ഇന്‍ഡ്യന്‍ ആര്‍മിയില്‍നിന്നും പതിനായിരത്തിലേറെ പേര്‍ ജോലിയുപേക്ഷിച്ചു

ന്യൂഡല്‍ഹി: ഇന്ത്യന്‍ ആര്‍മിയില്‍ നിന്നും പതിനായിരത്തിലേറെ പേര്‍ ജോലിയുപേക്ഷിച്ചതായി റിപോര്‍ട്ട്. ഇന്ത്യന്‍ സേനയിലെ ജവാന്മാര്‍ കടുത്ത മാനസീക-ശാരീരിക പീഡനങ്ങള്‍ക്ക് വിധേയരാകുന്നുവെന്ന ആരോപണം നിലനില്‍ക്കേയാണ്‌ പുതിയ റിപോര്‍ട്ട്. കേന്ദ്ര പ്രതിരോധമന്ത്രി എ.കെ ആന്റണി തിങ്കളാഴ്ച പാര്‍ ലമെന്റില്‍ വ്യക്തമാക്കിയതാണ്‌ ഇക്കാര്യം. വിരമിക്കുന്നതിനുമുന്‍പ് തന്നെ 10,315 പേര്‍ കഴിഞ്ഞ വര്‍ഷം ജോലിയുപേക്ഷിച്ച് പോയി. 2010ല്‍ 7,249 പേരും 2009ല്‍ 7,499 പേരുമാണ്‌ ജോലിയുപേക്ഷിച്ചത്.

കൂടുതല്‍ മികച്ച തൊഴിലവസരങ്ങളാണ്‌ ജവാന്മാരെ സൈന്യത്തില്‍ നിന്നും പിന്മാറാന്‍ പ്രേരിപ്പിക്കുന്നതെന്ന്‌ വ്യക്തമാക്കിയ ആന്റണി ജവാന്മാരും മുതിര്‍ന്ന സൈനീക ഓഫീസര്‍മാരും തമ്മില്‍ ചില പ്രശ്നങ്ങള്‍ നിലനില്‍ക്കുന്നുണ്ടെന്ന്‌ തുറന്ന്‌ സമ്മതിക്കുകയും ചെയ്തു. എന്നാല്‍ ഇത്തരം സംഭവങ്ങള്‍ താരതമ്യേന കുറവാണെന്ന്‌ മന്ത്രി വ്യക്തമാക്കി. അത്തരം മൂന്ന്‌ സംഭവങ്ങള്‍ മാത്രമാണ്‌ കഴിഞ്ഞ രണ്ട്‌ വര്‍ഷത്തിനുള്ളില്‍ റിപോര്‍ട്ട് ചെയ്തത്. ലഡാക്കിലെ നോമയിലെ 226 പട്ടാള ക്യാമ്പിലും പഞ്ചാബിലെ ഗുരുദാസ്പൂരിലെ 45 കാവല്‍ റി ക്യാമ്പിലുമാണ്‌ സംഘര്‍ഷമുണ്ടായത്.