ബറേലി: (KVARTHA) കുളിക്കാന്‍ കയറിയ നവവധു വെള്ളം ചൂടാക്കുന്ന ഗീസര്‍ (Geyser Explosion) പൊട്ടിത്തെറിച്ച് മരിച്ചു. ഉത്തര്‍പ്രദേശിലെ ബറേലിയിലെ മിര്‍ഗഞ്ചിലാണ് സംഭവം. ബുലന്ദ്ഷഹറിലെ കാലേ കാ നഗ്ല ഗ്രാമത്തില്‍ നിന്നുള്ള ദാമിനിയാണ് മരിച്ചത്. ഭോജിപുര സ്വദേശിയായ ദീപക് യാദവുമായി വിവാഹം കഴിഞ്ഞ് അഞ്ച് ദിവസം മാത്രമായപ്പോഴാണ് യുവതിക്ക് ദാരുണ അപകടം സംഭവിച്ചത്. 

നവംബര്‍ 22 നാണ് ദാമിനിയും ദീപക് യാദവും വിവാഹിതരായത്. ബുധനാഴ്ച വൈകിട്ട് കുളിക്കാനായി കുളിമുറിയില്‍ കയറിയ ദാമിനി ഏറെ നേരം കഴിഞ്ഞിട്ടും പുറത്തിറങ്ങിയില്ലെന്ന് വീട്ടുകാര്‍ പറയുന്നു. ആശങ്കയിലായ ഭര്‍ത്താവും വീട്ടുകാരും പലതവണ വിളിച്ചെങ്കിലും മറുപടിയുണ്ടായില്ല. തുടര്‍ന്ന് കുളിമുറിയുടെ വാതില്‍ തകര്‍ത്ത് അകത്ത് കടന്നപ്പോള്‍ യുവതി നിലത്ത് പരുക്കേറ്റ് അബോധാവസ്ഥയില്‍ കിടക്കുന്നതാണ് കണ്ടതെന്ന് വീട്ടുകാര്‍ പറഞ്ഞു. കുളിമുറിയിലെ ഗീസര്‍ പൊട്ടിത്തെറിച്ച നിലയിലായിരുന്നുവെന്നും കുടുംബം പറഞ്ഞു. 

ഉടന്‍ തന്നെ വീട്ടുകാര്‍ യുവതിയെ ആശുപത്രിയിലെത്തിച്ചെങ്കിലും അപ്പോഴേക്കും മരണം സംഭവിച്ചിരുന്നുവെന്ന് ഡോക്ടര്‍മാര്‍ അറിയിച്ചു. സംഭവം പൊലീസില്‍ അറിയിക്കുകയും മൃതദേഹം പോസ്റ്റുമോര്‍ട്ടത്തിന് അയക്കുകയും ചെയ്തു. ഗീസര്‍ സ്ഫോടനത്തിന്റെ കാരണം ഇതുവരെ വ്യക്തമായിട്ടില്ല. സംഭവത്തില്‍ പൊലീസ് കേസെടുത്ത് അന്വേഷണം നടത്തിവരികയാണ്.

#accident #geyserexplosion #tragedy #india #news