തിരുവനന്തപുരം: (KVARTHA) കേരളത്തിലെ ജനങ്ങൾ ഇടതുപക്ഷ ജനാധിപത്യ മുന്നണിയിൽ നിന്ന് അകന്നുവെന്നും എന്നാൽ മുന്നണിയുടെ അടിത്തറ തകർന്നിട്ടില്ലെന്നും സി പി ഐ സംസ്ഥാന സെക്രട്ടറി ബിനോയ് വിശ്വം. തിരിച്ചടികളിൽ നിന്ന് പാഠം ഉൾക്കൊണ്ട് തെറ്റുകൾ തിരുത്തി മുന്നോട്ടുപോകാൻ മുന്നണിക്ക് കഴിയണമെന്ന് അദ്ദേഹം വാർത്താസമ്മേളനത്തിൽ പറഞ്ഞു. സർക്കാരിന്റെ നേട്ടങ്ങൾ കൃത്യമായി ജനങ്ങളിലെത്തിക്കാൻ സാധിച്ചില്ലെന്നും തദ്ദേശ തെരഞ്ഞെടുപ്പിലെ ഫലം എൽഡിഎഫിന് വലിയ പാഠമാണെന്നും അദ്ദേഹം കൂട്ടിച്ചേർത്തു.

ജനവിഭാഗങ്ങൾ എൽഡിഎഫിൽ നിന്ന് അകലാനുണ്ടായ സാഹചര്യം വിശദമായി പരിശോധിക്കണം. മൂന്നാം ഭരണത്തിനായി കാലവിളംബരം ഇല്ലാതെ മുന്നണി രംഗത്തിറങ്ങണമെന്നും ഭവന സന്ദർശനം ഇതിന്റെ ഭാഗമാണെന്നും ബിനോയ് വിശ്വം പറഞ്ഞു. ജനങ്ങളുമായി സത്യസന്ധമായ ആശയവിനിമയം നടത്തുകയാണ് ഏക മാർഗ്ഗം. ജനങ്ങളാണ് ഏറ്റവും വലിയവരെന്ന തിരിച്ചറിവോടെ എൽഡിഎഫ് മുന്നോട്ടുപോകണം. സി പി ഐ യോഗങ്ങളിൽ പാർട്ടിക്കും മുന്നണിക്കുമെതിരെ വിമർശനങ്ങളുണ്ടായെന്ന വാർത്തകൾ അദ്ദേഹം സ്ഥിരീകരിച്ചു. എന്നാൽ ഈ വിമർശനങ്ങളൊന്നും മുന്നണിയെ ദുർബലപ്പെടുത്താനല്ലെന്നും എൽഡിഎഫ് ശക്തിപ്പെടണമെന്ന ആഗ്രഹത്തോടെയുള്ളതാണെന്നും അദ്ദേഹം വ്യക്തമാക്കി.

തദ്ദേശ തെരഞ്ഞെടുപ്പിലെ തോൽവി അപ്രതീക്ഷിതമാണെങ്കിലും എല്ലാം അവസാനിച്ചുവെന്ന് കരുതുന്നില്ലെന്ന് ബിനോയ് വിശ്വം പറഞ്ഞു. ജനുവരി 15 മുതൽ 30 വരെ സി പി ഐ ഭവന സന്ദർശനം നടത്തും. വീടുകൾ സന്ദർശിച്ച് ജനങ്ങളുടെ അഭിപ്രായം നേരിട്ട് മനസ്സിലാക്കും. കോൺഗ്രസ് പ്രവർത്തക സമിതിയിലെ ശശി തരൂർ, ദിഗ് വിജയ് സിങ്, സൽമാൻ ഖുർഷിദ് എന്നിവർ മനസ്സുകൊണ്ട് ബിജെപിക്കാരാണെന്നും അദ്ദേഹം ആരോപിച്ചു. മതഭ്രാന്തിനോട് ഇടതുപക്ഷം ഒരിക്കലും സന്ധി ചെയ്യില്ലെന്നും ശബരിമലയിലെ സ്വത്ത് അപഹരിച്ചവരോട് വിട്ടുവീഴ്ചയുണ്ടാകില്ലെന്നും അദ്ദേഹം കൂട്ടിച്ചേർത്തു. പ്രത്യേക അന്വേഷണ സംഘത്തിന്റെ അന്വേഷണം തുടരണമെന്നും തെറ്റ് ചെയ്തവർ ശിക്ഷിക്കപ്പെടണമെന്നും അദ്ദേഹം ആവശ്യപ്പെട്ടു.

വെള്ളാപ്പള്ളി നടേശൻ സി പി ഐയെ 'ചതിയൻ ചന്തു' എന്ന് വിളിച്ചതിനും ബിനോയ് വിശ്വം രൂക്ഷമായ ഭാഷയിൽ മറുപടി നൽകി. വെള്ളാപ്പള്ളിയെ താൻ കാറിൽ കയറ്റില്ലെന്നും എൽഡിഎഫിന് മാർക്കിടാൻ അദ്ദേഹത്തെ ആരും ഏൽപ്പിച്ചിട്ടില്ലെന്നും ബിനോയ് വിശ്വം പറഞ്ഞു. വെള്ളാപ്പള്ളിയല്ല എൽഡിഎഫ്. ചതിയൻ ചന്തു പ്രയോഗം അത് പറഞ്ഞയാൾക്ക് തന്നെയാണ് ചേരുന്നത്. യഥാർത്ഥ വിശ്വാസികളുമായി ഇടതുപക്ഷം കൈകോർക്കും. വെള്ളാപ്പള്ളി യഥാർത്ഥ വിശ്വാസിയാണോ എന്ന് മാധ്യമങ്ങൾ വിലയിരുത്തട്ടെ എന്നും അദ്ദേഹം പരിഹസിച്ചു. സി പി ഐ നേതാവ് കെ പി ശങ്കരദാസിന് ഗുരുതരമായ ആരോഗ്യപ്രശ്നങ്ങളുണ്ടെന്നും അദ്ദേഹം വാർത്താസമ്മേളനത്തിൽ അറിയിച്ചു.

എൽഡിഎഫിന്റെ തെറ്റുതിരുത്തൽ നടപടികളെക്കുറിച്ച് നിങ്ങളുടെ അഭിപ്രായമെന്താണ്? വാർത്ത പങ്കുവെക്കൂ. 

Article Summary: Binoy Viswam admits people drifted from LDF, plans corrections.

#BinoyViswam #CPI #LDF #KeralaPolitics #VellappallyNatesan #Sabarimala