കാൽവെട്ട് കേസ് വീണ്ടും ചർച്ചയാകുന്നു; 5 സി പി എം വിശദീകരണ യോഗം തിങ്കളാഴ്ച

കണ്ണൂർ: (KVARTHA) ബിജെപി സംസ്ഥാന ഉപാധ്യക്ഷനും രാജ്യസഭാ എംപിയുമായ സി. സദാനന്ദൻ്റെ കാൽ വെട്ടിയ കേസിൽ പ്രതികൾ ശിക്ഷിക്കപ്പെട്ട പശ്ചാത്തലത്തിൽ വിശദീകരണ യോഗവുമായി സിപിഎം ജില്ലാ നേതൃത്വം. കേസിലെ ശിക്ഷിക്കപ്പെട്ടവരുടെ ചിത്രം സഹിതമുള്ള പോസ്റ്ററിൽ, 'ഇവർ കുറ്റക്കാരാണോ?' എന്ന ചോദ്യവും പാർട്ടി ഉയർത്തുന്നുണ്ട്.

വരുന്ന തിങ്കളാഴ്ച വൈകിട്ട് അഞ്ചു മണിക്ക് മട്ടന്നൂർ ഉരുവച്ചാൽ ടൗണിലാണ് പൊതുയോഗം. സിപിഎം സംസ്ഥാന സെക്രട്ടറിയേറ്റ് അംഗം എം.വി. ജയരാജൻ ഉദ്ഘാടനം ചെയ്യും.

കേസിൽ എട്ട് സിപിഎം പ്രവർത്തകരുടെ ശിക്ഷ നടപ്പായതിന് പിന്നാലെയാണ് പാർട്ടിയുടെ ഈ നീക്കം. മുഴുവൻ പ്രതികളുടെയും അപ്പീൽ സുപ്രീം കോടതി തള്ളിയതോടെ എട്ട് പേരെയും ജയിലിലടച്ചിരുന്നു. ഇവർക്ക് അഭിവാദ്യമർപ്പിക്കാൻ കോടതി പരിസരത്തും ജയിലിന് മുന്നിലും നിരവധി സിപിഎം പ്രവർത്തകർ എത്തിയിരുന്നു. മട്ടന്നൂരിൽ നടന്ന യാത്രയയപ്പ് ചടങ്ങിൽ കെ.കെ. ശൈലജ എംഎൽഎ പങ്കെടുത്തത് വലിയ വിവാദമായിരുന്നു.

1994 ജനുവരി 25-ന് രാത്രി 8.30-നാണ് ആർഎസ്എസ് ജില്ലാ സഹകാര്യവാഹകനായിരുന്ന സി. സദാനന്ദൻ്റെ കാൽ ഉരുവച്ചാലിൽ വെച്ച് വെട്ടിയത്. 32 വർഷങ്ങൾക്ക് ശേഷമാണ് കേസിൽ ശിക്ഷ നടപ്പാക്കുന്നത്. 

കെ. ശ്രീധരൻ, മാതമംഗലം നാണു, പുതിയവീട്ടിൽ മച്ചാൻ രാജൻ, പി. കൃഷ്ണൻ, ചന്ദ്രോത്ത് രവീന്ദ്രൻ, പുല്ലാഞ്ഞിയോടൻ സുരേഷ് ബാബു, മല്ലപ്രവൻ രാമചന്ദ്രൻ, കെ. ബാലകൃഷ്ണൻ എന്നിവരാണ് കേസിലെ പ്രതികൾ. ഇവർ ഇപ്പോൾ കണ്ണൂർ സെൻട്രൽ ജയിലിലാണ്. പ്രതികൾക്ക് കണ്ണൂർ സെൻട്രൽ ജയിൽ പരിസരത്ത് സിപിഎം കണ്ണൂർ ജില്ലാ സെക്രട്ടറി കെ.കെ. രാഗേഷിൻ്റെ നേതൃത്വത്തിൽ യാത്രയയപ്പ് നൽകിയിരുന്നു. 

കോടതി കുറ്റക്കാരെന്ന് കണ്ടെത്തിയ പ്രതികൾ കുറ്റം ചെയ്തതായി കരുതുന്നില്ലെന്നായിരുന്നു സിപിഎം നേതാക്കളായ പി. ജയരാജൻ, കെ.കെ. ശൈലജ എന്നിവരുടെ പ്രതികരണം. ഇത് വലിയ വിവാദമായതിന് പിന്നാലെയാണ് രാഷ്ട്രീയ വിശദീകരണ പൊതുയോഗവുമായി സിപിഎം രംഗത്തുവരുന്നത്.

ഇത്തരത്തിലുള്ള രാഷ്ട്രീയ വിശദീകരണ യോഗങ്ങളെക്കുറിച്ച് നിങ്ങളുടെ അഭിപ്രായം പങ്കുവയ്ക്കുക.

Article Summary: CPM to hold an explanation meeting in Mattannur after party workers are convicted in the 'Kalvettu' case.

#KalvettuCase #CPM #KannurPolitics #KeralaNews #CPIM #PoliticalViolence