ന്യൂഡൽഹി: (KVARTHA) ഡൽഹി ഹൈക്കോടതി ജഡ്‌ജ്‌ ജസ്റ്റിസ് യശ്വന്ത് വർമയുടെ ഔദ്യോഗിക വസതിയിൽ കണക്കിൽപ്പെടാത്ത വലിയ തുക കണ്ടെത്തിയെന്ന സംശയത്തെ തുടർന്ന് സംഭവസ്ഥലത്തെത്തിയ അഞ്ച് പൊലീസ് ഉദ്യോഗസ്ഥരുടെ ഫോണുകൾ സുപ്രീം കോടതി നിയോഗിച്ച മൂന്നംഗ സമിതി പരിശോധിക്കും. ആദ്യം സ്ഥലത്തെത്തിയ പോലീസ് ഉദ്യോഗസ്ഥരുടെ ഫോണുകളാണ് പ്രധാനമായും പരിശോധിക്കുക. 

അഗ്നിശമന സേനാംഗങ്ങൾ പരിശോധന നടത്തുമ്പോൾ തന്നെ പോലീസും സ്ഥലത്തെത്തിയിരുന്നു. സ്റ്റേഷൻ ഹൗസ് ഓഫീസർ ഉൾപ്പെടെ അഞ്ച് പോലീസ് ഉദ്യോഗസ്ഥരാണ് അന്ന് എത്തിയത്. ഇവരെ വിളിച്ചുവരുത്തി കമ്മീഷണർ വിശദാംശങ്ങൾ തേടിയിരുന്നു. ഇതിനു പിന്നാലെയാണ് ഫോണുകൾ ഹാജരാക്കാൻ നിർദ്ദേശം നൽകിയത്. അഞ്ച് പോലീസുകാരും അവരുടെ ഫോണുകൾ പോലീസ് ആസ്ഥാനത്ത് സമർപ്പിച്ചിട്ടുണ്ട്.

സുപ്രീം കോടതി ചീഫ് ജസ്റ്റിസ് സഞ്ജീവ് ഖന്നയാണ് ഈ വിഷയത്തിൽ അന്വേഷണം നടത്താനായി മൂന്നംഗ സമിതി രൂപീകരിച്ചിരിക്കുന്നത്. പഞ്ചാബ്-ഹരിയാന ഹൈക്കോടതി ചീഫ് ജസ്റ്റിസ് ഷീൽ നാഗു, ഹിമാചൽ പ്രദേശ് ഹൈക്കോടതി ചീഫ് ജസ്റ്റിസ് ജി.എസ്. സന്ധാവാലിയ, കർണാടക ഹൈക്കോടതി ജഡ്‌ജി ജസ്റ്റിസ് അനു ശിവരാമൻ എന്നിവരാണ് സമിതിയിലെ അംഗങ്ങൾ. ജസ്റ്റിസ് അനു ശിവരാമൻ മുൻപ് കേരള ഹൈക്കോടതിയിൽ സേവനമനുഷ്ഠിച്ചിട്ടുണ്ട്. 

ഡൽഹി ഹൈക്കോടതി ജഡ്‌ജി യശ്വന്ത് വർമയുടെ ഔദ്യോഗിക വസതിയിൽ തീപിടുത്തമുണ്ടായതിനെ തുടർന്ന് തീയണയ്ക്കാൻ എത്തിയ അഗ്നിശമന സേനാംഗങ്ങളാണ് അവിടെ കണക്കിൽപ്പെടാത്ത വലിയ തുക കണ്ടതെന്നാണ് പ്രാഥമിക വിവരം. തുടർന്ന് അധികൃതർ ഈ വിവരം ചീഫ് ജസ്റ്റിസ് സഞ്ജീവ് ഖന്നയെ അറിയിക്കുകയായിരുന്നു. 

ഡൽഹി ഹൈക്കോടതിയിലെ സീനിയോറിറ്റിയിൽ ചീഫ് ജസ്റ്റിസ് ദേവേന്ദ്ര കുമാർ ഉപാധ്യായ, ജസ്റ്റിസ് വിഭു ബാക്രൂ എന്നിവർ കഴിഞ്ഞാൽ അടുത്ത സ്ഥാനത്തുള്ള ജഡ്ജിയാണ് ജസ്റ്റിസ് യശ്വന്ത് വർമ. 2014-ൽ അലഹാബാദ് ഹൈക്കോടതി ജഡ്‌ജിയായിരുന്ന ജസ്റ്റിസ് വർമ 2021-ലാണ് ഡൽഹി ഹൈക്കോടതിയിൽ എത്തുന്നത്.

ഈ വാർത്ത പങ്കുവെക്കുകയും അഭിപ്രായങ്ങൾ രേഖപ്പെടുത്തുകയും ചെയ്യുക. 

A Supreme Court-appointed committee will examine the phones of five policemen who responded to reports of unaccounted cash at the residence of Delhi High Court Judge Justice Yashwant Varma. Firefighters initially reported the discovery. The three-member committee will investigate the matter.

#JudgesResidenceCash #DelhiHighCourt #SupremeCourt #PoliceProbe #UnaccountedMoney #JusticeVarma