ഒൻപതാം ക്ലാസ് വിദ്യാർത്ഥിയുടെ മരണം: മാനസിക പീഡനം ആരോപിച്ച് ക്ലാസ് ടീച്ചർ ഉൾപ്പെടെ രണ്ട് അധ്യാപികമാർക്ക് സസ്പെൻഷൻ

പാലക്കാട്: (KVARTHA) പല്ലൻചാത്തന്നൂരിൽ കണ്ണാടി ഹയർ സെക്കൻഡറി സ്കൂളിലെ ഒൻപതാം ക്ലാസ് വിദ്യാർത്ഥിയായ അർജുനെ (14) വീട്ടിലെ കിടപ്പുമുറിയിൽ തൂങ്ങി മരിച്ച നിലയിൽ കണ്ടെത്തിയ സംഭവത്തിൽ രണ്ട് അധ്യാപികമാർക്കെതിരെ നടപടി. വിദ്യാർത്ഥികളുടെ പ്രതിഷേധം ശക്തമായതിനെ തുടർന്ന് ക്ലാസ് ടീച്ചറായ ആശ, പ്രധാന അധ്യാപികയായ ലിസി എന്നിവരെയാണ് സ്കൂൾ മാനേജ്മെൻ്റ് അന്വേഷണ വിധേയമായി സസ്പെൻഡ് ചെയ്തത്.

ഇൻസ്റ്റാഗ്രാമിൽ മറ്റു കുട്ടികളുമായി സന്ദേശങ്ങൾ കൈമാറിയതിൻ്റെ പേരിൽ ക്ലാസ് അധ്യാപിക അർജുനെ നിരന്തരം മാനസികമായി പീഡിപ്പിച്ചിരുന്നതായി കുടുംബം കുഴൽമന്ദം പോലീസിൽ നൽകിയ പരാതിയിൽ പറയുന്നു. സൈബർ സെല്ലിൽ പരാതി നൽകി ജയിലിൽ അടയ്ക്കുമെന്ന് അധ്യാപിക ഭീഷണിപ്പെടുത്തിയതാണ് അർജുൻ ജീവനൊടുക്കാൻ കാരണമെന്നും പരാതിയിൽ ആരോപണമുണ്ട്.

അതേസമയം, അധ്യാപിക ക്ലാസ് മുറിയിൽ വെച്ച് സൈബർ സെല്ലിലേക്ക് വിളിച്ചതോടെ അർജുൻ വല്ലാതെ അസ്വസ്ഥനായിരുന്നെന്ന് സഹപാഠികൾ അന്വേഷണ സംഘത്തോട് വെളിപ്പെടുത്തി. സംഭവത്തിൽ കുഴൽമന്ദം പോലീസ് കേസെടുത്ത് വിശദമായ അന്വേഷണം ആരംഭിച്ചിട്ടുണ്ട്.

അധ്യാപികയുടെ ഭാഗത്തുനിന്ന് വീഴ്ച സംഭവിച്ചിട്ടില്ലെന്നായിരുന്നു പ്രധാന അധ്യാപിക ലിസിയുടെ ആദ്യ നിലപാട്. 'വിദ്യാർത്ഥിക്ക് വീട്ടിൽ നിന്നും സമ്മർദ്ദമുണ്ടായിരുന്നുവെന്നും കൗൺസിലിംഗ് ഏർപ്പെടുത്തിയിരുന്നെന്നും' അവർ മാധ്യമങ്ങളോട് പറയുകയുണ്ടായി. എന്നാൽ, സ്കൂൾ അധികൃതരുടെ നിലപാടിൽ പ്രതിഷേധിച്ച് വിവിധ വിദ്യാർത്ഥി സംഘടനകളും (കെ.എസ്.യു, എസ്.എഫ്.ഐ, എ.ബി.വി.പി) വിദ്യാർത്ഥികളും സ്കൂളിന് മുന്നിൽ ശക്തമായ പ്രതിഷേധം സംഘടിപ്പിക്കുകയും പ്രധാന അധ്യാപികയെ ഉപരോധിക്കുകയും ചെയ്തു.

പ്രതിഷേധം ശക്തമായതോടെ ചേർന്ന പി.ടി.എ-മാനേജ്‌മെൻ്റ് യോഗമാണ് ഇരു അധ്യാപികമാരെയും സസ്പെൻഡ് ചെയ്യാൻ തീരുമാനിച്ചത്. ഈ തീരുമാനത്തെത്തുടർന്ന് വിദ്യാർത്ഥികൾ സമരം അവസാനിപ്പിച്ചു. സംഭവത്തെ തുടർന്ന് സ്കൂളിന് നാല് ദിവസത്തെ അവധിയും പ്രഖ്യാപിച്ചിട്ടുണ്ട്. വിദ്യാർത്ഥിയുടെ മരണത്തിലേക്ക് നയിച്ച സാഹചര്യങ്ങളെക്കുറിച്ച് അന്വേഷിച്ച് റിപ്പോർട്ട് സമർപ്പിക്കാൻ വിദ്യാഭ്യാസ മന്ത്രി വി. ശിവൻകുട്ടി പൊതുവിദ്യാഭ്യാസ ഡയറക്ടർക്ക് നിർദേശം നൽകിയതായും അധികൃതർ വ്യക്തമാക്കി.

Disclaimer: ഈ വാർത്തയിലെ വിവരങ്ങൾ പൊലീസ്/അധികാരികളുടെ പ്രസ്താവനകളെ അടിസ്ഥാനപ്പെടുത്തിയതാണ്. കോടതിയിലൂടെയോ അന്വേഷണത്തിലൂടെയോ മാത്രമേ അന്തിമ സത്യാവസ്ഥ തെളിയുകയുള്ളു.

ശ്രദ്ധിക്കുക: സ്വയം ജീവനൊടുക്കുന്നത് ഒന്നിനും പരിഹാരമല്ല, മാനസികാരോഗ്യ വിദഗ്ധരുടെ സഹായം തേടുക, അതിജീവിക്കാന്‍ ശ്രമിക്കുക. അത്തരം ചിന്തകളുളളപ്പോള്‍ 'ദിശ' ഹെല്‍പ് ലൈനില്‍ വിളിക്കുക. ടോൾ ഫ്രീ ഹെൽപ് ലൈൻ നമ്പർ: 1056, 0471-2552056

Article Summary: Palakkad student suicide due to harassment: Two teachers suspended.

#PalakkadStudentDeath #KeralaNews #TeacherSuspension #StudentSafety #KannadiSchool #MentalHarassment