മോസ്‌കോ: (KVARTHA) റഷ്യയുടെ മുൻ ഗതാഗത മന്ത്രി റൊമാൻ സ്റ്ററോവോയിറ്റിനെ (53) കാറിനുള്ളിൽ മരിച്ച നിലയിൽ കണ്ടെത്തി. മന്ത്രിസ്ഥാനത്തുനിന്ന് റഷ്യൻ പ്രസിഡൻ്റ് വ്ളാഡിമിർ പുടിൻ പുറത്താക്കി മണിക്കൂറുകൾക്കുള്ളിലാണ് റൊമാൻ സ്റ്ററോവോയിറ്റിനെ മരിച്ച നിലയിൽ കണ്ടെത്തിയതെന്ന് റഷ്യൻ വാർത്താ ഏജൻസികൾ റിപ്പോർട്ട് ചെയ്തു. റൊമാൻ സ്റ്ററോവോയിറ്റിനെ പുറത്താക്കിയതിനു പിന്നാലെ നൊവ്ഗൊരോഡ് മേഖലയുടെ ഗവർണറായിരുന്ന ആൻഡ്രി നികിറ്റിനെ ഇടക്കാല ഗതാഗത മന്ത്രിയായി നിയമിച്ചിരുന്നു.

സ്ഥാനചലനത്തിന് പിന്നിൽ

റഷ്യ-യുക്രെയ്ൻ യുദ്ധത്തിനിടെ ഡ്രോൺ ആക്രമണ ഭീഷണി നിലനിന്നിരുന്നു. ഇതേത്തുടർന്ന് ജൂലൈ അഞ്ച്, ആറ് തീയതികളിൽ മുന്നൂറോളം റഷ്യൻ വിമാനങ്ങൾ റദ്ദാക്കി. ഇതോടെ രാജ്യത്ത് യാത്രാ ബുദ്ധിമുട്ടുകൾ നേരിട്ടെന്ന പേരിലാണ് റൊമാൻ സ്റ്ററോവോയിറ്റിനെ തൽസ്ഥാനത്തുനിന്ന് പുടിൻ നീക്കം ചെയ്തത് എന്നാണ് റിപ്പോർട്ട്.

ഔദ്യോഗിക ജീവിതവും വിവാദങ്ങളും

2024 മേയിലാണ് റൊമാൻ സ്റ്ററോവോയിറ്റ് റഷ്യയുടെ ഗതാഗത മന്ത്രിയായി സ്ഥാനമേറ്റത്. ഗതാഗത മന്ത്രിയായി സ്ഥാനമേൽക്കുന്നതിനു മുൻപ് അഞ്ചുവർഷത്തോളം കുർസ്കിലെ ഗവർണറായി സേവനമനുഷ്ഠിച്ചിട്ടുണ്ട്. മന്ത്രിസ്ഥാനത്തുനിന്ന് നീക്കം ചെയ്യുന്നുവെന്ന ഉത്തരവ് റഷ്യയുടെ ലീഗൽ ഇൻഫർമേഷൻ പോർട്ടലിൽ പ്രസിദ്ധീകരിച്ചിട്ടുണ്ടെങ്കിലും കാരണം വ്യക്തമാക്കിയിട്ടില്ല.

റഷ്യയുടെ വ്യോമയാന മേഖലയ്ക്ക് പുറമെ ഷിപ്പിങ് മേഖലകളിലെ പ്രശ്നങ്ങളും റൊമാൻ്റെ മന്ത്രിസ്ഥാനം നഷ്ടപ്പെടുന്നതിനു കാരണമായിട്ടുണ്ടെന്നാണ് റിപ്പോർട്ട്. അതേസമയം, കുർസ്കിലെ അഴിമതിയുമായി ബന്ധപ്പെട്ട കാരണങ്ങളാണ് റൊമാന് മന്ത്രിസ്ഥാനം നഷ്ടമായതെന്നും വാദങ്ങളുണ്ട്.

ഇത്തരം സാഹചര്യങ്ങൾ ഒരു രാജ്യത്തിന്റെ പ്രതിച്ഛായയെ എങ്ങനെ ബാധിക്കും? നിങ്ങളുടെ അഭിപ്രായം പങ്കുവെക്കുക.

Article Summary: Ex-Russian Transport Minister Roman Starovoit found dead after Putin's dismissal.

#Russia #RussianPolitics #MysteriousDeath #Putin #FormerMinister #BreakingNews