'അധിക ജോലിഭാരം': മട്ടന്നൂരിൽ വോട്ടർ പട്ടിക തയ്യാറാക്കുന്നതിനിടെ ബിഎൽഒയ്ക്ക് ദേഹാസ്വാസ്ഥ്യം

മട്ടന്നൂർ: (KVARTHA) ജോലി സമ്മർദ്ദം താങ്ങാനാവാതെ വോട്ടർ പട്ടിക തീവ്ര പുനഃപരിശോധന ചുമതലയിലുള്ള ബൂത്ത് ലെവൽ ഓഫീസർ (ബിഎൽഒ) കുഴഞ്ഞുവീണു. കുറ്റിക്കര സ്വദേശി വലിയ വീട്ടിൽ രാമചന്ദ്രനാണ് (53) ശനിയാഴ്ച ഉച്ചയോടെ ദേഹാസ്വാസ്ഥ്യം അനുഭവപ്പെട്ടതിനെ തുടർന്ന് ചികിത്സ തേടിയത്. കീഴല്ലൂർ യുപി സ്കൂളിൽ നടന്ന എസ്ഐആർ ക്യാംപിന് ശേഷം മകനുമായി വീട്ടിലേക്ക് മടങ്ങവേയാണ് സംഭവം.

ഉടൻ തന്നെ ബന്ധുക്കളും മറ്റും ചേർന്ന് രാമചന്ദ്രനെ അഞ്ചരക്കണ്ടിയിലെ സ്വകാര്യ ക്ലിനിക്കിൽ എത്തിച്ചു. കടുത്ത ജോലി സമ്മർദ്ദം കാരണം അദ്ദേഹം കഴിഞ്ഞ കുറച്ച് ദിവസങ്ങളിലായി ശാരീരിക അവശതയിലായിരുന്നുവെന്ന് ബന്ധുക്കൾ പറഞ്ഞു. ഡിഡിഇ ഓഫീസിലെ പിഎഫ് വിഭാഗത്തിൽ ക്ലർക്കാണ് രാമചന്ദ്രൻ.

സമ്മർദ്ദത്തിലാഴ്ത്തിയ കണക്കുകൾ

കീഴല്ലൂർ പഞ്ചായത്തിലെ 81-ാം ബൂത്തിൻ്റെ ബൂത്ത് ലെവൽ ഓഫീസറാണ് രാമചന്ദ്രൻ. 356-ഓളം വീടുകൾ ഉൾക്കൊള്ളുന്ന 1296 വോട്ടർമാരുള്ള പട്ടികയാണ് രാമചന്ദ്രന് പൂർത്തിയാക്കേണ്ടിയിരുന്നത്. പട്ടിക പൂർത്തിയാക്കേണ്ട ദിവസം അടുത്തുവരും തോറും രാമചന്ദ്രൻ കടുത്ത സമ്മർദ്ദത്തിലാവുന്നത് കണ്ടിട്ടുണ്ടെന്നാണ് വീട്ടുകാർ പറയുന്നത്. വോട്ടർ പട്ടിക പുതുക്കലുമായി ബന്ധപ്പെട്ട് ജീവനക്കാർ നേരിടുന്ന അധിക ജോലിഭാരത്തിലേക്കും മാനസിക സമ്മർദ്ദത്തിലേക്കുമാണ് ഈ സംഭവം വിരൽചൂണ്ടുന്നത്.

അധിക ജോലി ഭാരം ജീവനക്കാരെ എങ്ങനെ ബാധിക്കുന്നു? പ്രതികരിക്കുക.

Article Summary: Booth Level Officer (53) in Mattannur collapses due to work stress.

#Mattannur #BLO #WorkStress #VoterList #KeralaElectionDuty #DDEOffice