● കോട്ടയത്ത് നിന്ന് പദയാത്ര നടത്തി കോൺഗ്രസ് സംഘടനയെ ശക്തിപ്പെടുത്തി.
● ക്വിറ്റ് ഇന്ത്യാ സമരത്തിലും ദിവാൻ സി.പി. രാമസ്വാമി അയ്യർക്കെതിരായ പ്രക്ഷോഭത്തിലും പങ്കെടുത്തു.
● എ.കെ.ജി.യുടെ നിരാഹാര സമരം നാരങ്ങാനീര് നൽകി അവസാനിപ്പിച്ചത് ചാക്കോയാണ്.
● ഭാരത സർക്കാർ സൂക്ഷിച്ചിട്ടുള്ള ഒറിജിനൽ ഭരണഘടനയിൽ മലയാളത്തിൽ ഒപ്പിട്ടു.
ഭാമനാവത്ത്
(KVARTHA) കേരള രാഷ്ട്രീയത്തിലെ അതികായകരിലൊരാളും കേരള കോൺഗ്രസ് എന്ന രാഷ്ട്രീയ പ്രസ്ഥാനത്തിന് വിത്തുപാകിയ (ചാക്കോയുടെ മരണംവരെ കേരള കോൺഗ്രസ് നിലവിൽ വന്നിരുന്നില്ല) വ്യക്തിയെന്ന് വിശ്വസിക്കപ്പെടുന്ന പുതിയാപ്പറമ്പിൽ തോമസ് ചാക്കോ എന്ന പി.ടി. ചാക്കോ ഈ ലോകത്തോട് വിടവാങ്ങിയിട്ട് 61 വർഷം തികയുന്നു.
കേരള രാഷ്ട്രീയത്തിൽ നിറഞ്ഞുനിൽക്കവേ, തന്റെ 49-ാം വയസ്സിലായിരുന്നു അദ്ദേഹം വിശ്വസിച്ച ആദർശങ്ങൾക്കുവേണ്ടിയുള്ള പോരാട്ടങ്ങളുടെ മുൻനിരയിൽ നിന്നപ്പോഴും എതിരാളികളുടെപോലും ബഹുമാനം ആർജിച്ച ചാക്കോയുടെ വിയോഗം.
തന്റെ കർക്കശമായ നിലപാട് മൂലം 'പേടി തൊടാത്ത ചാക്കോ' എന്ന് എതിരാളികൾ വിശേഷിപ്പിച്ചിരുന്ന ചാക്കോ നിർഭയത്വത്തിന്റെയും തുറന്ന വിമർശനത്തിന്റെയും പ്രതീകമായിരുന്നു. കേരള നിയമസഭ കണ്ട ഏറ്റവും ശക്തരായ പ്രതിപക്ഷ നേതാക്കളുടെയും ആഭ്യന്തര മന്ത്രിമാരുടെയും ഗണത്തിൽ ഉന്നതസ്ഥാനത്തിന് അർഹനാണ് ചാക്കോ.
ഇ.എം.എസ്. സർക്കാരിന്റെ കാലത്ത് ഏറെ വിവാദം സൃഷ്ടിച്ച ആന്ധ്രാ അരി കുംഭകോണം സംബന്ധിച്ച് സർക്കാരിനെക്കൊണ്ട് അന്വേഷണം പ്രഖ്യാപിച്ചതിനും അതിനെത്തുടർന്നുണ്ടായ പ്രത്യാഘാതങ്ങൾക്കും പൂർണ്ണമായ നേതൃത്വം നൽകിയത് ചാക്കോയായിരുന്നു.
കോട്ടയത്തെ വാഴൂരിൽ 1915-ൽ ജനിച്ച ചാക്കോ, ക്വിറ്റിന്ത്യാ സമരത്തിലും ദിവാൻ സി.പി. രാമസ്വാമി അയ്യർക്കെതിരായ പ്രക്ഷോഭത്തിലും പങ്കെടുത്ത് നിരവധിതവണ ജയിൽവാസം അനുഭവിച്ചിട്ടുണ്ട്. തിരുവിതാംകൂർ സംസ്ഥാന നിയമസഭയിലും ഇന്ത്യൻ പാർലമെന്റിലും ചാക്കോ അംഗമായിട്ടുണ്ട്.
കോട്ടയം ഡി.സി.സി. പ്രസിഡന്റായിരിക്കെ കോട്ടയം ജില്ല മുഴുവൻ 41 ദിവസംകൊണ്ട് പദയാത്ര നടത്തി സംഘടനയെ ശക്തിപ്പെടുത്തിയ റെക്കോർഡും ചാക്കോയുടെ പേരിലുണ്ട്.
ഒന്നാം കേരള നിയമസഭയിലേക്ക് വാഴൂരിൽനിന്ന് കോൺഗ്രസ് പ്രതിനിധിയായി തിരഞ്ഞെടുക്കപ്പെട്ട ചാക്കോ, ഒന്നാം ഇ.എം.എസ്. മന്ത്രിസഭയുടെ കാലത്ത് കേരളത്തിലെ ആദ്യ പ്രതിപക്ഷ നേതാവായും പിന്നീട് ഇ.എം.എസ്. മന്ത്രിസഭയെ താഴെയിറക്കാൻ നടന്ന വിമോചന സമരത്തിന്റെ മുന്നണിപ്പോരാളിയായും പ്രവർത്തിച്ച് കേരള രാഷ്ട്രീയത്തിൽ തന്റേതായ ഇടം നേടി. പട്ടം താണുപിള്ളയുടെ നേതൃത്വത്തിലുള്ള കോൺഗ്രസ്-പി.എസ്.പി. മന്ത്രിസഭയിൽ കേരളത്തിലെ ആഭ്യന്തര മന്ത്രിയായും ചാക്കോ പ്രവർത്തിച്ചു.
ജനകീയ പ്രശ്നം വരുമ്പോൾ രാഷ്ട്രീയം മാറ്റിവെച്ച് മുന്നിട്ടിറങ്ങുന്ന ശൈലിയുടെ ഉടമയായിരുന്നു ചാക്കോ എന്നതിന്റെ തെളിവായിരുന്നു എ.കെ.ജി. അമരാവതിയിൽ നടത്തിയ കർഷകപ്രക്ഷോഭത്തിന്റെ ഭാഗമായുണ്ടായ നിരാഹാര സമരത്തിന്റെ അവസാനത്തിൽ നാരങ്ങാനീര് നൽകി ഉപവാസം അവസാനിപ്പിച്ച് എ.കെ.ജിക്ക് പിന്തുണ നൽകിയത്. കേരള ഭൂപരിഷ്കരണ നിയമത്തിന്റെ ശിൽപ്പിയായി പ്രവർത്തിച്ച ചരിത്രവും ചാക്കോക്കുണ്ട്.
പിന്നീട് മുഖ്യമന്ത്രിയായ ആർ. ശങ്കറുമായുള്ള അഭിപ്രായവ്യത്യാസത്തെത്തുടർന്ന് മന്ത്രിസഭയിൽനിന്ന് രാജിവെച്ച ചാക്കോ, പാർട്ടിയുമായി അകലം പ്രാപിക്കുകയും പൂർണ്ണമായും അഭിഭാഷകവൃത്തിയിൽ കേന്ദ്രീകരിക്കുന്നതുമാണ് പിന്നീട് കേരള സമൂഹം കണ്ടത്. ഇതിനെത്തുടർന്നുള്ള പ്രത്യാഘാതങ്ങളായിരുന്നു കേരള കോൺഗ്രസ് എന്ന രാഷ്ട്രീയ പാർട്ടിയുടെ ഉദയത്തിനുള്ള കാരണമെന്ന് വിശ്വസിക്കപ്പെടുന്നു.
ഭാരത സർക്കാർ സൂക്ഷിച്ചിട്ടുള്ള ഒറിജിനൽ ഭരണഘടനയിൽ രാഷ്ട്രപതി രാജേന്ദ്രപ്രസാദ്, പ്രധാനമന്ത്രി ജവാഹർലാൽ നെഹ്റു, ഭരണഘടന ശിൽപ്പി ഡോക്ടർ അംബേദ്കർ എന്നിവരോടൊപ്പം ഭരണഘടന നിർമ്മാണ സമിതി അംഗംകൂടിയായ പി.ടി. ചാക്കോയുടെ മലയാളത്തിലുള്ള ഒപ്പും പതിഞ്ഞിട്ടുണ്ട് എന്നത് ഏറെ അഭിമാനകരമാണെന്ന് ചാക്കോയുടെ മകനും പിന്നീട് കേരള രാഷ്ട്രീയത്തിൽ സജീവമായിരുന്ന വ്യക്തിയും എൻ.ഡി.എ. മന്ത്രിസഭാംഗവുമായിരുന്ന പി.സി. തോമസ് പറയുന്നു.
അഭിഭാഷകവൃത്തിയിൽ സജീവമായിരിക്കെ കോഴിക്കോട് ജില്ലയിലെ കുറ്റ്യാടിയിൽ ഒരു കേസിന്റെ ആവശ്യത്തിനായി വന്ന സമയത്തുണ്ടായ ഹൃദയാഘാതത്തെത്തുടർന്നായിരുന്നു 49-ാം വയസ്സിൽ പി.ടി. ചാക്കോയുടെ അപ്രതീക്ഷിത അന്ത്യം.
പി.ടി. ചാക്കോയെക്കുറിച്ചുള്ള ഈ ലേഖനം നിങ്ങളുടെ സുഹൃത്തുക്കളുമായി പങ്കുവെക്കൂ.
Article Summary: P.T. Chacko, a towering figure in Kerala politics, remembered 61 years after his passing.
#PTChacko #KeralaPolitics #IndianConstitution #KeralaCongress #PoliticalLeader
