ന്യൂഡൽഹി: (KVARTHA) പാകിസ്ഥാന് പിന്തുണ അറിയിച്ചതിനു പിന്നാലെ ചൈന ആയുധങ്ങളും നൽകി. അത്യാധുനിക മിസൈലുകളാണ് ചൈന പാകിസ്ഥാൻ വ്യോമസേനയ്ക്ക് നൽകിയതെന്നാണ് റിപ്പോർട്ടുകൾ സൂചിപ്പിക്കുന്നത്. യുദ്ധകാലാടിസ്ഥാനത്തിൽ ദീർഘദൂര മിസൈലുകൾ ഉൾപ്പെടെയുള്ള ആയുധങ്ങൾ ചൈന വിതരണം ചെയ്തു. പിഎൽ-15 എന്ന ദീർഘദൂര മിസൈലുകളാണ് പ്രധാനമായും നൽകിയിരിക്കുന്നത്.

പാകിസ്ഥാൻ വ്യോമസേന അടുത്തിടെ പുറത്തിറക്കിയ ജെഎഫ്-17 ബ്ലോക്ക് III യുദ്ധവിമാനങ്ങളിൽ ഈ പിഎൽ-15 ബിയോണ്ട് വിഷ്വൽ റേഞ്ച് (ബിവിആർ) മിസൈലുകൾ ഘടിപ്പിച്ചിട്ടുണ്ട്. ചൈനീസ് പീപ്പിൾസ് ലിബറേഷൻ ആർമിയുടെ കൈവശമുള്ള ആയുധങ്ങളിൽ നിന്നാണ് ഇത് പാകിസ്ഥാന് ലഭ്യമാക്കിയതെന്നാണ് വിവരം. ഈ മിസൈലിന് ഏകദേശം 200 മുതൽ 300 കിലോമീറ്റർ വരെ ദൂരപരിധിയുണ്ട്.

അതേസമയം, തുർക്കി വ്യോമസേനയുടെ ഏഴ് സി-130 ഹെർക്കുലീസ് വിമാനങ്ങളും പാകിസ്ഥാനിൽ എത്തിച്ചേർന്നിട്ടുണ്ട്. ഇതിൽ ആറ് വിമാനങ്ങൾ കറാച്ചിയിലും ഒരു വിമാനം ഇസ്ലാമാബാദിലുമാണ് ഇറങ്ങിയത്.

അതിനിടെ, പഹൽഗാം ആക്രമണത്തിനു പിന്നിൽ പ്രവർത്തിച്ച പാകിസ്ഥാന് ചൈന പൂർണ്ണ പിന്തുണ പ്രഖ്യാപിച്ചതിൽ കടുത്ത അതൃപ്തിയിലാണ് ഇന്ത്യ. ഭീകരവാദത്തിനു പിന്തുണ നൽകുന്ന നിലപാടാണിതെന്ന വികാരമാണ് വിദേശകാര്യ വൃത്തങ്ങൾക്കുള്ളത്. ചൈനയുടെ പ്രസ്താവനയ്ക്ക് ഇന്ത്യ തിങ്കളാഴ്ച മറുപടി നൽകിയേക്കും. പാകിസ്ഥാൻ പൗരൻമാരുടെ മടക്കം അടക്കമുള്ള വിഷയങ്ങൾ തിങ്കളാഴ്ച ആഭ്യന്തര മന്ത്രാലയം യോഗം ചേർന്ന് വിലയിരുത്തും. സേനാ മേധാവിമാരുമായുള്ള ചർച്ചകൾക്ക് ശേഷം പ്രതിരോധമന്ത്രി രാജ്നാഥ് സിംഗ് ഞായറാഴ്ച പ്രധാനമന്ത്രി നരേന്ദ്ര മോദിയെ കണ്ടിരുന്നു.

ഐക്യരാഷ്ട്രരക്ഷാ സമിതി പാസാക്കിയ പ്രമേയത്തിൽ നിന്ന് ഇന്ത്യയുടെ അന്വേഷണവുമായി സഹകരിക്കണം എന്ന ഭാഗം ചൈനയുടെ സഹായത്തോടെ പാകിസ്ഥാൻ മാറ്റിയിരുന്നു. ഇതിനു പിന്നാലെയാണ് ഞായറാഴ്ച പാകിസ്ഥാൻ വിദേശകാര്യമന്ത്രി ഇഷാഖ് ധർ ചൈനീസ് വിദേശകാര്യമന്ത്രി വാങ് യീയുമായി ചർച്ച നടത്തിയത്. ഇന്ത്യ പ്രത്യാക്രമണത്തിന് തയ്യാറാകുന്നു എന്ന സൂചനകൾക്കിടെയാണ് പാകിസ്ഥാൻ വിദേശകാര്യമന്ത്രി ചൈനയുടെ സഹായം തേടിയത്.

ഈ വാർത്തയെക്കുറിച്ച് നിങ്ങളുടെ അഭിപ്രായങ്ങളും പ്രതികരണങ്ങളും താഴെ രേഖപ്പെടുത്തുക. കൂടുതൽ പേരിലേക്ക് എത്തിക്കാൻ ഷെയർ ചെയ്യുക.

China has provided advanced PL-15 long-range missiles to Pakistan, equipping their JF-17 Block III fighter jets. Simultaneously, seven Turkish Air Force C-130 Hercules aircraft have arrived in Pakistan.

#PakistanChina, #MilitaryAid, #TurkeyPakistan, #DefenseNews, #Geopolitics, #MissileTechnology