ഡൽഹി മെട്രോ സ്റ്റേഷനുകൾ തുറന്നില്ലെങ്കിൽ ഇടപെടും; കർശന മുന്നറിയിപ്പുമായി സുപ്രീംകോടതി

ന്യൂഡൽഹി: (KVARTHA) ഡൽഹിയിലെ മെട്രോ സ്റ്റേഷനുകൾ തുറന്നില്ലെങ്കിൽ ഇടപെടുമെന്ന് സുപ്രീംകോടതി. വ്യാഴാഴ്ച (ജൂലൈ 23) ഉച്ചയോടെ സ്റ്റേഷൻ തുറന്നില്ലെങ്കിൽ അടിയന്തരമായി ഇടപെടുമെന്ന് ചീഫ് ജസ്റ്റിസ് സൂര്യകാന്ത് വ്യക്തമാക്കി. മെട്രോ സ്റ്റേഷൻ അടച്ചിട്ടതിലൂടെ സുപ്രീംകോടതി അഭിഭാഷകരും ജീവനക്കാരും വലിയ ബുദ്ധിമുട്ടുകൾ നേരിടുന്നു എന്ന് ബാർ അസോസിയേഷൻ പരാതിപ്പെട്ടതിന് പിന്നാലെയാണ് സുപ്രീംകോടതി ഇടപെട്ടത്. 

പരീക്ഷാ ക്രമക്കേടുകൾക്കെതിരെ ജന്തർ മന്ദറിൽ സിജെപി സമരം ശക്തമായതോടെയാണ് ഡൽഹിയിലെ മെട്രോ സ്റ്റേഷനുകളിൽ കർശന നിയന്ത്രണം ഏർപ്പെടുത്തിയത്. 16 മെട്രോ സ്റ്റേഷനുകളാണ് നിലവിൽ അടച്ചിട്ടിരിക്കുന്നത്.

സമരവേദിയിലേക്ക് ഒഴുകിയെത്തി യുവാക്കൾ

സമരവേദിയിലേക്ക് ആയിരക്കണക്കിന് യുവാക്കളാണ് ഒഴുകിയെത്തുന്നത്. പ്രശ്നപരിഹാരത്തിനായി കേന്ദ്രസർക്കാർ വീണ്ടും ചർച്ചയ്ക്ക് ശ്രമം നടത്തുന്നുണ്ട്. ബുധനാഴ്ചത്തെ സംഘർഷങ്ങളെ തുടർന്ന് ഡൽഹിയിൽ കൂടുതൽ കേന്ദ്രസേനയെ വിന്യസിക്കുകയും വ്യാഴാഴ്ചയും കർശന നിയന്ത്രണങ്ങൾ ഏർപ്പെടുത്തുകയും ചെയ്തു.

മെട്രോയിൽ കുടുങ്ങി മലയാളി വിദ്യാർഥികൾ

മെട്രോ സ്റ്റേഷൻ അപ്രതീക്ഷിതമായി അടച്ചതോടെ മലയാളി വിദ്യാർഥികൾ ഉൾപ്പെടെ നിരവധി പേർ കുടുങ്ങി. കാനിങ് റോഡ് കേരള സ്കൂളിലെ പത്ത് മലയാളി വിദ്യാർഥികളാണ് മണ്ഡി ഹൗസ് മെട്രോ സ്റ്റേഷനകത്ത് കുടുങ്ങിയത്. പ്രിൻസിപ്പൽ അടക്കമുള്ളവർ സ്ഥലത്തെത്തി വിദ്യാർഥികളെ പുറത്തുവിടണമെന്ന് പൊലീസിനോട് ആവശ്യപ്പെട്ടു. 

ഉന്നത പൊലീസ് ഉദ്യോഗസ്ഥരോട് അടക്കം സംസാരിച്ച ശേഷം, ഒന്നര മണിക്കൂറോളം നീണ്ട അനിശ്ചിതത്വത്തിനൊടുവിൽ വിദ്യാർഥികളെ മറ്റൊരു ഗേറ്റ് വഴി പൊലീസ് സുരക്ഷിതമായി പുറത്തിറക്കി. വിദ്യാർഥികൾക്കൊപ്പം സ്കൂളിലെ സ്റ്റാഫും ഉണ്ടായിരുന്നു.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വിശേഷങ്ങൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമന്റായി രേഖപ്പെടുത്തുക.

Article Summary: The Supreme Court warned of intervention if Delhi Metro stations, closed due to intensifying CJP student protests at Jantar Mantar that left many including Malayali students stranded, are not reopened by Thursday afternoon.

#SupremeCourt #DelhiMetro #CJPProtest #StudentProtest #DelhiPolice #KeralaSchoolDelhi #JantarMantar #DelhiNews #AmmuNews