വാഹനം പിന്തുടർന്നെത്തി ഷാജൻ സ്കറിയക്ക് മർദനം; തൊടുപുഴയിൽ വെച്ച് ആക്രമണം; കുറ്റക്കാരെ നിയമത്തിന് മുന്നിൽ കൊണ്ടുവരണമെന്ന് കോം ഇൻഡ്യ

തൊടുപുഴ: (KVARTHA) ഓൺലൈൻ ചാനലായ മറുനാടൻ മലയാളിയുടെ ഉടമ ഷാജൻ സ്കറിയക്ക് നേരെ ആക്രമണം. ശനിയാഴ്ച വൈകുന്നേരം ഇടുക്കിയിലെ ഒരു വിവാഹച്ചടങ്ങിൽ പങ്കെടുത്തശേഷം കാറിൽ മടങ്ങിവരുന്ന വഴിയിലാണ് ഷാജന് നേരെ ആക്രമണമുണ്ടായത്. തൊടുപുഴ മങ്ങാട്ടുകവലയിൽ വെച്ചാണ് സംഭവം.

ഷാജനെ വാഹനത്തിൽ പിന്തുടർന്നെത്തിയ മൂന്നംഗ സംഘമാണ് ആക്രമണം നടത്തിയത്. ഇവർ സഞ്ചരിച്ച കാറിടിച്ച് ഷാജൻ്റെ വാഹനം ഇടിച്ചുതെറിപ്പിക്കാൻ ശ്രമിച്ചു. ആക്രമണത്തിൽ ഷാജൻ സഞ്ചരിച്ച കാറിന് കേടുപാടുകൾ സംഭവിച്ചു. കാറിലെ സ്റ്റിയറിംഗ് വീലിൽ ഇടിച്ച് ഷാജൻ്റെ മുഖത്തും പരിക്കേറ്റു. അദ്ദേഹത്തിൻ്റെ മൂക്കിലുണ്ടായ പരിക്ക് ഗുരുതരമല്ലെന്ന് പോലീസ് അറിയിച്ചു.

മർദനത്തിൽ പരിക്കേറ്റ ഷാജനെ പോലീസാണ് തൊടുപുഴ ജില്ലാ ആശുപത്രിയിൽ എത്തിച്ചത്. നിലവിൽ ഇവിടെ ചികിത്സയിലാണ്. ആരാണ് ആക്രമണത്തിന് പിന്നിലെന്ന് വ്യക്തമല്ലെന്ന് പോലീസ് അറിയിച്ചു. അക്രമികളെ തിരിച്ചറിയാൻ കഴിഞ്ഞിട്ടില്ലെന്ന് ഷാജൻ പോലീസിന് നൽകിയ പ്രാഥമിക മൊഴിയിൽ പറഞ്ഞു. സംഭവത്തെക്കുറിച്ച് വിശദമായ മൊഴി രേഖപ്പെടുത്തിയ ശേഷം കേസെടുക്കുമെന്ന് പോലീസ് അറിയിച്ചു.

സംഭവത്തിൽ സമഗ്രമായ അന്വേഷണം നടത്തി കുറ്റക്കാരെ നിയമത്തിന് മുന്നിൽ കൊണ്ടുവരണമെന്ന് കോൺഫഡറേഷൻ ഓഫ് ഓൺലൈൻ മീഡിയ (കോം ഇന്ത്യ) ആവശ്യപ്പെട്ടു. 'മാധ്യമ പ്രവർത്തകരുടെ നേരെയുള്ള ഇത്തരം ശാരീരിക അക്രമം ജനാധിപത്യത്തിൽ ഒരിക്കലും അംഗീകരിക്കാനാവില്ല. മാധ്യമ സ്വാതന്ത്ര്യത്തിന് നേരെയുള്ള ആക്രമണമായിട്ടാണ് ഈ സംഭവം കാണേണ്ടത്' - കോം ഇന്ത്യ പ്രസിഡൻ്റ് സാജ് കുര്യൻ, ജനറൽ സെക്രട്ടറി കെ.കെ. ശ്രീജിത് എന്നിവർ പ്രസ്താവനയിൽ പറഞ്ഞു.

ഷാജൻ സ്കറിയക്ക് നേരെ നടന്ന ആക്രമണത്തെക്കുറിച്ചുള്ള നിങ്ങളുടെ അഭിപ്രായം അഭിപ്രായം രേഖപ്പെടുത്തുക.

Article Summary: Online media head Shajan Skaria was attacked by a gang in Thodupuzha.

#ShajanSkaria, #Attack, #Thodupuzha, #Kerala, #Crime, #OnlineMedia