ന്യൂഡൽഹി: (KVARTHA) വരാനിരിക്കുന്ന ഡൽഹി നിയമസഭാ തിരഞ്ഞെടുപ്പിനുള്ള നാലാമത്തെയും അവസാനത്തെയും സ്ഥാനാർത്ഥി പട്ടിക ആം ആദ്മി പാർട്ടി (എഎപി) പുറത്തിറക്കി. പല മുതിർന്ന നേതാക്കളുടെ പേരുകളും ഈ പട്ടികയിൽ ഉൾപ്പെടുന്നു എന്നതാണ് പ്രത്യേകത. ആം ആദ്മി പാർട്ടി തലവനും മുൻ ഡൽഹി മുഖ്യമന്ത്രിയുമായ അരവിന്ദ് കേജ്‌രിവാൾ ന്യൂഡൽഹി സീറ്റിൽ നിന്ന് മത്സരിക്കും. മുഖ്യമന്ത്രി അതിഷി കൽക്കാജി സീറ്റിൽ മത്സരിക്കും

നാലാമത്തെ പട്ടികയിൽ ആകെ 38 സ്ഥാനാർത്ഥികളെ പ്രഖ്യാപിച്ചു, അതിൽ 36 പേർ സിറ്റിംഗ് എംഎൽഎമാരാണ്. ഗ്രേറ്റർ കൈലാഷിൽ ആരോഗ്യമന്ത്രി സൗരഭ് ഭരദ്വാജ്, ബാബർപൂരിൽ ഗോപാൽ റായ്, മാളവ്യ നഗറിൽ സോമനാഥ് ഭാരതി, രജീന്ദറിൽ  ദുർഗേഷ് പഥക്, ബല്ലിമാരനിൽ ഇമ്രാൻ ഹുസൈൻ എന്നിവരാണ് പട്ടികയിലുള്ളത്. കള്ളപ്പണം വെളുപ്പിക്കൽ കേസിൽ ജയിലിൽ കഴിയുന്ന സത്യേന്ദർ ജെയിൻ വീണ്ടും ഷക്കൂർബസ്തി മണ്ഡലത്തിൽ മത്സരിക്കും.

എഎപി എംഎൽഎ നരേഷ് ബല്യൻ്റെ ഭാര്യ പൂജ ബല്യന് ഉത്തം നഗർ സീറ്റിൽ നൽകിയിട്ടുണ്ട്. കൊള്ളപ്പലിശ കേസില്‍ ഗുണ്ടാ സംഘവുമായി ബന്ധമുണ്ടെന്ന ആരോപണത്തില്‍ ഈ മാസം ആദ്യം ബല്യനെ അറസ്റ്റ് ചെയ്തിരുന്നു. നരേഷ് യാദവിന് വീണ്ടും മെഹ്‌റൗളി സീറ്റ് പാർട്ടി നൽകിയിട്ടുണ്ട്. ഖുർആൻ അവഹേളന കേസിൽ യാദവിന് പഞ്ചാബ് കോടതി അടുത്തിടെ ശിക്ഷ വിധിച്ചിരുന്നു.

എഎപി, കസ്തൂർബാ നഗറിലെ സിറ്റിംഗ് എംഎൽഎയായ മദൻ ലാലിനെ ഒഴിവാക്കി, ബിജെപിയിൽ നിന്ന് എഎപിയിൽ ചേർന്ന രമേഷ് പെഹൽവാന് സീറ്റ് നൽകി. ആദ്യ പട്ടികയിൽ 11 സ്ഥാനാർത്ഥികളെയും രണ്ടാം പട്ടികയിൽ 20 സ്ഥാനാർത്ഥികളെയും മൂന്നാമത്തെ പട്ടികയിൽ ഒരു സ്ഥാനാർത്ഥിയെയും എഎപി പ്രഖ്യാപിച്ചിരുന്നു. ഇതോടെ മുഴുവൻ മണ്ഡലങ്ങളിലേക്കുള്ള എഎപി സ്ഥാനാർഥികളുമായി. പാർട്ടി പ്രഖ്യാപിച്ച പട്ടികയിൽ ഇതുവരെ 17 സിറ്റിങ് എംഎൽഎമാരെ ഒഴിവാക്കിയിട്ടുണ്ട്.

അടുത്ത വർഷം ഫെബ്രുവരിയിലാണ് ഡൽഹി നിയമസഭയിലെ 70 സീറ്റുകളിലേക്ക് തിരഞ്ഞെടുപ്പ് നടക്കുക. ആം ആദ്മി പാർട്ടി ഒരുക്കങ്ങളിൽ പൂർണ ആവേശത്തോടെയാണ് പ്രവർത്തിക്കുന്നത്. ഡൽഹി നിയമസഭാ തിരഞ്ഞെടുപ്പ് തീയതികൾ ഇതുവരെ പ്രഖ്യാപിച്ചിട്ടില്ല. കഴിഞ്ഞ നിയമസഭാ തെരഞ്ഞെടുപ്പിൽ 70ൽ 62 സീറ്റുകൾ നേടി ആം ആദ്മി പാർട്ടി വൻ വിജയം നേടിയപ്പോൾ ബാക്കി എട്ട് സീറ്റുകൾ ബിജെപി സ്വന്തമാക്കി.

#AAP, #DelhiElections2024, #Kejriwal, #Atishi, #SatyendarJain, #ElectionCandidates