സപ്ലൈക്കോ വഴി ഓണം സമൃദ്ധമാകും; വെളിച്ചെണ്ണ വില കുറച്ചു

തിരുവനന്തപുരം: (KVARTHA) സാധാരണക്കാരന് കീശകീറാതെ ഓണം ആഘോഷിക്കാമെന്ന് മുഖ്യമന്ത്രി പിണറായി വിജയൻ വ്യക്തമാക്കി. തിരുവനന്തപുരം പുത്തരിക്കണ്ടം മൈതാനത്ത് നടന്ന സപ്ലൈക്കോ ഓണം ഫെയറിന്റെ സംസ്ഥാനതല ഉദ്ഘാടനം നിർവഹിച്ച് സംസാരിക്കുകയായിരുന്നു അദ്ദേഹം. ഓണക്കാലത്ത് വിലക്കയറ്റം തടയാൻ സമഗ്രമായ വിപണി ഇടപെടലാണ് സർക്കാർ നടത്തുന്നത്. ജനങ്ങൾക്ക് ഓണം സമൃദ്ധമായി ആഘോഷിക്കാനാകണം എന്നതാണ് ഇത്തരം ഓണച്ചന്തകളുടെ പ്രധാന ലക്ഷ്യമെന്നും മുഖ്യമന്ത്രി കൂട്ടിച്ചേർത്തു.

സെപ്തംബർ നാല് വരെ ഓണ ഫെയറിലൂടെ പൊതുജനങ്ങൾക്ക് ഭക്ഷ്യവസ്തുക്കൾ വാങ്ങാം. പൊതുവിപണിയുമായി താരതമ്യം ചെയ്യുമ്പോൾ സപ്ലൈക്കോയിൽ 35 ശതമാനം വരെ വിലക്കുറവുണ്ടാകും. എല്ലാ ജില്ലാ കേന്ദ്രങ്ങളിലും മെഗാ ഫെയറുകളും 140 നിയമസഭാ മണ്ഡലങ്ങളിൽ ഓഗസ്റ്റ് 31 മുതൽ സെപ്‌തംബർ നാല് വരെ നീണ്ടുനിൽക്കുന്ന ഫെയറുകളും സംഘടിപ്പിക്കുന്നുണ്ട്.

ഓണത്തിനായി സപ്ലൈക്കോ രണ്ടര ലക്ഷത്തോളം ക്വിന്റൽ ഭക്ഷ്യധാന്യങ്ങളാണ് സംഭരിച്ചിരിക്കുന്നത്. ഓണക്കാലത്ത് എട്ട് കിലോ സബ്‌സിഡി അരിക്ക് പുറമെ 94 ലക്ഷം കാർഡ് ഉടമകൾക്കും 25 രൂപ നിരക്കിൽ കാർഡൊന്നിന് 20 കിലോ പച്ചരിയോ/പുഴുക്കലരിയോ വാങ്ങാൻ സാധിക്കും. കൂടാതെ, സബ്‌സിഡി നിരക്കിൽ നൽകുന്ന മുളകിന്റെ അളവ് അര കിലോയിൽ നിന്ന് ഒരു കിലോയായി വർദ്ധിപ്പിച്ചിട്ടുണ്ട്.

പ്രമുഖ റീറ്റെയ്ൽ ശൃംഖലകളോട് കിടപിടിക്കുന്ന വിധത്തിൽ ഇത്തവണ ബ്രാൻഡഡ് എഫ്എംസിജി ഉൽപ്പന്നങ്ങളും സപ്ലൈക്കോയിൽ ലഭ്യമാണ്. 250-ൽ അധികം ബ്രാൻഡഡ് നിത്യോപയോഗ സാധനങ്ങൾക്ക് ഓഫറുകളും വിലക്കുറവും ലഭിക്കും. ജൂലൈ മാസത്തിൽ 168 കോടി രൂപയുടെ വിറ്റുവരവാണ് സപ്ലൈക്കോയ്ക്ക് ഉണ്ടായത്. കഴിഞ്ഞ മാസം 60 കോടി രൂപയുടെ സബ്‌സിഡി ഉൽപ്പന്നങ്ങളാണ് സപ്ലൈക്കോ വഴി വിതരണം ചെയ്തത്. ഏകദേശം 32 ലക്ഷത്തോളം ഉപഭോക്താക്കളാണ് കഴിഞ്ഞ മാസം സപ്ലൈക്കോ വിൽപ്പനശാലകളെ ആശ്രയിച്ചത്. ഓണത്തിരക്ക് ആരംഭിച്ച ഈ മാസം 22 വരെ 180 കോടി രൂപയുടെ വിറ്റുവരവുണ്ടായി. ഓഗസ്റ്റ് 11 മുതൽ എല്ലാ പ്രവൃത്തി ദിവസങ്ങളിലും പ്രതിദിന വിറ്റുവരവ് പത്ത് കോടിക്ക് മുകളിലാണ്. ഈ മാസം 22 വരെ 30 ലക്ഷത്തോളം ഉപഭോക്താക്കളാണ് സപ്ലൈക്കോ വിൽപ്പനശാലകൾ സന്ദർശിച്ചത്.

സപ്ലൈക്കോ വെളിച്ചെണ്ണ വില കുറച്ചു

സാധാരണക്കാർക്ക് ആശ്വാസമായി സപ്ലൈക്കോ സബ്‌സിഡി വെളിച്ചെണ്ണയുടെ വില കുറച്ചു. സബ്‌സിഡി വെളിച്ചെണ്ണയുടെ വില ലിറ്ററിന് 10 രൂപ കുറച്ചതായി ഭക്ഷ്യമന്ത്രി ജി.ആർ.അനിൽ തിങ്കളാഴ്ച അറിയിച്ചു. ഇതോടെ നേരത്തെ 349 രൂപയായിരുന്ന സബ്‌സിഡി വെളിച്ചെണ്ണ തിങ്കളാഴ്ച മുതൽ 339 രൂപക്ക് ലഭിക്കും. സബ്‌സിഡി ഇല്ലാത്ത വെളിച്ചെണ്ണയുടെ വില 40 രൂപ കുറച്ച് 389 രൂപയാക്കിയെന്നും മന്ത്രി പറഞ്ഞു.

ഓണക്കാലത്ത് കാർഡ് ഒന്നിന് രണ്ട് ലീറ്റർ വെളിച്ചെണ്ണ കുറഞ്ഞ നിരക്കിൽ ഉറപ്പാക്കാനാണ് ഭക്ഷ്യവകുപ്പ് ക്രമീകരണം ഏർപ്പെടുത്തുന്നത്. ഓഗസ്റ്റ് 25 തിങ്കളാഴ്ച മുതൽ സെപ്റ്റംബറിലെ സബ്‌സിഡി ഉൽപ്പന്നങ്ങൾ ഓണം പ്രമാണിച്ച് വാങ്ങാനുള്ള സൗകര്യവും നൽകിയിട്ടുണ്ടെന്ന് മന്ത്രി അറിയിച്ചു. മഞ്ഞ കാർഡ് ഉടമകൾക്കും ക്ഷേമ സ്ഥാപനങ്ങളിലെ അന്തേവാസികൾക്കും ലഭിക്കുന്ന സൗജന്യ ഓണക്കിറ്റ് വിതരണത്തിന്റെ ഉദ്ഘാടനം ചൊവ്വാഴ്ച രാവിലെ പട്ടത്ത് നടക്കും. തുണി സഞ്ചിയടക്കം 15 ഇനം സാധനങ്ങളാണ് കിറ്റിലുള്ളത്.

സപ്ലൈക്കോയുടെ ഈ തീരുമാനത്തെക്കുറിച്ച് നിങ്ങൾക്ക് എന്താണ് പറയാനുള്ളത്? നിങ്ങളുടെ അഭിപ്രായം താഴെ കമൻ്റ് ചെയ്യൂ.

Article Summary: Kerala's Supplyco cuts coconut oil prices for Onam.

 #Supplyco #Kerala #Onam #PriceCut #GovtScheme #KeralaGovt