ആശുപത്രിയിൽ നിന്ന് മടങ്ങവേ ദാരുണന്ത്യം: ബിഎംഡബ്ല്യു കാറിടിച്ച് പിഞ്ചുകുഞ്ഞ് മരിച്ചു

നോയിഡ: (KVARTHA) ഉത്തർപ്രദേശിലെ നോയിഡയിൽ ഒരു ബിഎംഡബ്ല്യു കാർ സ്‌കൂട്ടറിലിടിച്ച് അഞ്ചുവയസ്സുകാരിക്ക് ദാരുണാന്ത്യം. അപകടത്തിൽ ഗുരുതരമായി പരിക്കേറ്റ രണ്ട് പേർ ചികിത്സയിലാണ്. കഴിഞ്ഞ ശനിയാഴ്ച രാത്രി 12:20 ഓടെ നോയിഡയിലെ ഒരു ആശുപത്രിക്ക് സമീപമാണ് നാടിനെ നടുക്കിയ അപകടം നടന്നത്.

ഹോണ്ട ആക്‌ടിവ സ്‌കൂട്ടറിൽ ആശുപത്രിയിൽ നിന്ന് മടങ്ങുകയായിരുന്ന ഗുൽ മുഹമ്മദ്, മകൾ ആയത്, ബന്ധുവായ രാജ എന്നിവരെയാണ് ബിഎംഡബ്ല്യു കാർ ഇടിച്ചത്. അപകടത്തിൽ സ്‌കൂട്ടർ യാത്രികരായ മൂന്നുപേർക്കും സാരമായി പരിക്കേറ്റു. തലയ്ക്ക് ഗുരുതരമായി പരിക്കേറ്റ അഞ്ചുവയസ്സുകാരി ആയത് സംഭവസ്ഥലത്തുവെച്ചുതന്നെ മരണപ്പെട്ടു. പരിക്കേറ്റ ഗുൽ മുഹമ്മദും രാജയും നിലവിൽ ആശുപത്രിയിൽ ചികിത്സയിലാണ്.

അപകടം നടന്നയുടൻ കാർ ഉപേക്ഷിച്ച് കടന്നുകളഞ്ഞ ഡ്രൈവറെ പിന്നീട് പോലീസ് അറസ്റ്റ് ചെയ്തു. കാറിന്റെ രജിസ്ട്രേഷൻ നമ്പർ കേന്ദ്രീകരിച്ച് നടത്തിയ അന്വേഷണത്തിലാണ് യാഷ് ശർമ്മ (22), അഭിഷേക് റാവത്ത് എന്നിവരെ പോലീസ് അറസ്റ്റ് ചെയ്തത്. ഇവരിൽ യാഷ് ശർമ്മയാണ് അപകടസമയത്ത് വാഹനമോടിച്ചിരുന്നതെന്ന് പോലീസ് സ്ഥിരീകരിച്ചു.

കുട്ടിയുടെ അസുഖത്തെ തുടർന്ന് ഡോക്ടറെ കാണിക്കാനാണ് ഗുൽ മുഹമ്മദ് മകളോടൊപ്പം ആശുപത്രിയിലെത്തിയതെന്നും, ചികിത്സ കഴിഞ്ഞ് മടങ്ങുമ്പോളാണ് അപകടം സംഭവിച്ചതെന്നും പോലീസ് അറിയിച്ചു. ഭാരതീയ ന്യായ സംഹിത പ്രകാരം സെക്ഷൻ 281, 125, 106(1) വകുപ്പുകൾ പ്രകാരം പോലീസ് കേസെടുത്ത് കൂടുതൽ അന്വേഷണം നടത്തിവരികയാണ്.

നോയിഡയിലെ ഈ ദാരുണമായ അപകടത്തെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Five-year-old Ayath died in Noida after a BMW hit their scooter while returning from hospital.

#NoidaAccident #RoadSafety #Tragedy #BMWAccident #ChildSafety #UttarPradesh