'രണ്ട് രാജകുമാരന്മാർ' കളത്തിൽ: ബിഹാർ പോരാട്ടത്തിന് തുടക്കം

പട്‌ന: (KVARTHA) ബിഹാർ നിയമസഭാ തെരഞ്ഞെടുപ്പിലെ ആദ്യഘട്ട വോട്ടെടുപ്പ് ആരംഭിച്ചു. 18 ജില്ലകളിൽ നിന്നുള്ള 121 മണ്ഡലങ്ങളിലേക്കാണ് ഈ ഘട്ടത്തിൽ വോട്ടെടുപ്പ് നടക്കുന്നത്.

ആദ്യഘട്ടത്തിൽ 1,314 സ്ഥാനാർത്ഥികളാണ് മത്സരരംഗത്തുള്ളത്. രാഷ്ട്രീയ ജനതാദൾ നേതാവ് തേജസ്വി യാദവ്, സാമ്രാട്ട് ചൗധരി, തേജ് പ്രതാപ് യാദവ്, മിതാലി താക്കൂർ അടക്കമുള്ള പ്രമുഖരാണ് ഈ ഘട്ടത്തിൽ ജനവിധി തേടുന്നത്. 3.75 കോടി വോട്ടർമാർ അവരുടെ സമ്മതിദാനാവകാശം വിനിയോഗിച്ച് വിധി എഴുതും.

ഒന്നാംഘട്ട പരസ്യ പ്രചാരണം പോരാട്ടത്തിൻ്റെ വീറും വാശിയും പ്രകടമാക്കിക്കൊണ്ടാണ് അവസാനിച്ചത്. പ്രധാനമന്ത്രി നരേന്ദ്രമോദി അടക്കമുള്ളവരെ കളത്തിൽ ഇറക്കിയായിരുന്നു എൻഡിഎ തെരഞ്ഞെടുപ്പ് പ്രചാരണം നടത്തിയത്. 

മഹാസഖ്യത്തിനായി കോൺഗ്രസ് നേതാവ് രാഹുൽ ഗാന്ധിയും പ്രചാരണത്തിന് എത്തിയിരുന്നു. തെരഞ്ഞെടുപ്പ് പ്രചാരണത്തിൽ ഉടനീളം മോദി-രാഹുൽ വാക്പോര് വ്യക്തമായി തെളിഞ്ഞുനിന്നിരുന്നു.

രാഹുൽ ഗാന്ധിയേയും തേജസ്വി യാദവിനെയും ലക്ഷ്യംവെച്ചായിരുന്നു പ്രധാനമന്ത്രിയുടെ പ്രതികരണങ്ങൾ. രാഹുലും തേജസ്വിയും കോടികളുടെ അഴിമതി നടത്തിയതായി നരേന്ദ്രമോദി ആരോപിച്ചിരുന്നു. 

കൂടാതെ, തെരഞ്ഞെടുപ്പിൽ 'രണ്ട് രാജകുമാരന്മാർ കറങ്ങി നടക്കുകയാണെ'ന്നും അദ്ദേഹം പരിഹസിച്ചു. രാഹുൽ ഗാന്ധി ഛഠ് പൂജയെ അപമാനിച്ചു എന്നതായിരുന്നു മോദിയുടെ മറ്റൊരു ആരോപണം. 

വോട്ട് മോഷണം അടക്കമുള്ള ഗുരുതരമായ ആരോപണങ്ങൾ ഉയർത്തിയായിരുന്നു രാഹുൽ ഗാന്ധി പ്രചാരണം നയിച്ചത്. ഒരു ഘട്ടത്തിൽ പ്രധാനമന്ത്രി മോദി 'വ്യാജഡിഗ്രിക്കാരനാണെ'ന്നും രാഹുൽ പറഞ്ഞിരുന്നു.

വൻ പ്രഖ്യാപനങ്ങൾ അടങ്ങുന്ന പ്രകടന പത്രികകളാണ് എൻഡിഎയും മഹാസഖ്യവും പുറത്തിറക്കിയിരുന്നത്. 25 വാഗ്ദാനങ്ങൾ ഉൾപ്പെടുത്തി 69 പേജുള്ള പ്രകടന പത്രികയാണ് എൻഡിഎ പുറത്തിറക്കിയിരുന്നത്. ഒരു കോടി യുവാക്കൾക്ക് സർക്കാർ ജോലി, സ്ത്രീകൾക്കായി പ്രത്യേക നൈപുണ്യ വികസന പദ്ധതികൾ തുടങ്ങി വൻ പ്രഖ്യാപനങ്ങളാണ് എൻഡിഎയുടെ പ്രകടനപത്രികയിൽ ഉൾപ്പെടുത്തിയിരുന്നത്.

ഓരോ വീട്ടിലും ഒരു സർക്കാർ ജോലി എന്നതായിരുന്നു മഹാസഖ്യത്തിൻ്റെ പ്രധാന വാഗ്ദാനം. രാഷ്ട്രീയ ജനതാദൾ നേതാവ് തേജസ്വി യാദവ് നേരത്തെ നടത്തിയ പ്രഖ്യാപനമാണ് മഹാസഖ്യം അവരുടെ പ്രകടന പത്രികയിലും ഉൾപ്പെടുത്തിയത്.

ഈ തെരഞ്ഞെടുപ്പ് വാർത്തയെക്കുറിച്ച് നിങ്ങളുടെ അഭിപ്രായം താഴെ കമൻ്റ് ചെയ്യുക. 

Article Summary: First phase of Bihar Assembly election begins, featuring major leaders and intense campaign rhetoric.

#BiharElections #PhaseOne #TejashwiYadav #NarendraModi #RahulGandhi #BiharPolitics