ജയ്പൂർ: (KVARTHA) അജ്‌മീർ ദർഗയിൽ ഉറൂസ് പ്രമാണിച്ച് പ്രധാനമന്ത്രി നരേന്ദ്ര മോദിക്ക് വേണ്ടി ചാദർ സമർപ്പിക്കുന്നതിന് കേന്ദ്രമന്ത്രി കിരൺ റിജിജു രാജസ്ഥാനിലെത്തി. എല്ലാ വിഭാഗത്തിലുള്ളവരും ഒരുമിച്ചാണ് രാജ്യത്ത് ജീവിക്കുന്നതെന്ന് ജയ്പൂരിൽ മാധ്യമങ്ങളുമായി സംസാരിക്കവെ അദ്ദേഹം പറഞ്ഞു. അജ്മീർ ഗരീബ് നവാസ് ദർഗ ഹിന്ദുവോ, മുസ്ലീമോ, ക്രിസ്ത്യനോ, സിഖോ, പാർസിയോ ആകട്ടെ, എല്ലാവർക്കുമായി തുറന്നിട്ടിരിക്കുകയാണെന്നും രാജ്യത്തെ സാമൂഹിക ഘടനയെ ബാധിക്കുന്ന പ്രവൃത്തികൾ ഒരു പൗരനും ചെയ്യരുതെന്ന് അദ്ദേഹം കൂട്ടിച്ചേർത്തു.

പ്രധാനമന്ത്രി നരേന്ദ്ര മോദിക്ക് വേണ്ടി അജ്മീർ ദർഗയിൽ ചാദർ സമർപ്പിക്കാനാണ് താൻ എത്തിയതെന്ന് കിരൺ റിജിജു വ്യക്തമാക്കി. പ്രധാനമന്ത്രിയുടെ നേതൃത്വത്തിൽ രാജ്യത്തിന് ഒരു പ്രത്യേക സന്ദേശവുമായാണ് താൻ ദർഗയിലേക്ക് പോകുന്നതെന്നും അദ്ദേഹം പറഞ്ഞു. പ്രധാനമന്ത്രിയുടെ സന്ദേശം അവിടെ വായിക്കുമെന്നും, ആ പുണ്യ കർമ്മം നിർവഹിക്കുന്നതിൽ തനിക്ക് അതിയായ അഭിമാനമുണ്ടെന്നും അദ്ദേഹം കൂട്ടിച്ചേർത്തു.

ദർഗയിൽ അനുഭവപ്പെടുന്ന വർദ്ധിച്ച തിരക്കിനെക്കുറിച്ചും കേന്ദ്രമന്ത്രി സംസാരിച്ചു. പ്രത്യേകിച്ചും സ്ത്രീകളും പ്രായമായവരും കുട്ടികളും ഒരുപാട് ബുദ്ധിമുട്ടുകൾ അനുഭവിക്കുന്നുണ്ടെന്ന് അദ്ദേഹം ചൂണ്ടിക്കാട്ടി. ഈ പ്രശ്നത്തിന് ഒരു പരിഹാരം കാണുന്നതിനായി ന്യൂനപക്ഷ മന്ത്രാലയം നിയമപരമായ ഒരു ചട്ടം തയ്യാറാക്കിയിട്ടുണ്ട്. അതിന്റെ അടിസ്ഥാനത്തിൽ അജ്മീർ ദർഗയിൽ പുതിയ ക്രമീകരണങ്ങൾ ഉടൻ നടപ്പിലാക്കുമെന്നും, അതുവഴി ആളുകൾക്ക് കൂടുതൽ എളുപ്പത്തിൽ ചാദർ സമർപ്പിക്കാൻ സാധിക്കുമെന്നും അദ്ദേഹം അറിയിച്ചു.

PM @narendramodi ji presented the Chadar that would be offered on his behalf at the Ajmer Sharif Dargah on the Urs of Khwaja Moinuddin Chishti.

This gesture reflects his deep respect for India’s rich spiritual heritage and the enduring message of harmony and compassion. pic.twitter.com/m3jTR0MjV7

— Kiren Rijiju (@KirenRijiju) January 2, 2025

ദർഗയുടെ നടത്തിപ്പ് കൂടുതൽ മെച്ചപ്പെടുത്തുന്നതിനായി മന്ത്രാലയം ചില നിയമങ്ങൾ രൂപീകരിച്ചിട്ടുണ്ടെന്നും, അത് ദർഗയുടെ കാര്യക്ഷമമായ നടത്തിപ്പിന് സഹായകമാകുമെന്നും അദ്ദേഹം അറിയിച്ചു. ശനിയാഴ്ച രാവിലെ ജയ്പൂർ വിമാനത്താവളത്തിലെത്തിയ കേന്ദ്രമന്ത്രി റോഡ് മാർഗം അജ്മീറിലേക്ക് പോകാനാണ് തയ്യാറെടുക്കുന്നത്. ചാദർ സമർപ്പണത്തോടൊപ്പം, ഉറൂസ് വേളയിൽ ഭക്തരുടെ സൗകര്യം വർധിപ്പിക്കാനും ഏകോപനം മെച്ചപ്പെടുത്താനും ലക്ഷ്യമിട്ടുള്ള ദർഗ ഷെരീഫിൻ്റെ ഔദ്യോഗിക വെബ് പോർട്ടലും ‘ഗരീബ് നവാസ്’ എന്ന പുതിയ മൊബൈൽ ആപ്പും മന്ത്രി ഉദ്ഘാടനം ചെയ്യും.

2014ൽ അധികാരമേറ്റതിന് ശേഷം തുടർച്ചയായി 11-ാം വർഷമാണ് പ്രധാനമന്ത്രി മോദിക്ക് വേണ്ടി അജ്മീറിൽ ചാദർ അർപ്പിക്കുന്നത്. കഴിഞ്ഞ വർഷം അന്നത്തെ കേന്ദ്രമന്ത്രി സ്മൃതി ഇറാനിയാണ് ചാദർ സമർപ്പിക്കാൻ എത്തിയത്. ചാദർ സമർപ്പിക്കുന്നതിന് താത്ക്കാലിക വിലക്ക് ആവശ്യപ്പെട്ടാണ് ഹരജിയെന്നാണ് റിപ്പോർട്ടുകൾ.

#AjmerDargah #KirronRijiju #PMModi #ChadarOffering #IndiaNews #ReligiousVisit