കോൺഫിഡന്റ് ഗ്രൂപ്പ് ഉടമ സി ജെ റോയിയുടെ സംസ്‌കാരം മാറ്റി; അന്വേഷണ ഏജൻസിയുടെ സമ്മർദ്ദമുണ്ടായിരുന്നെന്ന് കുടുംബം

ബെംഗളൂരു: (KVARTHA) ബെംഗളൂരിലെ ഓഫീസിൽ മരിച്ച കോൺഫിഡന്റ് ഗ്രൂപ്പ് ഉടമ സി ജെ റോയിയുടെ സംസ്‌കാരം ഞായറാഴ്ചത്തേക്ക് മാറ്റി. വിദേശത്തുള്ള ബന്ധുക്കൾക്ക് എത്തിച്ചേരാൻ സാധിക്കാത്തതിനാലാണ് നേരത്തെ നിശ്ചയിച്ചിരുന്ന സംസ്‌കാരം മാറ്റിവെച്ചത്. 

ശനിയാഴ്ച സംസ്‌കാരം നടത്താനായിരുന്നു നേരത്തെ തീരുമാനിച്ചിരുന്നത്. സഹോദരന്റെ വീട് സ്ഥിതി ചെയ്യുന്ന കോറമംഗലയിലെ ദേവാലയത്തിലാണ് അന്ത്യകർമ്മങ്ങൾ നടക്കുക. പോസ്റ്റ്മോർട്ടം നടപടികൾക്ക് ശേഷം മൃതദേഹം ബെംഗളൂരു ബോറിംഗ് ആശുപത്രിയിൽ സൂക്ഷിച്ചിരിക്കുകയാണ്. ഞായറാഴ്ച രാവിലെ 9 മണിയോടെ ആശുപത്രിയിൽ നിന്നും മൃതദേഹം കോറമംഗലയിലെത്തിക്കുമെന്ന് ബന്ധുക്കൾ അറിയിച്ചു.

ഐടി വകുപ്പിനെതിരെ ആരോപണവുമായി കുടുംബം 

സി ജെ റോയിയുടെ മരണത്തിൽ ആദായനികുതി വകുപ്പിനെതിരായ ആരോപണങ്ങളിൽ ഉറച്ചുനിൽക്കുകയാണ് കുടുംബം. അന്വേഷണ ഏജൻസിയിൽ നിന്ന് റോയിക്ക് കടുത്ത സമ്മർദ്ദമുണ്ടായിരുന്നുവെന്ന് സഹോദരൻ സി ജെ ബാബു ആരോപിച്ചു.

റോയ്ക്ക് സാമ്പത്തികമായ കടബാധ്യതകളോ മറ്റ് ഭീഷണികളോ ഒന്നുമില്ലായിരുന്നു. ആദായനികുതി ഉദ്യോഗസ്ഥരുടെ സമ്മർദ്ദം കുടുംബത്തിന് അറിയാമായിരുന്നുവെന്നും അദ്ദേഹം പറഞ്ഞു.

‘മറ്റെവിടെ നിന്നും റോയ്ക്ക് ഭീഷണിയുണ്ടായിരുന്നില്ല. ശനിയാഴ്ച രാവിലെ കാണണമെന്ന് എന്നോട് റോയ് പറഞ്ഞിരുന്നു. കഴിഞ്ഞ മൂന്നുദിവസമായി ആദായനികുതി ഉദ്യോഗസ്ഥർ ഓഫീസിലുണ്ടായിരുന്നു,’ സി ജെ ബാബു മാധ്യമങ്ങളോട് പറഞ്ഞു.

വലിയ സമ്മർദ്ദമില്ലാതെ ജീവനൊടുക്കില്ല: സുഹൃത്ത് 

ആദായനികുതിയുമായി ബന്ധപ്പെട്ട പ്രശ്‌നങ്ങൾ ഉണ്ടായിരുന്നുവെന്ന് സി ജെ റോയിയുടെ സന്തതസഹചാരി അബില്‍ ദേവും വെളിപ്പെടുത്തി. ഈ മാസം ആദ്യം മുതലാണ് ഐടിയുമായി ബന്ധപ്പെട്ട പ്രശ്‌നങ്ങൾ തുടങ്ങിയത്. 

എന്നാൽ ഇവയെല്ലാം പരിഹരിക്കാവുന്ന പ്രശ്‌നങ്ങളാണെന്നാണ് അറിഞ്ഞത്. സാധാരണ നിലയിൽ വലിയ സമ്മർദ്ദമില്ലാതെ അദ്ദേഹം മരിക്കില്ലെന്നും അബില്‍ ദേവ് പറഞ്ഞു.

വെള്ളിയാഴ്ച വൈകുന്നേരമാണ് സി ജെ റോയിയെ മരിച്ച നിലയിൽ കണ്ടെത്തിയത്. ആദായനികുതി വകുപ്പിന്റെ പരിശോധനയ്ക്കിടെ അതേ കെട്ടിടത്തിൽ തന്നെയുള്ള ഓഫീസിലെത്തി സ്വയം വെടിവെച്ച് ജീവനൊടുക്കുകയായിരുന്നു എന്നാണ് വിവരം. നേരത്തെ നടത്തിയ പരിശോധനയുടെ ബാക്കി നടപടികൾക്കായിട്ടായിരുന്നു ഉദ്യോഗസ്ഥർ വെള്ളിയാഴ്ച എത്തിയത്.

ഈ വാർത്ത വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: The funeral of Confident Group owner C.J. Roy has been postponed to Sunday due to the arrival of relatives. His family alleges that severe pressure from Income Tax officials led to his death.

#CJRoy #ConfidentGroup #Bengaluru #IncomeTax #KeralaNews #BusinessNews #CJBabu