വന്ദേഭാരത് ഉദ്ഘാടനത്തിൽ ആർഎസ്എസ് ഗണഗീതം; കാവിവത്കരണ ശ്രമമെന്ന് മുഖ്യമന്ത്രിയും കെസി വേണുഗോപാലും

കൊച്ചി: (KVARTHA) കേരളത്തിന് അനുവദിച്ച മൂന്നാമത്തെ വന്ദേഭാരത് എക്സ്പ്രസ് ട്രെയിനിന്റെ ഉദ്ഘാടനവുമായി ബന്ധപ്പെട്ട് ട്രെയിനിനുള്ളിൽ കുട്ടികൾ ആർഎസ്എസ് ഗണഗീതം പാടിയ സംഭവം വലിയ രാഷ്ട്രീയ വിവാദത്തിന് തിരികൊളുത്തി. സംഭവത്തിൽ സംസ്ഥാന മുഖ്യമന്ത്രി പിണറായി വിജയനും എഐസിസി ജനറൽ സെക്രട്ടറി കെസി വേണുഗോപാൽ എംപിയും ഉൾപ്പെടെയുള്ള നേതാക്കൾ രൂക്ഷമായ വിമർശനവുമായി രംഗത്തെത്തി. ശനിയാഴ്ച എറണാകുളം-ബെംഗളൂരു വന്ദേഭാരതിൻ്റെ കന്നിയാത്രയിൽ പങ്കെടുത്ത സ്‌കൂൾ വിദ്യാർഥികളാണ് ഗീതം ആലപിച്ചത്. ദക്ഷിണ റെയിൽവേ തങ്ങളുടെ ഔദ്യോഗിക സാമൂഹിക മാധ്യമങ്ങൾ വഴി ഇവ പങ്കുവെക്കുകയും ചെയ്തതോടെയാണ് സംഭവം വിവാദമായത്.

തീവ്ര ഹിന്ദുത്വ ഒളിച്ചുകടത്തലെന്ന് മുഖ്യമന്ത്രി

വിദ്യാർഥികളെക്കൊണ്ട് ആർഎസ്എസ് ഗണഗീതം പാടിപ്പിച്ച ദക്ഷിണ റെയിൽവേയുടെ നടപടി അങ്ങേയറ്റം പ്രതിഷേധാർഹമാണെന്ന് മുഖ്യമന്ത്രി പിണറായി വിജയൻ ചൂണ്ടിക്കാട്ടി. 'അപരമത വിദ്വേഷവും വർഗീയ വിഭജന രാഷ്ട്രീയവും നിരന്തരം പ്രസരിപ്പിക്കുന്ന ആർഎസ്എസിന്റെ ഗാനം സർക്കാരിന്റെ ഔദ്യോഗിക പരിപാടിയിൽ ഉൾപ്പെടുത്തിയത് ഭരണഘടനാതത്വങ്ങളുടെ ലംഘനമാണ്,' മുഖ്യമന്ത്രി പറഞ്ഞു. രാജ്യത്തെ ഏറ്റവും വലിയ പൊതുമേഖലാ സ്ഥാപനമായ റെയിൽവേയെ പോലും തങ്ങളുടെ വർഗീയ രാഷ്ട്രീയ പ്രചാരണത്തിനായി സംഘപരിവാർ ഉപയോഗിക്കുന്നത് അംഗീകരിക്കാൻ കഴിയില്ല. 'തീവ്ര ഹിന്ദുത്വ രാഷ്ട്രീയത്തിൻ്റെ ഒളിച്ചു കടത്തലാണ് വന്ദേഭാരതിൻ്റെ ഉദ്ഘാടന ചടങ്ങിൽ കണ്ടത്. ഇതു തിരിച്ചറിഞ്ഞുകൊണ്ട് മുഴുവൻ ജനങ്ങളുടേയും പ്രതിഷേധമുയരണം,' മുഖ്യമന്ത്രി കൂട്ടിച്ചേർത്തു.

ദേശഭക്തി ഗാനമെന്ന കുറിപ്പോടെ ഈ ഗണഗീതം സാമൂഹിക മാധ്യമങ്ങളിൽ പങ്കുവെച്ച ദക്ഷിണ റെയിൽവേ സ്വയം പരിഹാസ്യരാവുന്നതിനൊപ്പം ഇന്ത്യൻ ദേശീയ പ്രസ്ഥാനത്തെ അപഹസിക്കുക കൂടിയാണ് ചെയ്തതെന്നും മുഖ്യമന്ത്രി കുറ്റപ്പെടുത്തി. സ്വാതന്ത്ര്യ സമരകാലത്ത് രാജ്യത്തിൻ്റെ മതേതര ദേശീയതയുടെ ആണിക്കല്ലായി വർത്തിച്ച റെയിൽവേ, സ്വാതന്ത്ര്യ സമരത്തെ ഒറ്റിയ ആർഎസ്എസിൻ്റെ വർഗ്ഗീയ അജണ്ടയ്ക്കു കുടപിടിക്കുന്നത് അംഗീകരിക്കാനാവില്ല.

കാവിവത്കരണ ശ്രമമെന്ന് കെസി വേണുഗോപാൽ

രാജ്യത്തെ പൊതുസംവിധാനത്തെ കാവിവത്കരിച്ച്, ആർഎസ്എസിന്റെ നുകത്തിൽ കെട്ടാനുള്ള നീചമായ ശ്രമത്തിൻ്റെ ഭാഗമാണ് ഈ നടപടിയെന്ന് എഐസിസി ജനറൽ സെക്രട്ടറി കെ സി വേണുഗോപാൽ എംപി കുറ്റപ്പെടുത്തി. മോദി ഭരണകൂടം സർക്കാർ സംവിധാനങ്ങളെ സംഘിവത്കരിക്കുകയാണ്. ഇത് അങ്ങേയറ്റം പ്രതിഷേധാർഹമാണെന്നും അദ്ദേഹം പറഞ്ഞു. 'ദേശീയഗാനം മുഴങ്ങിക്കേൾക്കേണ്ട വേദികളിൽ ഗണഗീതം പാടുകയും പ്രചരിപ്പിക്കുകയും ചെയ്യുന്നത് പൊതുബോധം സൃഷ്ടിക്കുന്നതിന്റെ ഭാഗം കൂടിയാണ്,' കെസി വേണുഗോപാൽ അഭിപ്രായപ്പെട്ടു.

കുട്ടികളെ വർഗീയതയിലേക്ക് തള്ളിവിട്ട്, ഔദ്യോഗിക സംവിധാനങ്ങളെ ദുരുപയോഗം ചെയ്ത് കേന്ദ്ര സർക്കാർ നടപ്പിലാക്കുന്ന വെറുപ്പിൻ്റെ രാഷ്ട്രീയത്തെ ചെറുത്തുതോൽപ്പിക്കണ്ടേതാണെന്നും അദ്ദേഹം കൂട്ടിച്ചേർത്തു. അതേസമയം, സംഭവം വിവാദമായതോടെ പോസ്റ്റ് ദക്ഷിണ റെയിൽവേ തങ്ങളുടെ സാമൂഹിക മാധ്യമങ്ങളിൽ നിന്ന് നീക്കം ചെയ്തിട്ടുണ്ട്.

ഡിവൈഎഫ്ഐയുടെ പ്രതിഷേധം

വന്ദേഭാരതിൽ വിദ്യാർഥികളെക്കൊണ്ട് ആർഎസ്എസ് ഗണഗീതം പാടിപ്പിച്ചതിൽ പ്രതിഷേധിച്ച് ഡിവൈഎഫ്ഐ രംഗത്തെത്തി. ഭരണഘടന ഉയർത്തിക്കാട്ടിയും ദേശീയഗാനം ആലപിച്ചുമാണ് ഡിവൈഎഫ്ഐ പ്രതിഷേധം അറിയിച്ചത്. എറണാകുളം സൗത്ത് റെയിൽവേ സ്റ്റേഷനിലേക്ക് നടത്തിയ മാർച്ചും ധർണയും ജില്ലാ സെക്രട്ടറി എ ആർ രഞ്ജിത്ത് ഉദ്ഘാടനം ചെയ്‌തു. 'സതേൺ റെയിൽവേ ആരുടെയും തറവാട്ടുസ്വത്തല്ലെന്നും ആർഎസ്എസിന്റെ വർഗീയ അജൻഡയ്ക്ക് കൂട്ടുനിൽക്കുന്ന കേന്ദ്ര സർക്കാർ ഉദ്യോഗസ്ഥരെ ജനം തെരുവിൽ നേരിടും,' എ ആർ രഞ്ജിത്ത് പറഞ്ഞു.

ഈ വിഷയം കൂടുതൽ പേരിലേക്ക് എത്തിക്കുന്നതിനായി വാർത്ത ഷെയർ ചെയ്യുക.

Article Summary: Kerala CM and KC Venugopal condemn RSS Ganageetham in Vande Bharat inaugural run, alleging saffronisation.

#VandeBharat #RSSGanageetham #Saffronisation #PinarayiVijayan #KCVenugopal #KeralaPolitics