തിരഞ്ഞെടുപ്പ് കഴിഞ്ഞിട്ടും എൽഡിഎഫ് സ്ഥാനാർത്ഥി ജയിലിൽ തന്നെ! പോലീസ് ഉദ്യോഗസ്ഥരെ ബോംബെറിഞ്ഞ് കൊലപ്പെടുത്താൻ ശ്രമിച്ചെന്ന കേസ്: വി.കെ നിഷാദിൻ്റെ ജാമ്യാപേക്ഷ ജനുവരിയിലേക്ക് നീട്ടി

പയ്യന്നൂർ: (KVARTHA) പോലീസ് വാഹനത്തിന് ബോംബെറിഞ്ഞ് പോലീസുകാരെ വധിക്കാൻ ശ്രമിച്ച കേസില്‍ ശിക്ഷിക്കപ്പെട്ട ഡി.വൈ.എഫ്.ഐ പ്രവർത്തകരുടെ ജാമ്യാപേക്ഷ ഹൈക്കോടതി 2026 ജനുവരി ഒമ്പതിലേക്ക് മാറ്റി. പയ്യന്നൂര്‍ നഗരസഭ വെള്ളൂര്‍ മൊട്ടമ്മല്‍ 46-ാം വാർഡിലെ എൽ.ഡി.എഫ് സ്ഥാനാർത്ഥിയും ഡി.വൈ.എഫ്.ഐ ജില്ലാ കമ്മിറ്റി അംഗവും പയ്യന്നൂര്‍ ബ്ലോക്ക് സെക്രട്ടറിയുമായ വെള്ളൂരിലെ വി.കെ നിഷാദ് (35), അന്നൂരിലെ ടി.സി.വി നന്ദകുമാർ (35) എന്നിവരുടെ ജാമ്യാപേക്ഷയാണ് വെള്ളിയാഴ്ച ഹൈക്കോടതിയിൽ വീണ്ടും പരിഗണനക്ക് വന്നത്. ജാമ്യാപേക്ഷ വിശദമായ വാദം കേൾക്കുന്നതിനായി കോടതി അടുത്ത വർഷം ജനുവരിയിലേക്ക് മാറ്റിവെക്കുകയായിരുന്നു.

പ്രോസിക്യൂഷൻ്റെ ശക്തമായ എതിർപ്പ്

ഈ മാസം എട്ടിന് ജാമ്യാപേക്ഷ ഹൈക്കോടതി പരിഗണിച്ചിരുന്നു. അന്ന് തന്നെ പ്രോസിക്യൂഷൻ വിഭാഗം പ്രതികൾക്ക് ജാമ്യം നൽകുന്നത് ശക്തമായി എതിർത്തിരുന്നു. പ്രതികൾ കൊലപാതക കേസുകൾ ഉൾപ്പെടെ നിരവധി കേസുകളിൽ ഉൾപ്പെട്ടിട്ടുണ്ടെന്ന് കാണിച്ച് ജാമ്യം നൽകരുതെന്നു വാദിച്ച പ്രോസിക്യൂഷൻ, കൗണ്ടർ കേസും നൽകിയിരുന്നു. അതിനാൽ, ഇന്ന് ഇരുവരുടെയും ജാമ്യാപേക്ഷ കോടതി പരിഗണിച്ചപ്പോഴും വിശദമായ വാദം കേൾക്കുന്നതിന് വേണ്ടി ജനുവരിയിലേക്ക് മാറ്റുകയായിരുന്നു. ജാമ്യം ലഭിക്കാനും ശിക്ഷ സ്റ്റേ ചെയ്യാനും വേണ്ടിയാണ് അഭിഭാഷകൻ മുഖേന പ്രതികൾ ഹൈക്കോടതിയെ സമീപിച്ചത്.

ശിക്ഷാ വിവരങ്ങൾ

ഇക്കഴിഞ്ഞ നവംബർ 25-നാണ് കേസിൽ പ്രതികളായ ഇരുവരെയും തളിപ്പറമ്പ അഡീഷണല്‍ സെഷന്‍സ് ജഡ്ജ് കെ.എന്‍ പ്രശാന്ത് ശിക്ഷിച്ചത്. ഇന്ത്യൻ ശിക്ഷാ നിയമം (IPC) 307 (വധശ്രമം), എക്‌സ്‌പ്ലോസീവ് ആക്ട് (Explosive Act) നാല്, അഞ്ച് എന്നീ വകുപ്പുകൾ പ്രകാരമാണ് ശിക്ഷ. വധശ്രമത്തിന് അഞ്ച് വർഷം തടവും ഒരു ലക്ഷം രൂപ പിഴയും, എക്സ്പ്ലോസീവ് സബ്സ്റ്റൻസ് ആക്ട് അഞ്ച് നിയമപ്രകാരം അഞ്ച് വർഷം തടവും 50,000 പിഴയും, എക്സ്പ്ലോസീവ് സബ്സ്റ്റൻസ് ആക്ട് നാല് നിയമപ്രകാരം 10 വർഷം തടവും ഒരു ലക്ഷം പിഴയും ഉൾപ്പെടെയാണ് ശിക്ഷ വിധിച്ചത്. ഇതിൽ 10 വർഷം ശിക്ഷ അനുഭവിച്ചാൽ മതിയാകും.

തിരഞ്ഞെടുപ്പിലെ സ്ഥാനാർത്ഥിത്വം

കൂട്ടുപ്രതികളായ വെള്ളൂര്‍ ആറാംവയലിലെ എ. മിഥുന്‍ (36), വെള്ളൂര്‍ കണിയേരിയിലെ കെ.വി കൃപേഷ് (38) എന്നിവരെ കോടതി വെറുതെ വിട്ടിരുന്നു. ഔദ്യോഗിക കൃത്യനിര്‍വ്വഹണം തടസ്സപ്പെടുത്തൽ എന്ന വകുപ്പ് കൂടി ഇവരുടെ പേരിൽ പോലീസ് ചുമത്തിയിരുന്നെങ്കിലും ഈക്കാര്യം തെളിയിക്കാൻ പ്രോസിക്യൂഷന് സാധിച്ചില്ല. നോമിനേഷന്‍ നൽകുന്ന സമയത്ത് ശിക്ഷ വിധിക്കാത്തതിനാൽ വി.കെ നിഷാദിന് തിരഞ്ഞെടുപ്പിൽ മത്സരിക്കുന്നതിന് തടസ്സമുണ്ടായിരുന്നില്ല.

കേസിനാസ്പദമായ സംഭവം

2012 -ലാണ് കേസിനാസ്പദമായ സംഭവം. അന്നത്തെ സി.പി.എം കണ്ണൂർ ജില്ലാ സെക്രട്ടറിയായിരുന്ന പി. ജയരാജനെ അരിയില്‍ ഷുക്കൂർ വധക്കേസിൽ പോലീസ് അറസ്റ്റ് ചെയ്തതിൽ പ്രതിഷേധിച്ചാണ് സംസ്ഥാന വ്യാപകമായി പോലീസ് സ്റ്റേഷനുകൾ അക്രമിക്കപ്പെടുകയും നിരവധി അക്രമ സംഭവങ്ങൾ അരങ്ങേറുകയും ചെയ്തത്. ഇതിനിടയിലാണ് ആഗസ്ത് ഒന്നിന് പയ്യന്നൂര്‍ സ്റ്റേഷനിലെ എസ്.ഐ. കെ.പി രാമകൃഷ്ണന്‍, അഡീഷണൽ എസ്.ഐ. കുട്ടിയമ്പു, സിവിൽ പോലീസ് ഓഫീസർ പ്രമോദ്, ഡ്രൈവര്‍ നാണുക്കുട്ടന്‍, കെ.എ.പി.യിലെ അനൂപ്, ജാക്‌സണ്‍ എന്നിവരടങ്ങിയ പോലീസ് സംഘത്തിന് നേരെ രണ്ട് ബൈക്കുകളിലെത്തിയ സംഘം ബോംബെറിഞ്ഞത്.

എൽ.ഡി.എഫ് സ്ഥാനാർത്ഥിയുടെ ജാമ്യാപേക്ഷ ഹൈക്കോടതി മാറ്റിവെച്ച വിഷയത്തിൽ നിങ്ങളുടെ അഭിപ്രായം പങ്കുവെക്കുക.

Article Summary: LDF candidate convicted for attempt to murder police with bomb denied bail.

#Payyanur #LDFCandidate #VKNishad #BombCase #KeralaPolitics #HighCourt