ന്യൂഡൽഹി: (KVARTHA) ഉദ്ദംപൂർ വ്യോമതാവളത്തിന് നേരെ പാകിസ്ഥാൻ നടത്തിയ ഡ്രോൺ ആക്രമണത്തിൽ വ്യോമസേനയിലെ മെഡിക്കൽ സർജന്റായ രാജസ്ഥാൻ സ്വദേശി സുരേന്ദ്ര സിങ് മോഗ (36) വീരമൃത്യു വരിച്ചു. വെടിനിർത്തൽ പ്രഖ്യാപിക്കുന്നതിന് തൊട്ടുമുന്‍പ്, ശനിയാഴ്ച പുലർച്ചെയായിരുന്നു സംഭവം.

ഇന്ത്യയുടെ വ്യോമ പ്രതിരോധ സംവിധാനം ഡ്രോണുകൾ തകർത്തുവെങ്കിലും ഡ്യൂട്ടിയിലുണ്ടായിരുന്ന സുരേന്ദ്ര സിങ്ങിന്റെ ശരീരത്തിൽ ഡ്രോണിന്റെ അവശിഷ്ടങ്ങൾ പതിക്കുകയായിരുന്നു. ഗുരുതരമായി പരിക്കേറ്റ അദ്ദേഹത്തെ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.

14 വർഷത്തിലേറെയായി സൈന്യത്തിൽ സേവനം അനുഷ്ഠിച്ചിരുന്ന സുരേന്ദ്ര സിങ്, രണ്ടു മാസം മുൻപാണ് ഉദ്ദംപൂരിൽ എത്തിയത്. അദ്ദേഹം അവസാനമായി ജന്മസ്ഥലമായ ജുഝനു സന്ദർശിച്ചത് ഏപ്രിൽ മാസത്തിലായിരുന്നു. പുതിയ വീടിൻ്റെ താമസ ചടങ്ങിന് ശേഷം ഏപ്രിൽ 20 നാണ് അദ്ദേഹം തിരികെ ജോലിയിൽ പ്രവേശിച്ചത്. ഭാര്യ സീമയും അദ്ദേഹത്തോടൊപ്പം ഉദ്ദംപൂരിലായിരുന്നു താമസം. പത്ത് ദിവസങ്ങൾക്ക് മുൻപ് സീമയുടെ മുത്തച്ഛൻ മരിച്ചതിനെ തുടർന്ന് അവർ നാട്ടിലേക്ക് പോയിരുന്നു. സുരേന്ദ്ര സിങ്ങിന്റെ മരണവിവരം അറിഞ്ഞ് കുഴഞ്ഞുവീണ സീമയെ ആശുപത്രിയിൽ പ്രവേശിപ്പിച്ചിരിക്കുകയാണ്. വർധിക, ദക്ഷ് എന്നിവരാണ് ഇവരുടെ മക്കൾ.

സുരേന്ദ്ര സിങ്ങിൻ്റെ മരണത്തിൽ രാജസ്ഥാൻ മുഖ്യമന്ത്രി ഭജൻ ലാൽ ശർമ്മ അനുശോചനം രേഖപ്പെടുത്തി. ഞായറാഴ്ച വൈകിട്ട് മൃതദേഹം ജന്മസ്ഥലത്ത് എത്തിച്ച് ഔദ്യോഗിക ബഹുമതികളോടെ സംസ്കരിക്കുമെന്ന് സർക്കാർ അറിയിച്ചു.

ഈ ധീര ജവാന്റെ ഓർമ്മകൾക്ക് മുന്നിൽ ആദരാഞ്ജലികൾ അർപ്പിക്കുക. വാർത്ത മറ്റുള്ളവരിലേക്ക് എത്തിക്കാൻ ഷെയർ ചെയ്യുക.

Article Summary: An Indian Air Force medical sergeant, Surendra Singh Moga, hailing from Rajasthan, was martyred in a Pakistan drone attack on the Udhampur airbase in Jammu and Kashmir. The incident occurred early Saturday before the ceasefire announcement. Despite the drone being intercepted, debris struck and fatally injured him. He leaves behind his wife and two children.

#UdhampurAttack, #DroneAttack, #IndianAirForce, #Martyr, #PakistanTerrorism, #Rajasthan