Farewell | സീതാറാം യെച്ചൂരിക്ക് അവസാന യാത്രയപ്പ്; 11 മണിക്ക് എകെജി ഭവനില് പൊതുദര്ശനം
ADVERTISEMENT
● രാഷ്ട്രീയ പാര്ട്ടി നേതാക്കളും പൊതുജനങ്ങളും ആദരാഞ്ജലികള് ആര്പ്പിക്കും.
● ഉച്ചയോടെ മൃതദേഹം വിലാപയാത്രയായി 14 അശോക് റോഡ് വരെ കൊണ്ടുപോകും.
ദില്ലി: (KVARTHA) അന്തരിച്ച സിപിഎം ജനറല് സെക്രട്ടറി സീതാറാം യെച്ചൂരിക്ക് (Sitaram Yechury) രാജ്യതലസ്ഥാനം അവസാന യാത്രയപ്പ് നല്കും. യെച്ചൂരിയുടെ വസതിയില് എത്തിച്ച മൃതശരീരം രാവിലെ 11 മണിക്ക് സിപിഎം ദേശീയ ആസ്ഥാനമായ എകെജി ഭവനില് പൊതുദര്ശനത്തിന് വെയ്ക്കും. വിവിധ രാഷ്ട്രീയ പാര്ട്ടി നേതാക്കളും പൊതുജനങ്ങളും യെച്ചൂരിക്ക് ആദരാഞ്ജലികള് ആര്പ്പിക്കും. എകെജി സെന്ററില് നിന്ന് ഉച്ചയോടെ 14 അശോക റോഡ് വരെ വിലാപ യാത്രയായി നീങ്ങും. തുടര്ന്ന് വൈകീട്ട് അഞ്ച് മണിയോടെ മൃതദേഹം വിദ്യാര്ഥികളുടെ മെഡിക്കല് പഠനത്തിനായി ദില്ലി എംയിസിന് കൈമാറും.
മൂന്നു തവണ വിദ്യാര്ഥി യൂണിയന് പ്രസിഡന്റായിരുന്ന ജവാഹര് ലാല് നെഹ്റു സര്വകലാശാല ക്യാംപസില്നിന്ന് അവസാന റെഡ് സല്യൂട്ട് ഏറ്റുവാങ്ങാന് ഇന്നലെ വൈകിട്ട് 4.56ന് സീതാറാം യച്ചൂരിയെ എത്തിച്ചു. ഓഡിറ്റോറിയത്തിന് നടുവില് ചുവന്ന റോസാദളങ്ങള് വിതറിയ വെള്ള വിരിപ്പിലേക്കെടുത്തു വച്ചപ്പോള് മുദ്രാവാക്യങ്ങള് മുഴങ്ങി. വൈകിട്ട് ആറിനാണ് ഡല്ഹി വസന്ത്കുഞ്ചിലെ വീട്ടില് പൊതുദര്ശനത്തിനെത്തിച്ചത്.
ശ്വാസകോശ അണുബാധയെ തുടര്ന്ന് കഴിഞ്ഞമാസം 19 മുതല് എയിംസില് ചികിത്സയിലായിരുന്നു. ദില്ലി എയിംസില് ചികിത്സയിലിരിക്കെ നില വഷളായതോടെയായിരുന്നു സീതാറാം യെച്ചൂരിയുടെ മരണം. ആന്ധ്രാപ്രദേശിലെ കിഴക്കന് ഗോദാവരി സ്വദേശിയായ സീതാറം യെച്ചൂരി 1952 ഓഗസ്റ്റ് 12-ന് മദ്രാസിലാണ് ജനിച്ചത്. സര്വേശ്വര സോമയാജി യെച്ചൂരിയുടെയും ഭാര്യ കല്പികയുടെയും മകനായിരുന്നു. ദില്ലി സെന്റ് സ്റ്റീഫന്സ് കോളേജില് നിന്ന് സാമ്പത്തിക ശാസ്ത്രത്തില് ബിരുദം നേടിയ ഇദ്ദേഹം ജെ.എന്.യുവില് നിന്ന് സാമ്പത്തിക ശാസ്ത്രത്തില് ബിരുദാനന്തര ബിരുദം നേടി. ജെ.എന്.യുവില് വച്ച് കമ്മ്യൂണിസ്റ്റ് പാര്ട്ടിയില് ആകൃഷ്ടനായി. 1974-ല് എസ്എഫ്ഐയില് അംഗമായി. മൂന്നുവട്ടം ജെ.എന്.യു സര്വകലാശാല യൂണിയന് പ്രസിഡന്റായി. ജെഎന്യുവില് പിഎച്ച്ഡിക്ക് ചേര്ന്നെങ്കിലും അടിയന്തരാവസ്ഥക്കാലത്തെ ഒളിവുജീവിതം മൂലം പൂര്ത്തിയാക്കാനായില്ല.
അടിയന്തിരാവസ്ഥ കാലത്ത് 1975-ല് അദ്ദേഹം അറസ്റ്റിലായി. 1978-ല് എസ്എഫ്ഐയുടെ ദേശീയ ജോയിന്റ് സെക്രട്ടറിയായി തെരഞ്ഞെടുക്കപ്പെട്ടു. 1986-ല് എസ്എഫ്ഐ ദേശീയ പ്രസിഡന്റായി. 1984-ല് 32ാം വയസ്സിലാണ് സിപിഎം കേന്ദ്രക്കമ്മിറ്റി അംഗമായത്. 1988-ല് തിരുവനന്തപുരത്ത് നടന്ന പാര്ട്ടി കോണ്ഗ്രസില് കേന്ദ്ര സെക്രട്ടേറിയേറ്റ് അംഗമായി. 1992-ല് മദ്രാസില് നടന്ന പാര്ട്ടി കോണ്ഗ്രസില് പൊളിറ്റ് ബ്യൂറോ അംഗമായി.
#SitaramYechury #CPI-M #AKGBhavan #DelhiAIIMS #PublicViewing #Farewell
