കാസർകോട്: (KVARTHA) കേരള-കർണാടക അതിർത്തി പ്രദേശമായ തലപ്പാടിയിൽ നടന്ന കെഎസ്ആർടിസി ബസ് അപകടത്തിൽ മരണസംഖ്യ ആറായി ഉയർന്നു. നിയന്ത്രണം വിട്ട കർണാടക കെഎസ്ആർടിസി ബസ് ബസ് കാത്തിരിപ്പ് കേന്ദ്രത്തിലേക്ക് ഇടിച്ചുകയറിയാണ് ഈ ദാരുണ അപകടം സംഭവിച്ചത്. മൂന്ന് സ്ത്രീകളും ഓട്ടോ ഡ്രൈവറും ഓട്ടോയിലുണ്ടായിരുന്ന ഒരു പെൺകുട്ടിയും ഉൾപ്പെടെ ആറ് പേരാണ് മരിച്ചത്. ഗുരുതരമായി പരിക്കേറ്റ മൂന്ന് പേരുടെ നില അതീവ ഗുരുതരമായി തുടരുകയാണ്.

വ്യാഴാഴ്ച ഉച്ചയ്ക്ക് 1.45-ഓടെയാണ് അപകടം നടന്നത്. മംഗലാപുരത്തുനിന്ന് കാസർകോടേക്ക് അമിത വേഗതയിൽ വന്ന കെഎസ്ആർടിസി ബസിൻ്റെ ബ്രേക്ക് പൊട്ടിയതാണ് അപകടത്തിന് കാരണമായതെന്നാണ് പ്രാഥമിക നിഗമനം. നിയന്ത്രണം നഷ്ടപ്പെട്ട ബസ് ആദ്യം ഒരു ഓട്ടോറിക്ഷയിലിടിച്ച ശേഷമാണ് കാത്തിരിപ്പ് കേന്ദ്രത്തിലേക്ക് പാഞ്ഞുകയറിയത്.

അപകടത്തിൽ തകർന്ന ഓട്ടോറിക്ഷയിലുണ്ടായിരുന്ന അജിനാട്‌കോ, കോട്ടേകാര്‍ സ്വദേശിയായ ഓട്ടോ ഡ്രൈവര്‍ അലി എന്ന ഹൈദര്‍ അലി (47), പയരൂര് അബ്ദുള്‍ ഖാദറിന്റെ ഭാര്യ അവ്വമ്മ (നഫീസയുടെ അമ്മ), അജിനാട്‌കോ കോട്ടേകാര്‍ സ്വദേശിനി ഖദീജ - (60), ഷാഹുല്‍ ഹമീദിന്റെ മകള്‍ ഹസ്‌ന എഫ് (11), മുഹമ്മദിന്റെ ഭാര്യ നഫീസ (52), നഫീസയുടെ മകള്‍ ആയിഷ ഫിദ (19) എന്നിവരാണ് മരിച്ചത്. പരിക്കേറ്റ നിരവധി പേരെ ഉടൻതന്നെ മംഗളൂരുവിലെ വിവിധ ആശുപത്രികളിൽ പ്രവേശിപ്പിച്ചു.

അപകടവിവരമറിഞ്ഞ് സ്ഥലത്തെത്തിയ മഞ്ചേശ്വരം പോലീസ് രക്ഷാപ്രവർത്തനങ്ങൾക്ക് നേതൃത്വം നൽകി. പോലീസിൻ്റെയും നാട്ടുകാരുടെയും സഹായത്തോടെ മൃതദേഹങ്ങൾ മഞ്ചേശ്വരം താലൂക്ക് ആശുപത്രി മോർച്ചറിയിലേക്കും മംഗളൂരു, ദർളകട്ട എന്നിവിടങ്ങളിലെ ആശുപത്രി മോർച്ചറികളിലേക്കും മാറ്റി.

അപകടത്തെ തുടർന്ന് ദേശീയപാതയിൽ വലിയ ഗതാഗതക്കുരുക്ക് രൂപപ്പെട്ടു. പോലീസ് ഗതാഗതം നിയന്ത്രിക്കാനുള്ള നടപടികൾ സ്വീകരിച്ചു. അപകടത്തിൻ്റെ യഥാർത്ഥ കാരണം കണ്ടെത്താൻ പോലീസ് വിശദമായ അന്വേഷണം ആരംഭിച്ചിട്ടുണ്ട്.

ഇത്തരം അപകടങ്ങൾ ഒഴിവാക്കാൻ ഡ്രൈവർമാർ എന്തെല്ലാം ശ്രദ്ധിക്കണം? നിങ്ങളുടെ അഭിപ്രായം പങ്കുവയ്ക്കുക.

Article Summary: Six killed in bus-auto rickshaw collision in Thalappady.

#Thalappady #RoadAccident #Kerala #Karnataka #Tragedy #RoadSafety