തിരുവനന്തപുരം: (KVARTHA) കേരള കേഡർ എഡിജിപിയും മുൻ എക്‌സൈസ് കമ്മീഷണറുമായിരുന്ന മഹിപാൽ യാദവ് അന്തരിച്ചു. ബ്രെയിൻ ട്യൂമർ ബാധിച്ച് ചികിത്സയിലായിരുന്ന അദ്ദേഹത്തിന്റെ അന്ത്യം രാജസ്ഥാനിൽ വെച്ചായിരുന്നു. ബുധനാഴ്ച (27.08.2025) പോലീസ് ആസ്ഥാനത്ത് വിരമിക്കൽ ചടങ്ങ് നടക്കാനിരിക്കെയാണ് ഈ അപ്രതീക്ഷിത മരണം. ഈ മാസം 30-നാണ് അദ്ദേഹത്തിന് ഔദ്യോഗികമായി വിരമിക്കേണ്ടിയിരുന്നത്.

കേരളത്തിലെ പ്രധാന ചുമതലകൾ

കേരള പോലീസ് ക്രൈംസ് എഡിജിപി ആയി സേവനമനുഷ്ഠിച്ചുവരികയായിരുന്ന മഹിപാൽ യാദവ്, അതിനുമുമ്പ് രണ്ടു വർഷം കേരള എക്‌സൈസ് കമ്മീഷണറായും പ്രവർത്തിച്ചിരുന്നു. ഇക്കഴിഞ്ഞ ജൂലൈ മാസത്തിലാണ് അദ്ദേഹത്തെ ക്രൈംസ് എഡിജിപി ആയി നിയമിച്ചത്. 1997 ഐ.പി.എസ് ബാച്ച് ഉദ്യോഗസ്ഥനാണ്.

എക്‌സൈസ് കമ്മീഷണർ, എറണാകുളം റേഞ്ച് ഐ.ജി., കേരള ബിവറേജസ് കോർപ്പറേഷൻ എം.ഡി. തുടങ്ങിയ നിലകളിലും അദ്ദേഹം പ്രവർത്തിച്ചിട്ടുണ്ട്. 2013-ൽ രാഷ്ട്രപതിയുടെ വിശിഷ്ട സേവനത്തിനുള്ള പോലീസ് മെഡലും അദ്ദേഹത്തിന് ലഭിച്ചിട്ടുണ്ട്.

സിബിഐയിലെ പ്രധാന കേസുകൾ

രാജസ്ഥാൻ ആൾവാർ സ്വദേശിയായ മഹിപാൽ യാദവ് സിബിഐയിൽ ഡെപ്യൂട്ടേഷനിൽ സേവനമനുഷ്ഠിച്ചിട്ടുണ്ട്. ആ സമയത്ത് അഗസ്റ്റ വെസ്റ്റ്‌ലാൻഡ് ഹെലികോപ്റ്റർ അഴിമതിക്കേസ്, സമാജ്‌വാദി പാർട്ടി നേതാവ് മുലായം സിങ് യാദവിൻ്റെ അനധികൃത സ്വത്ത് കേസ് എന്നിവയിൽ അന്വേഷണം നടത്തിയിരുന്നു. 2018 മുതൽ അതിർത്തി രക്ഷാ സേനയിൽ (ബിഎസ്എഫ്) ഇൻസ്പെക്ടർ ജനറൽ (ഐജി) ആയി സേവനമനുഷ്ഠിച്ചിട്ടുണ്ട്.
 

മുഖ്യമന്ത്രിയുടെ അനുശോചനം

എക്‌സൈസ് കമ്മീഷണറായിരുന്ന അഡീഷണൽ ഡയറക്ടർ ജനറൽ ഓഫ് പോലീസ് മഹിപാൽ യാദവിൻ്റെ  വിയോഗം അങ്ങേയറ്റം ദുഃഖകരമാണ്. ഇന്ന് വിരമിക്കൽ ചടങ്ങ് നടക്കാനിരിക്കെയാണ് അദ്ദേഹം അന്തരിച്ചത്. 

സ്തുത്യർഹമായ തന്റെ ഔദ്യോഗിക ജീവിതത്തിലുടനീളം സത്യസന്ധതയും ജനങ്ങളോടുള്ള പ്രതിബദ്ധതയും പുലർത്തിയ ഉദ്യോഗസ്ഥനായിരുന്നു മഹിപാൽ യാദവ്. 

സംസ്ഥാന സർക്കാരിന്റെ നയങ്ങളും പ്രവർത്തനങ്ങളും വിട്ടുവീഴ്ചയില്ലാതെ നടപ്പാക്കാൻ അദ്ദേഹത്തിനു സാധിച്ചിരുന്നു. തന്റെ ആത്മാർത്ഥയിലൂടെയും നേതൃപാടവത്തിലൂടെയും എന്നും അനുകരണീയ മാതൃകയായി അദ്ദേഹം നിലകൊണ്ടു. മഹിപാൽ യാദവിന്റെ മരണത്തിൽ അനുശോചനം രേഖപ്പെടുത്തുന്നു. അദ്ദേഹത്തിന്റെ കുടുംബത്തിന്റേയും ഉറ്റവരുടേയും ദുഃഖത്തിൽ പങ്കു ചേരുന്നു.

മഹിപാൽ യാദവിനെക്കുറിച്ചുള്ള ഓർമ്മകൾ പങ്കുവെക്കാമോ? വാർത്ത സുഹൃത്തുക്കളുമായി ഷെയർ ചെയ്യൂ.

Article Summary: Former Kerala Excise Commissioner Mahipal Yadav dies.

#MahipalYadav #KeralaPolice #ADGP #Obituary #RIP #Kerala