Crisis | ബംഗ്ലാദേശിന്റെ കടിഞ്ഞാൺ ഏറ്റെടുത്ത സൈനിക മേധാവി വഖാർ ഉസ് സമാൻ ആരാണ്?

ധാക്ക: (KVARTHA) ബംഗ്ലാദേശ് അപ്രതീക്ഷിതമായ ഒരു രാഷ്ട്രീയ പ്രതിസന്ധിയുടെ വക്കിലാണ്. പ്രധാനമന്ത്രി ഷെയ്ഖ് ഹസീനയുടെ രാജിക്ക് പിന്നാലെ, രാജ്യത്തിന്റെ കടിഞ്ഞാൺ ഏറ്റെടുത്തിരിക്കുന്നത് കരസേനാ മേധാവി വഖാർ ഉസ് സമാൻ ആണ്. അദ്ദേഹത്തിന്റെ നേതൃത്വത്തിൽ ഒരു ഇടക്കാല സർക്കാർ രൂപീകരിക്കാനുള്ള തീരുമാനം ലോകത്തെ ഞെട്ടിച്ചിരിക്കുകയാണ്. എന്നാൽ സൈന്യം രാഷ്ട്ര ഭരണത്തിൽ ഒരു പങ്ക് വഹിക്കുമോ എന്ന് വ്യക്തമല്ല.

❗🔥🇧🇩 - The military seizes power in Bangladesh after coup against PM Hasina.

Army Chief, General Waker-Uz-Zaman, announces he will lead a military interim government.

Protesters celebrate Bangladesh's departure of prime minister. pic.twitter.com/VVC448jbIG

— 🔥🗞The Informant (@theinformant_x) August 5, 2024

ആരാണ് ജനറൽ വഖാർ ഉസ് സമാൻ?

നാല് പതിറ്റാണ്ടുകളോളം സൈന്യത്തിൽ സേവനമനുഷ്ഠിച്ച വഖാർ ഉസ് സമാൻ, അനുഭവ സമ്പന്നനായ ഒരു സൈനിക ഉദ്യോഗസ്ഥനാണ്. 1966-ൽ ധാക്കയിലാണ് ജനിച്ചത്. വിവിധ തലത്തിലുള്ള കമാൻഡ് പദവികൾ വഹിച്ച അദ്ദേഹം, യുഎൻ സമാധാന സേനയിലും സേവനം അനുഷ്ഠിച്ചിട്ടുണ്ട്. ബംഗ്ലാദേശിന്റെ പ്രതിരോധ തന്ത്രങ്ങളും അന്താരാഷ്ട്ര സമാധാന പരിപാലനവും അദ്ദേഹത്തിന്റെ പ്രധാന താൽപ്പര്യ മേഖലകളായിരുന്നു. 

ബംഗ്ലാദേശ് മിലിട്ടറി അക്കാദമിയിൽ നിന്ന് പഠനം പൂർത്തിയാക്കിയ അദ്ദേഹം, യുകെയിലെ ജോയിൻറ് സർവീസസ് കമാൻഡ് ആൻഡ് സ്റ്റാഫ് കോളേജ് ഉൾപ്പെടെ നിരവധി പ്രശസ്ത സ്ഥാപനങ്ങളിൽ ഉന്നത പഠനം നടത്തിയിട്ടുണ്ട്. ആർമി മെഡൽ ഓഫ് ഗ്ലോറി, എക്‌സ്‌ട്രാഓർഡിനറി സർവീസ് മെഡൽ തുടങ്ങിയ നിരവധി പുരസ്കാരങ്ങൾക്ക് അർഹനായ അദ്ദേഹം, സൈന്യത്തെ നവീകരിക്കുന്നതിൽ നിർണായക പങ്കു വഹിച്ചിട്ടുണ്ട്. 

കരസേനാ മേധാവിയാകുന്നതിന് മുമ്പ്, ആറ് മാസത്തിലധികം ജനറൽ സ്റ്റാഫ് ചീഫ് ആയിരുന്നു. പ്രധാനമന്ത്രിയുടെ ഓഫീസിന് കീഴിലുള്ള ആംഡ് ഫോഴ്‌സ് ഡിവിഷനിൽ പ്രിൻസിപ്പൽ സ്റ്റാഫ് ഓഫീസറായി സേവനമനുഷ്ഠിച്ച അദ്ദേഹം ഹസീനയുമായി അടുത്ത് പ്രവർത്തിച്ചിട്ടുണ്ട്. 1997 മുതൽ 2000 വരെ കരസേനാ മേധാവിയായിരുന്ന ജനറൽ മുഹമ്മദ് മുസ്തഫിസുർ റഹ്മാൻ്റെ മകൾ സറഹ്നാസ് കമാലിക സമനെയാണ് വിവാഹം കഴിച്ചത്.

ബംഗ്ലാദേശ് നിർണായക വഴിത്തിരിവിൽ 

ഒരു സൈനിക നേതാവിൽ നിന്ന് ഒരു രാഷ്ട്രത്തലവനെ പ്രതീക്ഷിക്കുന്ന വെല്ലുവിളികൾ വളരെ വലുതാണ്. ഏതായാലും ജനറൽ വഖാർ ഉസ് സമാൻ, രാജ്യത്തെ സ്ഥിരത പുനസ്ഥാപിക്കുകയും അക്രമം അവസാനിപ്പിക്കുകയും ചെയ്യുമെന്ന് വാഗ്ദാനം ചെയ്തിട്ടുണ്ട്. എന്നാൽ ഒരു സൈനിക നേതൃത്വം രാജ്യത്തെ എങ്ങനെ മുന്നോട്ട് നയിക്കുമെന്നത് കാത്തിരുന്ന് കാണേണ്ടതുണ്ട്. ബംഗ്ലാദേശ് ഇപ്പോൾ ഒരു നിർണായക വഴിത്തിരിവിലാണ്. ഈ സംഭവങ്ങൾ ബംഗ്ലാദേശിലെ രാഷ്ട്രീയ, സാമൂഹിക സാമ്പത്തിക രംഗങ്ങളെ എങ്ങനെ ബാധിക്കുമെന്ന് വരും ദിവസങ്ങളിലെ സംഭവവികാസങ്ങൾ തന്നെ വ്യക്തമാക്കും.

Sheikh Hasina's son urged security forces to block ‘any unelected government’ from coming to power, while Army General Waker-Uz-Zaman is set to speak to the nation imminently #BangladeshBleeding #Protests pic.twitter.com/bDsWUq0R9h

— Uncensored News (@Uncensorednewsw) August 5, 2024