'അച്ഛന് പങ്കില്ല': എക്സാലോജിക് വിവാദത്തിൽ വീണയുടെ ഹൈക്കോടതിയിലെ വാദങ്ങൾ
● സിബിഐ അന്വേഷണം ആവശ്യമില്ലെന്ന് വീണ.
● 'മുഖ്യമന്ത്രിയുടെ മകളായതുകൊണ്ട് കേസിൽ കുടുക്കാൻ ശ്രമം'.
● 'ഇത് ബെനാമി കമ്പനിയല്ല.'
● 'എകെജി സെന്റർ ആരോപണം അടിസ്ഥാനരഹിതം.'
കൊച്ചി: (KVARTHA) മാസപ്പടിക്കേസിൽ സിബിഐ അന്വേഷണം ആവശ്യപ്പെട്ടുള്ള ഹർജിയിൽ എക്സാലോജിക് കമ്പനി ഡയറക്ടറും മുഖ്യമന്ത്രി പിണറായി വിജയന്റെ മകളുമായ ടി. വീണ ഹൈക്കോടതിയിൽ മറുപടി സത്യവാങ്മൂലം നൽകി. താൻ വിദ്യാസമ്പന്നയായ യുവതിയാണെന്നും മുഖ്യമന്ത്രിയുടെ മകളായതുകൊണ്ടാണ് തന്നെ കേസിൽ പ്രതിയാക്കാൻ ശ്രമിക്കുന്നതെന്നും വീണ സത്യവാങ്മൂലത്തിൽ പറയുന്നു. ഹർജിയിലെ ആരോപണങ്ങൾ നിലനിൽക്കില്ലെന്നും മാസപ്പടിയിൽ സിബിഐ അന്വേഷണം ആവശ്യമില്ലെന്നും സത്യവാങ്മൂലത്തിൽ വീണ വ്യക്തമാക്കി. ഹർജിയിലെ ആരോപണങ്ങൾ ബാലിശവും അടിസ്ഥാനമില്ലാത്തതുമാണെന്ന് പറയുന്ന വീണ, പൊതുതാല്പര്യ ഹർജി തന്നെ ബോധപൂർവം മോശക്കാരിയായി ചിത്രീകരിക്കാൻ വേണ്ടിയാണെന്നും ആരോപിക്കുന്നു.
വീണയുടെ സത്യവാങ്മൂലത്തിലെ പ്രധാന വാദങ്ങൾ:
- മാസപ്പടിയിൽ സിബിഐ അന്വേഷണം വേണ്ട.
- മുഖ്യമന്ത്രിയുടെ മകളായതിനാൽ കേസിൽ ഉൾപ്പെടുത്താൻ ശ്രമിക്കുന്നു.
- എക്‌സാലോജിക്കിന്റെ പ്രവർത്തനങ്ങളിൽ തന്റെ അച്ഛന് പങ്കില്ല.
- അച്ഛൻ മുഖ്യമന്ത്രിയായത് കമ്പനി സ്ഥാപിച്ച് രണ്ട് വർഷത്തിന് ശേഷം.
- എക്‌സാലോജിക്ക് ബെനാമി കമ്പനിയല്ല.
- എകെജി സെന്റർ സുരക്ഷിത താവളമെന്ന ആരോപണം അടിസ്ഥാനരഹിതം.
- എകെജി സെന്ററിന്റെ വിലാസം തെറ്റായി ഉപയോഗിച്ചതിനല്ല ആർഒസി പിഴയീടാക്കിയത്.
വീണാ വിജയൻ സി.എം.ആർ.എല്ലിൽ നിന്ന് മാസപ്പടി വാങ്ങിയെന്ന ആരോപണത്തിന്മേൽ സിബിഐ അന്വേഷണം ആവശ്യപ്പെട്ടുള്ള ഹർജിയിൽ മുഖ്യമന്ത്രി പിണറായി വിജയനും കഴിഞ്ഞ ദിവസം സത്യവാങ്മൂലം സമർപ്പിച്ചിരുന്നു. ഹർജി ലക്ഷ്യമിടുന്നത് രാഷ്ട്രീയ ആക്രമണമാണെന്നും പൊതുതാത്പര്യത്തിന്റെ പരിധിയിൽ വരില്ലെന്നുമാണ് മുഖ്യമന്ത്രി ഹൈക്കോടതിയിൽ നൽകിയ സത്യവാങ്മൂലത്തിൽ ചൂണ്ടിക്കാട്ടിയത്. 'പൊതുതാൽപര്യമെന്ന ഉദ്ദേശശുദ്ധി ഹർജിക്കില്ല. ഹർജിക്കാരനായ മാധ്യമപ്രവർത്തകൻ എം.ആർ. അജയന് കേസുമായി ബന്ധപ്പെട്ട് നേരിട്ട് വിവരങ്ങളൊന്നുമില്ല. ആദായനികുതി വകുപ്പിന്റെ ഇന്ററിം സെറ്റിൽമെന്റ് ബോർഡിന്റെ ഉത്തരവിന്റെ മാത്രം അടിസ്ഥാനത്തിലാണ് ഹർജി. തന്നെയും തന്റെ മകളെയും ടാർഗറ്റ് ചെയ്യുകയാണ്. രണ്ട് കമ്പനികൾ തമ്മിലെ സാമ്പത്തിക ഇടപാടുകളാണ്. നിലവിൽ എസ്.എഫ്.ഐ.ഒ. അന്വേഷണം നടക്കുന്നതിനാൽ മറ്റ് കേന്ദ്ര ഏജൻസികൾ അന്വേഷണം ഏറ്റെടുക്കേണ്ടതില്ലെന്നും' മുഖ്യമന്ത്രി സമർപ്പിച്ച സത്യവാങ്മൂലത്തിൽ ചൂണ്ടിക്കാട്ടിയിരുന്നു.
സംസ്ഥാന സർക്കാരിനെ കക്ഷി ചേർക്കാത്ത നടപടി ഫെഡറൽ ബന്ധങ്ങളെ നിലനിർത്തുന്ന ഭരണഘടന ചട്ടങ്ങളെ ഇല്ലാതാക്കുമെന്നാണ് മറുപടി സത്യവാങ്മൂലത്തിലെ മറ്റൊരു പ്രധാന വാദം. മാസപ്പടി കേസിൽ അന്വേഷണം വേണ്ടെന്ന വിജിലൻസ് കോടതി ഉത്തരവിനെ കോടതിയിൽ ചോദ്യം ചെയ്യാതെ സിബിഐ അന്വേഷണം ആവശ്യപ്പെട്ട് ഹൈക്കോടതിയിൽ ഹർജി നൽകിയത് അംഗീകരിക്കാനാകില്ലെന്നും സത്യവാങ്മൂലത്തിൽ പറയുന്നു.
കേരള രാഷ്ട്രീയത്തിൽ ചർച്ചയാകുന്ന ഈ കേസിനെക്കുറിച്ചുള്ള നിങ്ങളുടെ കാഴ്ചപ്പാടുകൾ കമന്റ് ചെയ്യൂ. വാർത്ത പങ്കിടുക.
Article Summary: Veena Vijayan files affidavit in Masappadi case, stating she is being targeted as CM's daughter.
#MasappadiCase, #VeenaVijayan, #PinarayiVijayan, #KeralaPolitics, #Exalogic, #HighCourt
