റായ്പൂർ: (KVARTHA) ഛത്തീസ്ഗഢ് ഹൈകോടതിയുടെ സുപ്രധാന നിരീക്ഷണം നിയമവൃത്തങ്ങളിലും പൊതുസമൂഹത്തിലും ചൂടേറിയ ചർച്ചകൾക്ക് വഴി തെളിയിക്കുകയാണ്. മൃതദേഹവുമായുള്ള ലൈംഗിക ബന്ധം അത്യന്തം ഭീകരമായ ഒരു കൃത്യമാണെങ്കിലും, ഇന്ത്യൻ ശിക്ഷാ നിയമത്തിലെ (IPC) 376-ാം വകുപ്പ് പ്രകാരമോ പോക്സോ നിയമപ്രകാരമോ അതിനെ ബലാത്സംഗമായി കണക്കാക്കാനാവില്ലെന്ന് കോടതി വ്യക്തമാക്കി. ചീഫ് ജസ്റ്റിസ് രമേശ് സിംഹയും ജസ്റ്റിസ് ബിഭു ദത്ത ഗുരുവും അടങ്ങിയ ബെഞ്ചാണ് ഈ നിർണായക വിധി പ്രസ്താവിച്ചത്. 

പ്രായപൂർത്തിയാകാത്ത പെൺകുട്ടിയെ തട്ടിക്കൊണ്ടുപോയി ബലാത്സംഗം ചെയ്ത് കൊലപ്പെടുത്തിയ കേസിൽ പ്രതികളായ രണ്ടു പേർ നൽകിയ ഹർജി പരിഗണിക്കുകയായിരുന്നു കോടതി. ഈ കേസിൽ, പ്രതികളിലൊരാളായ നീലു നാഗേഷ്, കൊല്ലപ്പെട്ട കുട്ടിയുടെ മൃതദേഹവുമായി ലൈംഗിക ബന്ധത്തിൽ ഏർപ്പെട്ടതായി കണ്ടെത്തിയിരുന്നു. എന്നാൽ, മറ്റു കുറ്റങ്ങളിൽ ഇയാൾ കുറ്റക്കാരനാണെന്ന് കണ്ടെത്തിയതിനാൽ, ബലാത്സംഗക്കുറ്റം ഒഴിവാക്കി.

'ഈ വകുപ്പുകൾ ബാധകമാകുന്നത് ഇര ജീവനോടെ ഉള്ളപ്പോൾ മാത്രമാണ്. മൃതദേഹവുമായുള്ള ലൈംഗിക ബന്ധം (നെക്രോഫിലിയ) ഏറ്റവും ഭീകരമായ കുറ്റകൃത്യങ്ങളിൽ ഒന്നാണെന്നതിൽ സംശയമില്ല, എന്നാൽ, നിലവിലെ നിയമമനുസരിച്ച്, മൃതദേഹവുമായുള്ള ലൈംഗിക ബന്ധത്തിന്റെ പേരിൽ നീലു നാഗേഷിനെ ഐപിസി 376 പ്രകാരമോ പോക്സോ നിയമപ്രകാരമോ കുറ്റക്കാരനായി കണ്ടെത്താൻ കഴിയില്ല. കാരണം, ബലാത്സംഗം നടന്നത് ഒരു മൃതദേഹത്തിലാണ്. മേൽപ്പറഞ്ഞ വകുപ്പുകൾ പ്രകാരം കുറ്റകൃത്യം സ്ഥാപിക്കുന്നതിന് ഇര ജീവനോടെ ഉണ്ടായിരിക്കണം', കോടതി കൂട്ടിച്ചേർത്തു.

പ്രായപൂർത്തിയാകാത്ത പെൺകുട്ടിയെ തട്ടിക്കൊണ്ടുപോയി ബലാത്സംഗം ചെയ്ത് കൊലപ്പെടുത്തിയ കേസിൽ പ്രതികളായ നീലു നാഗേഷും നിതിൻ യാദവും ഐപിസി, പോക്സോ നിയമങ്ങൾ പ്രകാരമുള്ള വിവിധ കുറ്റകൃത്യങ്ങളിൽ പ്രതികളാണ്. നിതിൻ യാദവിനെ ബലാത്സംഗം, തട്ടിക്കൊണ്ടുപോകൽ, കൊലപാതകം എന്നീ കുറ്റങ്ങൾക്ക് ജീവപര്യന്തം തടവിന് ശിക്ഷിച്ചു. നാഗേഷിനെ ഐപിസി 201, 34 എന്നീ വകുപ്പുകൾ പ്രകാരം കുറ്റക്കാരനായി കണ്ട് ഏഴ് വർഷം തടവിന് ശിക്ഷിച്ചു. 

ഇന്ത്യൻ നിയമത്തിലെ ഐപിസി 376-ാം വകുപ്പ് പ്രകാരം മൃതദേഹവുമായുള്ള ലൈംഗിക ബന്ധത്തെ 'ബലാത്സംഗം' എന്ന് തരംതിരിക്കുന്നില്ലെങ്കിലും, ഭരണഘടനയുടെ 21-ാം അനുച്ഛേദം മരണശേഷമുള്ള വ്യക്തിയുടെ ശരീരത്തോടുള്ള പെരുമാറ്റവുമായി ബന്ധപ്പെട്ട് അന്തസ്സോടെ മരിക്കാനുള്ള അവകാശത്തെ സംരക്ഷിക്കുന്നു. അതിനാൽ, ഐപിസി 376-ാം വകുപ്പിലെ 'ബലാത്സംഗം' എന്ന നിർവചനത്തിൽ ഉൾപ്പെടുന്നില്ലെങ്കിലും, മൃതദേഹവുമായുള്ള ലൈംഗിക ബന്ധം മരണാനന്തര അന്തസ്സിന്റെ അവകാശത്തെ ഗുരുതരമായി ലംഘിക്കുന്നുവെന്ന് പ്രോസിക്യൂഷൻ വാദിച്ചു. കോടതി രണ്ട് പ്രതികളും കുറ്റക്കാരാണെന്ന് കണ്ടെത്തുകയും അവരുടെ ശിക്ഷ ശരിവയ്ക്കുകയും ചെയ്തു.

#Necrophilia #IndianLaw #CourtVerdict #LegalNews #ChhattisgarhHighCourt #Crime