കണ്ണൂർ: (KVARTHA) യഥാർത്ഥ ചരിത്ര വസ്തുതകൾ ഉപയോഗിച്ച് നുണകളെ നേരിടാൻ നമ്മെ പ്രാപ്തരാക്കുന്ന വിജ്ഞാനശാലയാണ് മ്യൂസിയമെന്ന് മുഖ്യമന്ത്രി പിണറായി വിജയൻ പറഞ്ഞു. മക്രേരി ശ്രീ സുബ്രഹ്മണ്യസ്വാമി ക്ഷേത്ര തീർത്ഥാടന ടൂറിസം പദ്ധതി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

വിവര സാങ്കേതികവിദ്യയുടെ ഈ കാലഘട്ടത്തിൽ അറിവുകൾ വളരെ വേഗത്തിൽ കൈമാറ്റം ചെയ്യപ്പെടുന്നു. എന്നാൽ ഇതോടൊപ്പം തന്നെ വ്യാജവാർത്തകളും അതിവേഗം പ്രചരിക്കുന്നുണ്ട്. അതിനാൽ മ്യൂസിയങ്ങൾക്ക് വളരെയധികം പ്രാധാന്യമുണ്ടെന്നും മുഖ്യമന്ത്രി അഭിപ്രായപ്പെട്ടു.

ഉത്തര മലബാറിന്റെ സാംസ്കാരിക പൈതൃകം സംരക്ഷിക്കുക എന്ന ലക്ഷ്യത്തോടെയാണ് തലശ്ശേരി പൈതൃക ടൂറിസം പദ്ധതി ആരംഭിച്ചത്. 41 കോടി രൂപ ചെലവഴിച്ച് നടപ്പാക്കുന്ന ഈ പദ്ധതിയിലൂടെ കോഴിക്കോട്, കണ്ണൂർ, വയനാട് ജില്ലകളിലെ 11 ആരാധനാലയങ്ങളിലെ അടിസ്ഥാന സൗകര്യങ്ങൾ വികസിപ്പിക്കും. അതോടൊപ്പം ഈ ആരാധനാലയങ്ങളുമായി ബന്ധപ്പെട്ട വിനോദസഞ്ചാര കേന്ദ്രങ്ങളെയും വികസിപ്പിക്കും.

ഈ പദ്ധതിയുടെ ഭാഗമായി മൂന്ന് കോടി രൂപ ചെലവഴിച്ചുള്ള പ്രവർത്തനങ്ങളാണ് മക്രേരി ക്ഷേത്രത്തിൽ നടപ്പാക്കുന്നത്. കേരളത്തിന്റെ തനതായ സംഗീത പാരമ്പര്യമായ സോപാന സംഗീതവുമായി ബന്ധപ്പെട്ട ഒരു മ്യൂസിയം ഇവിടെ സ്ഥാപിച്ചിട്ടുണ്ട്. പ്രശസ്ത സംഗീതജ്ഞൻ ദക്ഷിണാമൂർത്തിയുടെ ജീവിതവുമായി ബന്ധപ്പെട്ട ഈ മ്യൂസിയം ക്ഷേത്രത്തിന്റെ പ്രൗഢിയും പ്രാധാന്യവും വർദ്ധിപ്പിക്കുമെന്നും മുഖ്യമന്ത്രി കൂട്ടിച്ചേർത്തു. രണ്ട് കോടി ഒൻപത് ലക്ഷം രൂപ ചെലവിലാണ് ഈ തീമാറ്റിക്, ഇന്ററാക്റ്റീവ് മ്യൂസിയം നിർമ്മിച്ചിരിക്കുന്നത്.

കഴിഞ്ഞ ഒൻപത് വർഷത്തിനുള്ളിൽ സംസ്ഥാനത്ത് നിരവധി മ്യൂസിയങ്ങൾ ആരംഭിച്ചിട്ടുണ്ട്. സർക്കാർ 25 ആധുനിക മ്യൂസിയങ്ങളാണ് പുതുതായി നിർമ്മിച്ചത്. 20 മ്യൂസിയം പദ്ധതികൾ വിവിധ ഘട്ടങ്ങളിലായി നിർമ്മാണം പുരോഗമിക്കുകയാണ്. കണ്ണൂരിൽ മാത്രം അഞ്ച് മ്യൂസിയങ്ങൾ നിലവിലുണ്ട്. ആറാമത്തേതായ എകെജി മ്യൂസിയം ഉടൻ പൂർത്തിയാകും. ഇത്തരം മ്യൂസിയങ്ങൾ കണ്ണൂരിന്റെ സാംസ്കാരിക മുന്നേറ്റത്തിന് വലിയ മുതൽക്കൂട്ടാകും. മ്യൂസിയങ്ങളെ വെറും പ്രദർശനശാലകളായി കാണുന്ന നയമല്ല സർക്കാരിനുള്ളത്. കേരളത്തിന്റെ ചരിത്രവും സംസ്കാരവും വരും തലമുറയ്ക്ക് പകർന്നു നൽകാൻ മ്യൂസിയങ്ങൾ സഹായിക്കുമെന്നും മുഖ്യമന്ത്രി പറഞ്ഞു.

ഒരു കോടി രൂപ ചെലവഴിച്ച് 2500 ചതുരശ്ര അടി വിസ്തീർണ്ണമുള്ള ഊട്ടുപുരയും ഇവിടെ നിർമ്മിച്ചിട്ടുണ്ട്. കൂടാതെ ചുറ്റമ്പലത്തിന്റെ കല്ല് പാകൽ, ലാൻഡ്സ്കേപ്പിംഗ്, നടപ്പാത നിർമ്മാണം തുടങ്ങിയവയ്ക്കായി ഒരു കോടി 98 ലക്ഷം രൂപ ചെലവഴിച്ചു. കഴിഞ്ഞ ഒൻപത് വർഷത്തിനുള്ളിൽ ഏകദേശം 600 കോടി രൂപ വിവിധ ദേവസ്വങ്ങൾക്കും അവിടുത്തെ പദ്ധതികൾക്കുമായി സംസ്ഥാന സർക്കാർ നൽകിയിട്ടുണ്ട്.

തിരുവിതാംകൂർ ദേവസ്വം ബോർഡിന് 145 കോടി, കൊച്ചിൻ ദേവസ്വം ബോർഡിന് 26 കോടി, മലബാർ ദേവസ്വം ബോർഡിന് 252 കോടി, ശബരിമല മാസ്റ്റർ പ്ലാനിന് 84 കോടി, ശബരിമല ഇടത്താവളത്തിന് 116 കോടി, ശബരിമല സാനിറ്റേഷൻ സൊസൈറ്റിക്ക് 20 കോടി രൂപ അനുവദിച്ചു. മലബാർ ദേവസ്വം ജീവനക്കാരുടെ ശമ്പളത്തിനായി കഴിഞ്ഞ സാമ്പത്തിക വർഷം 25 കോടി രൂപ വകയിരുത്തി. ഉത്തര മലബാറിലെ ക്ഷേത്രങ്ങളിലെ ആചാരസ്ഥാനികൾ, കോലധാരികൾ എന്നിവർക്കുള്ള പ്രതിമാസ ധനസഹായ പദ്ധതിയിലൂടെ രണ്ടായിരത്തോളം പേർക്ക് ഗുണം ലഭിക്കുന്നുണ്ട്.

ഈ സാമ്പത്തിക വർഷം അതിനായി അഞ്ചേകാൽ കോടി രൂപയാണ് നീക്കിവെച്ചിരിക്കുന്നത്. സംസ്ഥാന സർക്കാർ ക്ഷേത്രങ്ങൾക്കായി ചെയ്യുന്ന ചില കാര്യങ്ങളാണ് ഇവിടെ സൂചിപ്പിച്ചത്. എന്നാൽ സർക്കാർ ക്ഷേത്രങ്ങളിലെ പണം എടുക്കുന്നു എന്ന തരത്തിലുള്ള വ്യാജ പ്രചാരണങ്ങൾ നടക്കുന്നുണ്ട്. ഇത്തരം തെറ്റായ വിവരങ്ങൾക്കെതിരെ വസ്തുതകൾ മനസ്സിലാക്കുന്നതിനാണ് ഈ കണക്കുകൾ അവതരിപ്പിച്ചതെന്നും മുഖ്യമന്ത്രി വ്യക്തമാക്കി.

ആരാധനാലയങ്ങൾ നാടിന്റെ സമാധാന അന്തരീക്ഷം കാത്തുസൂക്ഷിക്കുന്നതിനും സഹോദരബന്ധം ശക്തിപ്പെടുത്തുന്നതിനും സഹായിക്കുന്നു. നാടിന്റെ പൊതുസ്വത്തായ ആരാധനാലയങ്ങൾ സംരക്ഷിക്കുകയും അഭിവൃദ്ധിപ്പെടുത്തുകയും ചെയ്യുക എന്നത് സംസ്ഥാന സർക്കാരിന്റെ നയമാണെന്നും മുഖ്യമന്ത്രി പറഞ്ഞു. സംസ്ഥാന ടൂറിസം വകുപ്പിന്റെ തലശ്ശേരി പൈതൃക ടൂറിസം പദ്ധതിയിൽ ഉൾപ്പെടുത്തി ഏകദേശം അഞ്ച് കോടി 62 ലക്ഷം രൂപ ചെലവഴിച്ചാണ് ക്ഷേത്ര തീർത്ഥാടന ടൂറിസം പദ്ധതി നടപ്പാക്കിയത്.

ടൂറിസം വകുപ്പ് സ്റ്റേറ്റ് ഫണ്ട് മുഖേനയും കിഫ്ബി സാമ്പത്തിക സഹായത്തോടെയും പൂർത്തീകരിച്ച ഊട്ടുപുര, ദക്ഷിണാമൂർത്തി സ്വാമികളുടെ ഓർമ്മകൾ ഉണർത്തുന്ന സോപാന സംഗീത മ്യൂസിയം, മ്യൂസിയം കെട്ടിടം, ലാൻഡ്സ്കേപ്പിംഗ്, ചുറ്റമ്പലം ടൈൽ പാകൽ, കല്ല് പാകൽ, കുളം നവീകരണം, ടോയ്ലറ്റ് സൗകര്യങ്ങൾ എന്നിവയാണ് ഉദ്ഘാടനം ചെയ്തത്. മെയ് ഒന്ന് മുതൽ മ്യൂസിയം പൊതുജനങ്ങൾക്കായി തുറന്നുകൊടുക്കും.

രജിസ്ട്രേഷൻ പുരാവസ്തു പുരാരേഖ മ്യൂസിയം വകുപ്പ് മന്ത്രി രാമചന്ദ്രൻ കടന്നപ്പള്ളി ചടങ്ങിൽ അധ്യക്ഷത വഹിച്ചു. സംസ്ഥാനത്ത് വൈവിധ്യപൂർണ്ണമായ ഒരു മ്യൂസിയം ശൃംഖല സൃഷ്ടിക്കുമെന്ന് മന്ത്രി പറഞ്ഞു. ചരിത്രത്തെയും ചരിത്ര പുരുഷന്മാരെയും സംരക്ഷിക്കുന്ന ഒരു നിലപാടാണ് സർക്കാരിനുള്ളതെന്നും അദ്ദേഹം കൂട്ടിച്ചേർത്തു. ഡോ. വി. ശിവദാസൻ എം പി, ജില്ലാ പഞ്ചായത്ത് പ്രസിഡന്റ് അഡ്വ. കെ.കെ രത്നകുമാരി എന്നിവർ വിശിഷ്ടാതിഥികളായിരുന്നു.

കേരള മ്യൂസിയം എക്സിക്യൂട്ടീവ് ഡയറക്ടർ ആർ. ചന്ദ്രൻപിള്ള, കെ ഐ ഐ ഡി സി ചീഫ് എഞ്ചിനീയർ പ്രകാശ് ഇടിക്കുള എന്നിവർ റിപ്പോർട്ട് അവതരിപ്പിച്ചു. പെരളശ്ശേരി ഗ്രാമപഞ്ചായത്ത് പ്രസിഡന്റ് എ.വി ഷീബ, മലബാർ ദേവസ്വം ബോർഡ് കമ്മീഷണർ കോഴിക്കോട് ടി.സി ബിജു, ടൂറിസം ഡെപ്യൂട്ടി ഡയറക്ടർ ടി.സി മനോജ്, കണ്ണൂർ ജില്ലാ പഞ്ചായത്ത് അംഗം കെ.വി ബിജു, എടക്കാട് ബ്ലോക്ക് പഞ്ചായത്ത് അംഗം സി സഞ്ചന, പെരളശ്ശേരി ഗ്രാമപഞ്ചായത്ത് വാർഡ് അംഗം എൻ ബീന, ജനപ്രതിനിധികൾ, രാഷ്ട്രീയ പാർട്ടി പ്രതിനിധികൾ തുടങ്ങിയവരും ചടങ്ങിൽ പങ്കെടുത്തു.

Chief Minister Pinarayi Vijayan inaugurated the Makreri Temple tourism project in Kannur, stating museums are vital in countering misinformation with historical facts. He highlighted the state's efforts in establishing new museums and supporting temple development projects.

#KeralaTourism, #Museums, #PinarayiVijayan, #TempleProject, #Kannur, #HistoricalFacts