ന്യൂഡല്‍ഹി: (KVARTHA) പാകിസ്താൻ മുൻ പ്രധാനമന്ത്രി ഇമ്രാൻ ഖാൻ അഡിയാല ജയിലിൽ കൊല്ലപ്പെട്ടെന്ന തരത്തിലുള്ള പ്രചാരണങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്. മുറിവേറ്റ നിലയിൽ അവശനായി കിടക്കുന്ന ഇമ്രാൻ ഖാന്റെ ചിത്രങ്ങൾ സഹിതമാണ് ഈ പ്രചാരണങ്ങൾ നടക്കുന്നത്. എന്നാൽ, ഈ വാർത്തകൾ അടിസ്ഥാനരഹിതമാണെന്നും വ്യാജമാണെന്നും പാക് മാധ്യമങ്ങൾ റിപ്പോർട്ട് ചെയ്യുന്നു.

ഇമ്രാൻ ഖാനെ ജയിലിനുള്ളിൽ വെച്ച് പാകിസ്താൻ രഹസ്യാന്വേഷണ ഏജൻസിയായ ഐ.എസ്.ഐ വിഷം നൽകി കൊലപ്പെടുത്തിയെന്നും മർദ്ദിച്ചു കൊലപ്പെടുത്തിയെന്നും അവകാശപ്പെടുന്ന പോസ്റ്റുകളാണ് സമൂഹമാധ്യമങ്ങളിൽ പ്രചരിക്കുന്നത്. ഇതിനോടൊപ്പം, പാകിസ്താൻ സർക്കാർ പുറത്തിറക്കിയതെന്ന് അവകാശപ്പെടുന്ന ഒരു പത്രക്കുറിപ്പും പ്രചരിക്കുന്നുണ്ട്. 'മുൻ പ്രധാനമന്ത്രി ഇമ്രാൻ ഖാൻ ജുഡീഷ്യൽ കസ്റ്റഡിയിൽ മരിച്ചതായി അഗാധമായ ദുഃഖത്തോടെയും ഗൗരവത്തോടെയും സ്ഥിരീകരിക്കുന്നു' എന്നാണ് പത്രക്കുറിപ്പിൽ പറയുന്നത്. സംഭവത്തിൽ സമഗ്രമായ അന്വേഷണം നടക്കുകയാണെന്നും കുറിപ്പിൽ പറയുന്നു.

ഈ പ്രചാരണങ്ങൾ ശക്തമായതോടെ, പാക് മാധ്യമങ്ങൾ വാർത്ത നിഷേധിക്കുകയും വ്യാജമാണെന്ന് സ്ഥിരീകരിക്കുകയും ചെയ്തു. എന്നിരുന്നാലും, പാകിസ്താൻ സർക്കാരോ ജയിൽ അധികൃതരോ ഇതുമായി ബന്ധപ്പെട്ട് ഔദ്യോഗിക സ്ഥിരീകരണമോ പ്രസ്താവനയോ പുറത്തിറക്കിയിട്ടില്ല. 2013-ൽ ലാഹോറിലെ ഒരു തിരഞ്ഞെടുപ്പ് റാലിയിൽ ഫോർക്ക് ലിഫ്റ്റിൽ നിന്ന് വീണ് പരിക്കേറ്റ ദൃശ്യങ്ങളാണ് ഇപ്പോൾ പ്രചരിക്കുന്നതെന്നാണ് റിപ്പോർട്ടുകൾ. ഇമ്രാൻ ഖാൻ ജയിലിൽ വച്ച് ലൈംഗിക പീഡനത്തിനിരയായതായി മറ്റൊരു വ്യാജ പ്രചാരണവും അടുത്തിടെ പാക് സാമൂഹ്യ മാധ്യമങ്ങളിലുണ്ടായിരുന്നു. 

പാക് മുന്‍ പ്രധാനമന്ത്രിയും തെഹ്‍രീക് ഇ ഇന്‍സാഫ് പാര്‍ട്ടിയുടെ സ്ഥാപകനും ചെയര്‍മാനുമായിരുന്ന ഇമ്രാന്‍ ഖാന്‍റെ മോചനം ആവശ്യപ്പെട്ട് അദേഹത്തിന്‍റെ പാര്‍ട്ടി വെള്ളിയാഴ്‌ച ഇസ്ലാമാബാദ് ഹൈക്കോടതിയെ സമീപിച്ചിരുന്നു. ദീര്‍ഘകാലമായുള്ള തടങ്കല്‍ ഇമ്രാന്‍റെ ആരോഗ്യത്തെ ബാധിച്ചതായും, ഇന്ത്യയുമായുള്ള അതിര്‍ത്തി പ്രശ്നം കാരണത്താല്‍ അദേഹത്തിന്‍റെ ജീവന് ഭീഷണിയുണ്ട് എന്നും അവകാശപ്പെട്ടായിരുന്നു കോടതിയെ പാര്‍ട്ടി സമീപിച്ചത്. ഇമ്രാന്‍ ഖാന്‍ കഴിയുന്ന അഡ്യാല ജയിലില്‍ ഡ്രോണ്‍ ആക്രമണത്തിന് സാധ്യതയുണ്ടെന്ന് പിടിഐ ആരോപിച്ചു. ഇമ്രാൻ ഖാന്‍റെ മോചനം ആവശ്യപ്പെട്ട് അദേഹത്തിന്‍റെ അനുയായികൾ ലാഹോറില്‍ കഴിഞ്ഞ ദിവസം തെരുവിലിറങ്ങിയിരുന്നു. പാകിസ്ഥാന്‍റെ 19-ാം പ്രധാനമന്ത്രിയായിരുന്ന ഇമ്രാന്‍ ഖാന്‍ 2018 ഓഗസ്റ്റ് മുതല്‍ 2022 ഏപ്രില്‍ വരെയാണ് അധികാരത്തിലുണ്ടായിരുന്നത്. 

2022-ൽ അവിശ്വാസ പ്രമേയത്തിലൂടെയാണ് ഇമ്രാൻ ഖാന് പ്രധാനമന്ത്രി സ്ഥാനം നഷ്ടമായത്. അഴിമതി ആരോപണങ്ങൾ ഉൾപ്പെടെയുള്ള കുറ്റങ്ങൾ ചുമത്തി 2023-ൽ അദ്ദേഹത്തെ അറസ്റ്റ് ചെയ്തു. തോഷഖാന കേസിൽ ഇമ്രാൻ ഖാന് മൂന്ന് വർഷത്തെ തടവ് ശിക്ഷ ലഭിച്ചിരുന്നു. പ്രധാനമന്ത്രിയായിരിക്കെ ലഭിച്ച വിലകൂടിയ സമ്മാനങ്ങൾ സ്വന്തം നിലയ്ക്ക് വിറ്റ് പണമാക്കി എന്നതാണ് ഇമ്രാൻ ഖാനെതിരെയുള്ള കേസ്. ഉന്നത പദവിയിലുള്ളവർക്ക് ലഭിക്കുന്ന സമ്മാനങ്ങൾ തോഷഖാന എന്ന വകുപ്പിലേക്ക് കൈമാറണമെന്ന നിയമം ലംഘിച്ചെന്ന് കോടതി കണ്ടെത്തി.

വിവാഹത്തിൽ മതനിയമ ലംഘനം നടത്തിയെന്നതാണ് മറ്റൊരു കേസ്. ഇതിൽ ഇമ്രാൻ ഖാനും ഭാര്യ ബുഷ്‌റ ബീവിക്കും ഏഴ് വർഷം തടവും പിഴയും ശിക്ഷ ലഭിച്ചു. ഇമ്രാൻ ഖാന്റെ മൂന്നാം ഭാര്യ ബുഷ്‌റയുടെ ആദ്യ ഭർത്താവ് ഖവാർ മനേക നൽകിയ പരാതിയിലാണ് ഇരുവർക്കുമെതിരെ ശിക്ഷ വിധിച്ചത്.

ഈ വർഷം തുടക്കത്തിൽ അൽ ഖാദിർ ട്രസ്റ്റ് അഴിമതിക്കേസിൽ ഇമ്രാൻ ഖാന് 14 വർഷത്തെ തടവ് ശിക്ഷ കൂടി ലഭിച്ചു. അൽ ഖാദിർ സർവകലാശാല സ്ഥാപിച്ചതുമായി ബന്ധപ്പെട്ട് പൊതുഖജനാവിന് 5000 കോടി രൂപയുടെ നഷ്ടമുണ്ടാക്കിയെന്നാണ് കേസ്. റിയൽ എസ്റ്റേറ്റ് വ്യവസായി മാലിക് റിയാസിന് കള്ളപ്പണ ഇടപാടിൽ സഹായം നൽകി, പകരം ഭൂമി വാങ്ങിയെന്നാണ് ആരോപണം.

ഈ വാർത്തയെക്കുറിച്ച് നിങ്ങളുടെ അഭിപ്രായം രേഖപ്പെടുത്തുക!

Article Summary: Rumors of Imran Khan's death in jail are false, as confirmed by Pakistani media. Social media is spreading misinformation.  

#ImranKhan, #PakistanNews, #FakeNews, #SocialMedia, #FactCheck, #PoliticalNews