ഇന്ത്യാ ഗേറ്റിന് മുന്നിൽ യുവാക്കളുടെ പ്രതിഷേധം: മാവോയിസ്റ്റ് പോസ്റ്ററുകൾ വിവാദത്തിൽ

ന്യൂഡൽഹി: (KVARTHA) രാജ്യതലസ്ഥാനത്ത് വർദ്ധിച്ചു വരുന്ന വായു മലിനീകരണത്തിനെതിരെ ഇന്ത്യാ ഗേറ്റിന് മുന്നിൽ യുവജന കൂട്ടായ്മയുടെ (ജെൻ സി) നേതൃത്വത്തിൽ നടന്ന പ്രതിഷേധത്തിൽ മാവോയിസ്റ്റ് അനുകൂല മുദ്രാവാക്യം ഉയർന്നത് സംഘർഷത്തിനിടയാക്കിയതായി ഡൽഹി പോലീസ് അറിയിച്ചു. കഴിഞ്ഞയാഴ്ച ഏറ്റുമുട്ടലിൽ കൊല്ലപ്പെട്ട മാവോയിസ്റ്റ് കമാൻഡർ മാധ്‌വി ഹിദ്മയുടെ പോസ്റ്ററുകൾ ഉപയോഗിച്ചും അദ്ദേഹത്തെ പിന്തുണച്ചുമായിരുന്നു പ്രതിഷേധക്കാർ മുദ്രാവാക്യങ്ങൾ മുഴക്കിയത്. 'മാധ്‌വി ഹിദ്മ അമർ രഹേ' (മാധ്‌വി ഹിദ്മ മരിക്കുന്നില്ല) എന്നായിരുന്നു പ്രതിഷേധക്കാർ വിളിച്ച മുദ്രാവാക്യം.

വായു മലിനീകരണം തടയുന്നതിനുള്ള ദീർഘകാല പരിഹാരങ്ങൾ സർക്കാർ നടപ്പാക്കണമെന്ന് ആവശ്യപ്പെട്ടാണ് ഡൽഹി കോർഡിനേഷൻ കമ്മിറ്റി ഫോർ ക്ലീൻ എയർ എന്ന സംഘടനയുടെയും വിവിധ വിദ്യാർത്ഥി സംഘടനകളുടെയും നേതൃത്വത്തിൽ പ്രതിഷേധം സംഘടിപ്പിച്ചത്. ഞായറാഴ്ച വൈകുന്നേരം ഇന്ത്യാ ഗേറ്റിലെ സി ഹെക്‌സഗണിലാണ് പ്രതിഷേധം നടന്നത്. പ്രതിഷേധക്കാർ റോഡ് തടയാൻ ശ്രമിക്കുകയും റോഡിനു നടുവിൽ അനുവാദമില്ലാതെ ഏകദേശം ഒരു മണിക്കൂറോളം ഇരിക്കുകയും ചെയ്തു.

പൊലീസിനു നേരെ കുരുമുളക് സ്പ്രേ

പ്രതിഷേധം നിർത്തി ആളുകളെ നീക്കം ചെയ്യാൻ പോലീസ് ശ്രമിച്ചപ്പോൾ അവർ അക്രമാസക്തരാകുകയായിരുന്നു എന്ന് പോലീസ് വൃത്തങ്ങൾ പറയുന്നു. പ്രതിഷേധക്കാർ ബാരിക്കേഡുകൾ തകർക്കുകയും പോലീസ് ഉദ്യോഗസ്ഥർക്ക് നേരെ കുരുമുളക് സ്പ്രേ പ്രയോഗിക്കുകയും ചെയ്തു. ഈ സംഭവത്തിൽ നാല് പൊലീസുകാർക്ക് പരിക്കേറ്റു. ഇവർ റാം മനോഹർ ലോഹ്യ ആശുപത്രിയിൽ ചികിത്സയിലാണ്. 'പോലീസ് ഉദ്യോഗസ്ഥർക്ക് നേരെ മുളക് സ്പ്രേ പ്രയോഗിക്കുന്നത് ഡൽഹിയിൽ ആദ്യമായാണ്. പ്രതിഷേധക്കാർക്കെതിരെ നിയമനടപടി സ്വീകരിച്ചുവരികയാണ്', ഡിസിപി ദേവേഷ് കുമാർ മഹ്‌ല എഎൻഐയോട് പറഞ്ഞു.

സംഭവവുമായി ബന്ധപ്പെട്ട് കർത്തവ്യ പാത പോലീസ് സ്റ്റേഷൻ, സൻസദ് മാർഗ് പോലീസ് സ്റ്റേഷൻ എന്നിവിടങ്ങളിലായി എഫ്ഐആർ രജിസ്റ്റർ ചെയ്യുകയും ഇതുവരെ 22 പേരെ അറസ്റ്റ് ചെയ്യുകയും ചെയ്തിട്ടുണ്ട്. തൃശ്ശൂർ, മലപ്പുറം സ്വദേശികളായ നിയമ ബിരുദ വിദ്യാർഥികളും നിയമ ബിരുദം പൂർത്തിയാക്കിയവരും അറസ്റ്റിലായവരിൽ ഉൾപ്പെടുന്നു. അറസ്റ്റിലായവരെ പട്യാല കോടതിയിൽ ഹാജരാക്കി.

മാവോയിസ്റ്റ് നുഴഞ്ഞുകയറ്റമെന്ന് പോലീസ്

പ്രതിഷേധക്കാർ വായു മലിനീകരണത്തിന് എതിരായ സമരത്തിൻ്റെ മറവിൽ മാവോയിസ്റ്റ് ആശയങ്ങൾ പ്രചരിപ്പിക്കാൻ ശ്രമിച്ചു എന്ന് പോലീസ് കോടതിയിൽ അറിയിച്ചു. ജെൻ സി പ്രക്ഷോഭത്തിൽ പങ്കെടുത്തവർ അർബൻ നക്സലുകളാണെന്നാണ് ഡൽഹി പോലീസ് പറയുന്നത്. 'ബിർസാ മുണ്ട മുതൽ മാധവി ഹിദ്മ വരെ, വനം സംരക്ഷിക്കാനുള്ള പോരാട്ടം തുടരും' എന്ന പോസ്റ്റർ പ്രതിഷേധക്കാർ പ്രദർശിപ്പിച്ചത് മാവോയിസ്റ്റ് അനുകൂല സംഘടനകളുമായുള്ള ബന്ധം സംബന്ധിച്ച് അന്വേഷണം നടത്താൻ കാരണമായി. ജെ എൻ യുവിലെയും, ഡൽഹി സർവ്വകലാശാലയിലെയും വിദ്യാർഥികളാണ് പ്രതിഷേധത്തിന് എത്തിയവരിൽ കൂടുതലും.

സർക്കാർ ജോലി തടസ്സപ്പെടുത്തി, റോഡ് ഗതാഗതം തടസ്സപ്പെടുത്തി, പോലീസ് ഉദ്യോഗസ്ഥരെ ആക്രമിച്ചു, പ്രതിഷേധത്തിന്റെ നിയമങ്ങൾ ലംഘിച്ചു എന്നിവ ഉൾപ്പെടുത്തിയാണ് എഫ്‌ഐആർ രജിസ്റ്റർ ചെയ്തിരിക്കുന്നത്. എന്നാൽ തങ്ങളോട് പോലീസ് മോശമായി പെരുമാറിയെന്നും ഫോൺ പിടിച്ചുവെച്ചെന്നും വിദ്യാർഥികൾ ആരോപിച്ചു. മാവോയിസ്റ്റ് അനുകൂല മുദ്രാവാക്യം വിളിച്ചതിൽ വീഡിയോ ദൃശ്യങ്ങൾ പരിശോധിച്ച് നിയമനടപടി സ്വീകരിക്കുമെന്നും പോലീസ് വ്യക്തമാക്കി.

കൊല്ലപ്പെട്ട മാധ്‌വി ഹിദ്മ

പ്രതിഷേധക്കാർ അനുകൂലിച്ച മാധ്‌വി ഹിദ്മ കഴിഞ്ഞ രണ്ട് പതിറ്റാണ്ടിനിടെ നിരവധി ആക്രമണങ്ങളുടെ സൂത്രധാരനായിരുന്നു. സർക്കാർ 45 ലക്ഷം രൂപ തലയ്ക്കു വിലയിട്ടിരുന്ന ഈ മാവോയിസ്റ്റ് കമാൻഡറെയും ഭാര്യ മഡ്കം രാജെയെയും മറ്റ് നാല് പേരെയും സുരക്ഷാ സേന വെടിവച്ചു കൊന്നത് നവംബർ 18-ന് ആന്ധ്രയിലെ അല്ലൂരി സീതാരാമരാജു ജില്ലയിലെ മാറേഡുമില്ലി വനത്തിൽ നടന്ന ഏറ്റുമുട്ടലിലാണ്. വായു മലിനീകരണം കുറയ്ക്കാനുള്ള സർക്കാർ നടപടികൾ ഫലപ്രദമല്ല എന്ന് ആരോപിച്ചായിരുന്നു ഇന്ത്യ ഗേറ്റിനു മുന്നിലെ പ്രതിഷേധം.

പൊലീസിൻ്റെ അർബൻ നക്സൽ ആരോപണത്തെക്കുറിച്ച് നിങ്ങളുടെ അഭിപ്രായം അറിയിക്കുക.

Article Summary: Delhi Police links anti-pollution protest to Maoists; 22 arrested after pepper spray attack.

 #DelhiProtest #MaoistSlogans #PepperSprayAttack #DelhiPolice #UrbanNaxals #MadhaviHidma