ന്യൂഡൽഹി: (KVARTHA) ഇറാനിൽ കാണാതായ മൂന്ന് ഇന്ത്യൻ പൗരന്മാരെ തെഹ്‌റാൻ പോലീസ് രക്ഷപ്പെടുത്തി. ഇന്ത്യയിലെ ഇറാൻ എംബസിയാണ് പൗരന്മാരെ രക്ഷപ്പെടുത്തിയ വിവരം ഔദ്യോഗിക എക്‌സ് പേജിലൂടെ അറിയിച്ചത്. തെക്കൻ തെഹ്‌റാനിലെ വരാമിൻ പട്ടണത്തിൽ പോലീസ് നടത്തിയ ഓപ്പറേഷനിലാണ് ഇന്ത്യക്കാരെ രക്ഷപ്പെടുത്തിയതെന്ന് ഇറാനിലെ മെഹർ ന്യൂസ് ഏജൻസി (എം.എൻ.എ) റിപ്പോർട്ട് ചെയ്യുന്നു. 'കാണാതായ മൂന്ന് ഇന്ത്യൻ പൗരന്മാരെ തെഹ്‌റാൻ പോലീസ് മോചിപ്പിച്ചു. ഇറാനിൽ കാണാതായ മൂന്ന് ഇന്ത്യക്കാരെ പോലീസ് കണ്ടെത്തി വിട്ടയച്ചതായി ഇറാനിലെ പ്രാദേശിക മാധ്യമങ്ങൾ റിപ്പോർട്ട് ചെയ്യുന്നു,' - ഇറാൻ എംബസിയുടെ എക്‌സ് പോസ്റ്റിൽ പറയുന്നു.

മെയ് ഒന്നിനാണ് മൂന്ന് ഇന്ത്യൻ പൗരന്മാരെ തട്ടിക്കൊണ്ടുപോയതായി തെഹ്‌റാൻ പോലീസ് റിപ്പോർട്ട് ചെയ്തത്. പഞ്ചാബിൽ നിന്നുള്ള മൂന്നു പേരാണ് ഓസ്‌ട്രേലിയയിലേക്കുള്ള യാത്രാമധ്യേ ഇറാനിലെത്തിയത്. ഓസ്‌ട്രേലിയയിൽ മികച്ച ശമ്പളം ഇവർക്ക് പ്രാദേശിക റിക്രൂട്ടിങ് ഏജൻസി വാഗ്ദാനം ചെയ്തിരുന്നു.

Three missing Indian citizens freed by Tehran police
Local media in Iran say police have found and released three Indian men who had gone missing in Iran.https://t.co/YAkirkKRHg

— Iran in India (@Iran_in_India) June 3, 2025

എന്നാൽ, ഇറാനിൽ എത്തിയതിന് പിന്നാലെ മൂന്നു പേരെയും കാണാതാവുകയായിരുന്നു. കാണാതായവർക്കായി തിരച്ചിൽ നടക്കുന്നതായി മെയ് 29-ന് ഇന്ത്യയിലെ ഇറാൻ എംബസി ഔദ്യോഗികമായി അറിയിച്ചിരുന്നു. പൗരന്മാരെ കാണാതായ സംഭവത്തിൽ ഇറാൻ അധികൃതരുമായി നിരന്തരം ബന്ധപ്പെട്ടിരുന്നതായി വിദേശകാര്യ മന്ത്രാലയം വക്താവ് രൺധീർ ജയ്‌സ്വാൾ അറിയിച്ചു. സുരക്ഷിതരായി നാട്ടിലേക്ക് മടങ്ങാനുള്ള നടപടി സ്വീകരിക്കുമെന്നും ജയ്‌സ്വാൾ ചൂണ്ടിക്കാട്ടി.

ഇറാനിലേക്ക് പോയ ബന്ധുക്കളെ കാണാനില്ലെന്ന് കുടുംബാംഗങ്ങൾ ഇന്ത്യൻ എംബസിയെ അറിയിച്ചിരുന്നു. മൂന്നു പേരെയും കണ്ടെത്താൻ സ്വീകരിക്കുന്ന നടപടികൾ കുടുംബാംഗങ്ങളെ അറിയിച്ചിരുന്നതായും എംബസി അധികൃതർ ചൂണ്ടിക്കാട്ടി.

ഇറാനിൽ കാണാതായ ഇന്ത്യക്കാരെ രക്ഷപ്പെടുത്തിയതിനെക്കുറിച്ച് നിങ്ങളുടെ അഭിപ്രായം പങ്കുവെക്കുക. വിദേശരാജ്യങ്ങളിലെ തൊഴിൽ തട്ടിപ്പുകളെക്കുറിച്ച് കാഴ്ചപ്പാടുകൾ പങ്കുവെക്കൂ.

Article Summary: Three abducted Indians rescued in Iran; police operation successful.

#IranRescue #IndianNationals #TehranPolice #Abduction #SafeReturn #ForeignAffairs