പത്തനംതിട്ട: (KVARTHA) കോന്നി പയ്യനാമൺ ചെങ്കുളത്തെ പാറമടയിലുണ്ടായ വൻ അപകടത്തിൽ കാണാതായ തൊഴിലാളിയെ കണ്ടെത്താനുള്ള തിരച്ചിൽ എൻഡിആർഎഫ് സംഘം ഏറ്റെടുത്ത് തുടരുകയാണ്. തിങ്കളാഴ്ച പാറ ഇടിഞ്ഞുണ്ടായ അപകടത്തിൽ കാണാതായ രണ്ട് അതിഥി തൊഴിലാളികളിൽ ഒരാളായ ഒഡീഷ കാൺധമാൽ ജില്ലയിലെ പേട്ടപാങ്ക ലുഹുറിംഗിയ സ്വദേശി മഹാദേബ് പ്രധാന്റെ (51) മൃതദേഹം മണിക്കൂറുകൾ നീണ്ട രക്ഷാപ്രവർത്തനത്തിനൊടുവിൽ കണ്ടെത്തി. എന്നാൽ, പാറപൊട്ടിക്കുന്ന യന്ത്രത്തിന്റെ ഡ്രൈവറായിരുന്ന ബിഹാർ സിമർല ജമുയ് ഗ്രാം സിമർലിയ സ്വദേശി അജയ് കുമാർ റായിയെ (38) ഇനിയും കണ്ടെത്താനായിട്ടില്ല. പാറ ഇടിയുന്നതും പ്രതികൂല സാഹചര്യങ്ങളും രക്ഷാദൗത്യം അതീവ സങ്കീർണമാക്കുകയാണ്.

ആഴമേറിയ പാറമടയുടെ മുകൾ ഭാഗത്തുനിന്ന് മണ്ണും പാറയുമടക്കം ഇടിഞ്ഞ് പാറപൊട്ടിക്കുന്ന യന്ത്രത്തിലേക്ക് പതിച്ചാണ് അപകടമുണ്ടായത്. യന്ത്രത്തിനുള്ളിലുണ്ടായിരുന്ന തൊഴിലാളിയും സഹായിയുമാണ് അപകടത്തിൽപ്പെട്ടത്. ഉച്ചഭക്ഷണം കഴിഞ്ഞ് ഷിഫ്റ്റ് പ്രകാരം ജോലിക്ക് കയറിയവരാണ് അപകടത്തിൽപ്പെട്ടതെന്നാണ് വിവരം. തിങ്കളാഴ്ച വൈകിട്ട് 6.15-ഓടെയാണ് മറ്റൊരു യന്ത്രം എത്തിച്ച് പാറ പൊട്ടിച്ച് വഴിയൊരുക്കി അഗ്‌നിരക്ഷാസേന മൃതദേഹം കിടന്നിരുന്ന ഭാഗത്ത് എത്തിയത്. യന്ത്രമുപയോഗിച്ച് പാറ മാറ്റിയാണ് മഹാദേബിന്റെ മൃതദേഹം പുറത്തെടുത്തത്.

അപകടസ്ഥലത്ത് ഇന്നലെ വൈകുന്നേരത്തോടെ വീണ്ടും മലയിടിച്ചിൽ ഉണ്ടായതോടെ രക്ഷാദൗത്യം താൽക്കാലികമായി നിർത്തിവെച്ചിരുന്നു. ഫയർഫോഴ്‌സ് സംഘത്തിന് പുറമെ 27 അംഗ എൻ.ഡി.ആർ.എഫ് (ദേശീയ ദുരന്ത നിവാരണ സേന) സംഘവും ചൊവ്വാഴ്ച ദൗത്യത്തിന്റെ ഭാഗമായി തിരച്ചിൽ തുടരുകയാണ്. പാറ പൊട്ടിക്കലിന് മുന്നോടിയായി തട്ട് ഒരുക്കുന്നതിനിടെയാണ് ഹിറ്റാച്ചിക്ക് മുകളിലേക്ക് മലയിടിഞ്ഞ് വീണത്. അടിയിൽ പെട്ടുപോയ ഇതര സംസ്ഥാന തൊഴിലാളികളെ പുറത്തെടുക്കാൻ ഫയർഫോഴ്‌സ് സംഘത്തിന് പോലും കഴിയാത്ത സ്ഥിതിയായിരുന്നു തിങ്കളാഴ്ച.

ക്വാറിയുടെ പ്രവർത്തനം സംബന്ധിച്ച് നാട്ടുകാർ അനുമതിയില്ലാതെയാണ് പ്രവർത്തിക്കുന്നതെന്ന് ആരോപിച്ചിരുന്നു. എന്നാൽ, ക്വാറിക്ക് അടുത്ത വർഷം വരെ ലൈസൻസ് ഉണ്ടെന്ന് ജില്ലാ ഭരണകൂടം വ്യക്തമാക്കി. സംഭവത്തിൽ അടിയന്തര റിപ്പോർട്ട് സമർപ്പിക്കാൻ ജില്ലാ കളക്ടർ ജിയോളജി വകുപ്പിന് നിർദേശം നൽകിയിട്ടുണ്ട്. അളവിൽ കൂടുതൽ പാറ പൊട്ടിക്കൽ നടന്നിട്ടുണ്ടോ എന്നും പരിശോധിക്കും. ജിയോളജി വകുപ്പിന്റെ റിപ്പോർട്ട് ലഭിച്ചശേഷമായിരിക്കും സംഭവത്തിൽ തുടർനടപടി സ്വീകരിക്കുക. നിലവിൽ അപകട സാഹചര്യത്തിൽ ക്വാറിയുടെ പ്രവർത്തനം നിർത്തിവെപ്പിച്ചിരിക്കുകയാണ്.
 

എൻഡിആർഎഫ് സംഘം നടത്തുന്ന രക്ഷാപ്രവർത്തനങ്ങളെക്കുറിച്ച് നിങ്ങൾക്ക് എന്താണ് പറയാനുള്ളത്? അഭിപ്രായങ്ങൾ പങ്കുവെക്കുക.

Article Summary: One dead, one missing in Konni quarry accident; NDRF search continues.

#Konni #QuarryAccident #NDRF #KeralaTragedy #Pathanamthitta #RescueOperation