രാഹുൽ മാങ്കൂട്ടത്തിലിനെതിരെ പുതിയ ആരോപണം: ബംഗളൂരു സ്വദേശിനിയുടെ പരാതി കെപിസിസി പോലീസിന് കൈമാറി; എംഎൽഎ ഒളിവിൽ തുടരുന്നു

തിരുവനന്തപുരം: (KVARTHA) യൂത്ത് കോൺഗ്രസ് അധ്യക്ഷനും എം.എൽ.എയുമായ രാഹുൽ മാങ്കൂട്ടത്തിലിനെതിരെ ബലാത്സംഗ പരാതിയുമായി മറ്റൊരു യുവതി കൂടി രംഗത്ത്. ബംഗളൂരുവിൽ താമസിക്കുന്ന 23 വയസ്സുകാരിയാണ് വിവാഹവാഗ്ദാനം നൽകി ക്രൂരമായി ചൂഷണം ചെയ്തുവെന്നും മാനസികമായി പീഡിപ്പിച്ചു എന്നും ആരോപിച്ച് പരാതി നൽകിയിരിക്കുന്നത്. ഇവർ എഐസിസി, രാഹുൽ ഗാന്ധി, സോണിയാ ഗാന്ധി, കെപിസിസി പ്രസിഡൻ്റ് എന്നിവർക്ക് പരാതി അയച്ചതായാണ് വിവരം.

വിഷയത്തിൻ്റെ ഗൗരവം കണക്കിലെടുത്ത് കെപിസിസി നേതൃത്വം ഈ പരാതി പോലീസ് മേധാവിക്ക് കൈമാറിയതായി അറിയിച്ചു. തിങ്കളാഴ്ച ഉച്ചയ്ക്ക് 12.47-നാണ് പരാതി ലഭിച്ചതെന്നും, നിയമപരമായി മുന്നോട്ട് പോകാൻ താൽപര്യമില്ലാതിരുന്നതിനെ തുടർന്നാണ് യുവതി പാർട്ടി നേതൃത്വത്തിന് പരാതി നൽകിയതെന്നും കെപിസിസി വ്യക്തമാക്കുകയുണ്ടായി. എന്നാൽ, ഇത്തരത്തിലുള്ള പരാതി പോലീസിനാണ് നൽകേണ്ടതെന്നും, പരാതിയിൽ എന്ത് നടപടിയാണ് സ്വീകരിക്കേണ്ടതെന്ന് നിയമവിദഗ്ധരുമായി സംസാരിക്കുമെന്നും കോൺഗ്രസ് അറിയിക്കുകയുണ്ടായി.

പരാതിപ്രകാരം സംഭവം 2023 ഡിസംബറിൽ

2023 ഡിസംബറിലാണ് പരാതിക്കിടയാക്കിയ സംഭവം നടന്നതെന്ന് യുവതിയുടെ മൊഴിയിൽ പറയുന്നു. ഇൻസ്റ്റാഗ്രാം വഴി പരിചയം സ്ഥാപിച്ച ശേഷം രാഹുൽ ടെലഗ്രാം (Telegram) നമ്പർ ആവശ്യപ്പെടുകയും തുടർച്ചയായി വിവാഹ വാഗ്ദാനം നൽകുകയും ചെയ്തുവെന്ന് പരാതിയിൽ ആരോപിക്കുന്നു. വിവാഹക്കാര്യം വീട്ടുകാരെ അറിയിച്ചെങ്കിലും ആദ്യം എതിർത്തു. എന്നാൽ, രാഹുൽ യൂത്ത് കോൺഗ്രസ് അദ്ധ്യക്ഷനായതിന് പിന്നാലെ കുടുംബം ഈ ബന്ധത്തിന് സമ്മതിക്കുകയായിരുന്നു.

അവധിക്ക് നാട്ടിൽ വരുന്നതിനിടെ തനിയെ കാണണം എന്ന രാഹുലിൻ്റെ ആവശ്യപ്രകാരം സുഹൃത്തിൻ്റെ കാറിൽ ഫെനി നൈനാൻ എന്നയാൾ ഓടിച്ച കാറിൽ രാഹുൽ എത്തി. ഒറ്റപ്പെട്ട സ്ഥലത്തെ ഹോംസ്റ്റേയിൽ എത്തിച്ച യുവതിയെ ബലംപ്രയോഗിച്ച് ശാരീരികബന്ധത്തിന് വിധേയയാക്കി എന്നാണ് യുവതിയുടെ ആരോപണം. പീഡനം നടന്നത് സുഹൃത്തിൻ്റെ വീട്ടിൽ വെച്ചായിരുന്നെന്നും, ഈ സുഹൃത്തിൻ്റെ അറിവോടെയാണ് പീഡനം നടന്നതെന്നും യുവതിയുടെ പരാതിയിൽ വ്യക്തമാക്കുന്നു.

ഒഴിഞ്ഞുമാറാൻ രാഷ്ട്രീയ ന്യായീകരണം

ലൈം ഗികമായി പീഡിപ്പിച്ച ശേഷം ബന്ധത്തിൽ നിന്നും രാഹുൽ പിന്മാറിയെന്നും, ഇതിനെത്തുടർന്ന് താൻ മാനസികമായും ശാരീരികമായും തകർന്നുവെന്നും യുവതിയുടെ പരാതിയിൽ പറയുന്നു. ഗർഭിണിയാകണം എന്ന് രാഹുൽ തന്നോടും ആവശ്യപ്പെട്ടതായും പരാതിയിലുണ്ട്. വിവാഹം കഴിക്കണം എന്ന് ആവശ്യപ്പെട്ടപ്പോൾ, 'ഭാര്യയും കുഞ്ഞുമുണ്ടായാൽ രാഷ്ട്രീയഭാവിയെ ബാധിക്കും, താനിപ്പോൾ നിർണായക ഘട്ടത്തിലാണ്' എന്നെല്ലാമാണ് രാഹുൽ മാങ്കൂട്ടത്തിലിൻ്റെ ഒഴിഞ്ഞുമാറൽ ന്യായീകരണങ്ങളെന്നും യുവതി ആരോപിക്കുന്നു.

ഒളിവിൽ കഴിയുന്ന രാഹുലിനായി തിരച്ചിൽ ഊർജ്ജിതം

അതേസമയം, ആദ്യ ലൈംഗിക പീഡന പരാതിയിൽ ഒളിവിൽ കഴിയുന്ന രാഹുൽ മാങ്കൂട്ടത്തിലിനെ കണ്ടെത്താൻ പോലീസ് അന്വേഷണം ഊർജ്ജിതമാക്കിയിരിക്കുകയാണ്. രാഹുൽ നൽകിയ മുൻകൂർ ജാമ്യാപേക്ഷ അടുത്ത ദിവസം പരിഗണനയ്ക്ക് വരാനിരിക്കെ, കസ്റ്റഡിയിലെടുക്കാനാണ് പോലീസ് തലപ്പത്തുനിന്നുള്ള നിർദേശം. ജാമ്യാപേക്ഷ പരിഗണനയിലിരിക്കുമ്പോൾ അറസ്റ്റിന് തടസമില്ലെന്ന് പോലീസിന് നിയമോപദേശം ലഭിച്ചിരുന്നു.

രാഹുൽ പാലക്കാട് നിന്ന് മുങ്ങിയ ചുവന്ന പോളോ കാർ സിനിമ നടിയുടേത് തന്നെയാണെന്ന് അന്വേഷണ സംഘം സ്ഥിരീകരിച്ചിട്ടുണ്ട്. അടുത്തിടെ രാഹുലിൻ്റെ ഭവന നിർമ്മാണ പദ്ധതിയുടെ ഉദ്ഘാടനത്തിനെത്തിയ നടിയുടേതാണ് ഈ കാർ. നിലവിൽ ബെംഗളൂരുവിലുള്ള നടിയെ ചോദ്യം ചെയ്യാൻ സാധ്യതയുണ്ടെന്നും അന്വേഷണ സംഘം അറിയിച്ചു. പാലക്കാട്ടെ മുതിർന്ന കോൺഗ്രസ് നേതാവിൻ്റെ വീട്ടിലാണ് രണ്ട് ദിവസം കാർ കിടന്നതെന്നാണ് പോലീസിന് ലഭിച്ച സൂചന. രാഹുലിനെ രക്ഷപ്പെടാൻ നേതാവ് സഹായം ചെയ്തോയെന്നും അന്വേഷണ സംഘം പരിശോധിക്കും.

രാഹുൽ മാങ്കൂട്ടത്തിലിനെതിരായ ആരോപണങ്ങളെക്കുറിച്ച് നിങ്ങളുടെ അഭിപ്രായം കമൻ്റ് ചെയ്യുക.

Article Summary: MLA Rahul Mamkoottathil faces new sexual exploitation complaint; KPCC forwards it to police.

#RahulMamkoottathil #YouthCongress #SexualHarassment #KeralaPolitics #MLAInHiding #CrimeNews