗ ജിഹാദ് വർധിച്ചു വരുന്നതായി ആരോപിച്ചിരുന്നു. 'മീനച്ചിൽ താലൂക്കിൽ മാത്രം 400 പെൺകുട്ടികളെ ലൗ ജിഹാദിലൂടെ നഷ്ടപ്പെട്ടു. അതിൽ 41 പേരെ മാത്രമാണ് തിരികെ ലഭിച്ചത്. ക്രിസ്ത്യാനികൾ അവരുടെ പെൺകുട്ടികളെ 24 വയസ്സിനു മുൻപ് വിവാഹം കഴിപ്പിക്കാൻ തയ്യാറാകണം. രക്ഷിതാക്കൾ യാഥാർത്ഥ്യം മനസ്സിലാക്കി പെരുമാറണം', എന്നായിരുന്നു അദ്ദേഹത്തിന്റെ വാക്കുകൾ. കൂടാതെ, 'കഴിഞ്ഞ ദിവസം ഈരാറ്റുപേട്ടയിൽ പിടികൂടിയ സ്ഫോടക വസ്തുക്കൾ കേരളം മുഴുവൻ കത്തിക്കാനുള്ള ശേഷിയുള്ളതാണ്. അത് എവിടെയാണ് ഉപയോഗിക്കാൻ പോകുന്നത് എന്ന് എനിക്കറിയാം, പക്ഷേ ഞാൻ അത് പറയുന്നില്ല. രാജ്യത്തിന്റെ ഇപ്പോഴത്തെ അവസ്ഥ വളരെ അപകടകരമായ രീതിയിലാണ് മുന്നോട്ട് പൊയ്ക്കൊണ്ടിരിക്കുന്നത്', എന്നും പി സി ജോർജ് പ്രസംഗത്തിൽ കൂട്ടിച്ചേർത്തു.

മതവിദ്വേഷ പരാമർശ കേസിൽ ജാമ്യത്തിൽ കഴിയുന്ന പി സി ജോർജ്, കോടതിയുടെ കർശന നിർദ്ദേശങ്ങൾ നിലനിൽക്കെയാണ് വീണ്ടും ഇത്തരത്തിലുള്ള ഒരു വിവാദ പ്രസംഗം നടത്തിയത് എന്നത് ശ്രദ്ധേയമാണ്. ഈ വർഷം ജനുവരി ആറിന് ഒരു ടെലിവിഷൻ ചാനൽ ചർച്ചയിൽ പി സി ജോർജ് നടത്തിയ പരാമർശത്തിനെതിരെ ഈരാറ്റുപേട്ട പൊലീസ് കേസ് എടുത്തിരുന്നു. ഈ കേസിൽ അദ്ദേഹം റിമാൻഡിൽ പോകുകയും പിന്നീട് ജാമ്യത്തിൽ ഇറങ്ങുകയുമായിരുന്നു. അന്ന് അദ്ദേഹത്തിനെതിരെ മതസ്പർധ വളർത്തൽ, കലാപാഹ്വാനം തുടങ്ങിയ വകുപ്പുകളാണ് ചുമത്തിയിരുന്നത്.

പി സി ജോർജിന്റെ ഈ പ്രസ്താവനക്കെതിരെ വിവിധ സംഘടനകൾ രംഗത്തെത്തിയിരുന്നു. യൂത്ത് കോൺഗ്രസും യൂത്ത് ലീഗും പൊലീസിൽ ഔദ്യോഗികമായി പരാതി നൽകി. ഈ പരാതികളുടെ അടിസ്ഥാനത്തിലാണ് കേരള പൊലീസ് നിയമോപദേശം തേടിയത്. പൊലീസിന്റെ ഈ നിലപാടിനെതിരെ യൂത്ത് ലീഗ് ശക്തമായ വിമർശനവുമായി രംഗത്തെത്തി. പൊലീസിന്റെ ഈ സമീപനത്തിനെതിരെ കോടതിയെ സമീപിക്കുമെന്നും യൂത്ത് ലീഗ് നേതാക്കൾ അറിയിച്ചു. 

അതിനിടെ പൊലീസിനെതിരെ വിമർശനവുമായി ഇരു വിഭാഗം സമസ്തയിലെ യുവജന നേതാക്കൾ രംഗത്തുവന്നു. പൊലീസും ആഭ്യന്തര വകുപ്പും ആഗ്രഹിച്ച ഉപദേശം തന്നെയാണ് കിട്ടിയതെന്ന് എസ് വൈ എസ് മുൻ നേതാവ്  മുഹമ്മദലി കിനാലൂർ പ്രതികരിച്ചു. 'മുസ്‌ലിംകൾക്കെതിരെ വിദ്വേഷപ്രചാരണം നടത്തുന്നതൊക്കെ അത്ര വലിയ കാര്യമാണോ? ഇക്കേരളത്തിൽ മറിച്ചൊരു നിയമോപദേശം ഉണ്ടാകുമെന്ന് നിങ്ങൾ കരുതുന്നുണ്ടോ? പോലീസും ആഭ്യന്തര വകുപ്പും ആഗ്രഹിച്ച ഉപദേശം തന്നെയാണ് കിട്ടിയത്. വിഷയത്തിൽ കോടതിയെ സമീപിക്കുമെന്നു പരാതിക്കാരായ യൂത്ത് ലീഗ് അറിയിച്ചിട്ടുണ്ട്', അദ്ദേഹം കുറിച്ചു.

നിയമോപദേശം ഈ വഴിക്കാണെങ്കിൽ തെറ്റു ചെയ്യുന്നവർ നിരന്തരം ചെയ്താൽ കുറ്റകൃത്യമാവില്ലെന്നാണ് മനസിലാക്കേണ്ടതെന്ന് എസ്കെഎസ്എസ്എഫ് സംസ്ഥാന വൈസ് പ്രസിഡന്റ് സത്താർ പന്തല്ലൂർ വിമർശിച്ചു. 'വിദ്വേഷ പ്രസംഗം ആദ്യം നടത്തുമ്പോൾ കേസെടുക്കും. രണ്ടാം വട്ടം നടത്തിയാലും കേസെടുക്കും. തുടർച്ചയായി നടത്തിയാൽ കേസെടുക്കാൻ വകുപ്പില്ലപോൽ. നിയമോപദേശം ഈ വഴിക്കാണെങ്കിൽ തെറ്റ് ചെയ്യുന്നവർ നിരന്തരം ചെയ്താൽ കുറ്റകൃത്യമാവില്ലെന്നാണ് മനസിലാക്കേണ്ടത്. ഈ വിഷനാവിനെ നിയന്ത്രിക്കാൻ നിയമത്തിൽ വഴിയില്ലെങ്കിൽ ഒരു വൈദ്യോപദേശം കിട്ടുമോ ഊളമ്പാറയിലേക്കോ മറ്റോ ? അതോ എല്ലാവരും എം.ഡി.എം.എ അടിച്ച് ഫിറ്റായതാണോ?', അദ്ദേഹം ഫേസ്‌ബുക്കിൽ കുറിച്ചു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Legal advice against filing a case against P.C. George for his controversial 'Love Jihad' speech. Both Samstha youth leaders strongly criticize the police stance.

#PCGeorge #LoveJihad #LegalAdvice #KottayamNews #YouthLeaders #KeralaNews