ന്യൂഡല്‍ഹി: (KVARTHA) അമ്മയുടെ മാല പൊട്ടിച്ച് ഓടിയ കള്ളന് പിന്നാലെ അരക്കിലോമീറ്ററോളം പാഞ്ഞ 14 വയസ്സുകാരി ദിവ്യ, അസാമാന്യ മനോധൈര്യത്തിലൂടെയും നിശ്ചയദാർഢ്യത്തിലൂടെയും ദേശീയ ശ്രദ്ധ നേടിയിരിക്കുകയാണ്. വികാസ്പുരി കേരള സ്‌കൂളിലെ ഒൻപതാം ക്ലാസ് വിദ്യാർഥിനിയാണ് ഈ ധീരയായ മലയാളി പെൺകുട്ടി. രാത്രി ഏഴരയോടെ നവാദ മെട്രോ സ്റ്റേഷനു സമീപത്തെ സ്റ്റഡി സെന്ററിൽ നിന്ന് ട്യൂഷൻ കഴിഞ്ഞ് അമ്മ സതി സുനിലിനൊപ്പം മടങ്ങുമ്പോളാണ് മോഷണശ്രമം നടന്നത്.

കവർച്ച നടന്നത് വീടിന് സമീപം

ഇ-റിക്ഷയിൽ കയറി ഓംവിഹാർ ഫേസ് 5-ലെ വീടിനു സമീപമെത്തിയപ്പോൾ സമയം എട്ടര കഴിഞ്ഞിരുന്നു. വീട്ടിലേക്കു നടക്കുന്നതിനിടെ എതിരെ നടന്നുവന്ന ഒരാൾ പെട്ടെന്ന് അമ്മ സതിയെ തള്ളിത്താഴെയിട്ട് കഴുത്തിൽനിന്ന് മാല പൊട്ടിച്ച് ഓടുകയായിരുന്നു. ഒരുനിമിഷം പോലും ചിന്തിച്ചു നിൽക്കാതെ ദിവ്യ അയാൾക്ക് പിന്നാലെ പാഞ്ഞു. തിരക്കേറിയ ഗലികളിലൂടെയും വാഹനങ്ങൾക്കിടിയിലൂടെയും തുടർച്ചയായി അരക്കിലോമീറ്റർ ഓടിയ ദിവ്യ മോഷ്ടാവിനെ കയ്യോടെ പിടികൂടിയ ശേഷമാണ് ഓട്ടം അവസാനിപ്പിച്ചത്.

കരാട്ടെ നൽകിയ ആത്മബലം

കരോൾബാഗ് രാമകൃഷ്ണ മിഷൻ ആശുപത്രിയിലെ സ്റ്റാഫ് നഴ്‌സും ഉത്തംനഗർ ഓംവിഹാർ ഫേസ് അഞ്ചിലെ താമസക്കാരിയുമാണ് ദിവ്യയുടെ അമ്മ സതി സുനിൽ. ഒരു പവന്റെ മാലയും ലോക്കറ്റുമാണ് മോഷ്ടാവ് പിടിച്ചുപറിച്ചത്. ‘മാല നഷ്ടപെടുമോയെന്ന ഭയത്തെക്കാൾ മകളെ മോഷ്ടാവ് ആക്രമിക്കുമോയെന്ന ഭയമായിരുന്നു തന്നെ ആ സമയം അലട്ടിയത്’, എന്ന് സതി പറഞ്ഞു. അഞ്ചു വർഷത്തിലേറെയായുള്ള കരാട്ടെ പഠനമാണ് പ്രതിരോധത്തിനുള്ള ആത്മബലം നൽകിയതെന്നാണ് ദിവ്യയുടെ അഭിപ്രായം. മോഷ്ടാവിന് പിന്നാലെ ഓടാനുള്ള ഊർജത്തിന് കാരണവും കരാട്ടെ പഠനം തന്നെയാണെന്നും ദിവ്യ ചൂണ്ടിക്കാട്ടി.

നിയമനടപടികൾക്ക് താൽപര്യമില്ല

ദിവ്യ മോഷ്ടാവിനെ പിടികൂടിയ ശേഷം നാട്ടുകാർ അറിയിച്ചതിനെത്തുടർന്ന് പോലീസ് എത്തിയെങ്കിലും തുടർന്ന് നിയമനടപടികൾക്കു താൽപര്യമില്ലെന്ന് കുടുംബം അറിയിക്കുകയായിരുന്നു. ഇതോടെ മാല തിരികെ ലഭിച്ചതായി സതി പറഞ്ഞു. എന്നാൽ ലോക്കറ്റ് എവിടെയോ നഷ്ടപ്പെട്ടു. തൻ്റെ 30 വർഷത്തെ ഡൽഹി ജീവിതത്തിൽ ആദ്യമായാണ് മോഷണശ്രമത്തിനു ഇരയാകുന്നതെന്നും സതി പറഞ്ഞു.

നവാദയിലെ പാഞ്ചജന്യം ഭാരതത്തിന്റെ കൾചറല്‍ സെന്ററിലെ ഷീലു ജോസഫിന്റെ ശിഷ്യയാണ് ദിവ്യ. സംഗീതം, ഭരതനാട്യം എന്നിവയും ദിവ്യ അഭ്യസിക്കുന്നുണ്ട്. ദിവ്യയുടെ സഹോദരി ദേവിക സുനിൽ വൃന്ദാവൻ രാമകൃഷ്ണ മിഷൻ ആശുപത്രിയിലെ നഴ്‌സിങ് വിദ്യാർഥിനിയാണ്. ആലപ്പുഴ മുട്ടാർ സ്വദേശികളാണ് ഈ കുടുംബം. .
 

14 വയസ്സുകാരിയായ ദിവ്യയുടെ ധൈര്യം നിങ്ങളെ എത്രമാത്രം പ്രചോദിപ്പിച്ചു? കമൻ്റ് ചെയ്യുക.

Article Summary: 14-year-old Divya chases and catches the thief who snatched her mother's gold chain.

#DelhiGirl #BraveGirl #ChainSnatching #KarateKid #Malayali #Divya