എട്ട് മാസങ്ങൾക്കുശേഷം പൊതുവേദിയിലെത്തിയപ്പോൾ കണ്ണഞ്ചിപ്പിക്കുന്ന വികസനം കണ്ടു; ദാരിദ്ര്യം ഇനിയും ബാക്കിയെന്ന് നടൻ മമ്മൂട്ടി

തിരുവനന്തപുരം: (KVARTHA) അതിദാരിദ്ര്യമുക്ത കേരളം പ്രഖ്യാപിക്കുന്ന ചടങ്ങിൽ പങ്കെടുത്തുകൊണ്ട് നടൻ മമ്മൂട്ടി മുഖ്യമന്ത്രി പിണറായി വിജയനെ അഭിനന്ദിച്ചു. അതിദാരിദ്ര്യമുക്ത കേരളമായുള്ള പ്രഖ്യാപനത്തിലൂടെ മുഖ്യമന്ത്രി ഏറ്റെടുത്തത് വലിയ ഉത്തരവാദിത്വമാണ് എന്ന് മമ്മൂട്ടി പറഞ്ഞു. ദാരിദ്ര്യം പൂർണമായും തുടച്ചുനീക്കുന്നതിനായി തോളോട് തോൾ ചേർന്ന് പ്രവർത്തിക്കാൻ നമുക്കാകണമെന്നും അദ്ദേഹം ആഹ്വാനം ചെയ്തു.

എന്നെക്കാൾ ചെറുപ്പം കേരളത്തിന്

ഏറെ നാളത്തെ ഇടവേളയ്ക്ക് ശേഷമാണ് താൻ പൊതുവേദിയിൽ എത്തുന്നത് എന്ന് മമ്മൂട്ടി പറഞ്ഞു. "അഞ്ചെട്ട് മാസങ്ങൾക്ക് ശേഷം ആദ്യമായാണ് ഒരു പൊതുവേദിയിൽ പ്രത്യക്ഷപ്പെടുന്നത്. അത് കേരളപ്പിറവി ദിനത്തിൽ തന്നെ ആയതിൽ സന്തോഷമുണ്ട്. കേരളത്തിന് എന്നേക്കാൾ നാലഞ്ചു വയസ്സു കുറവാണെന്നും കേരളം തന്നെക്കാൾ ഇളയതും ചെറുപ്പവുമാണെന്നും" മമ്മൂട്ടി സംസാരം ആരംഭിക്കവെ പറഞ്ഞു.

എട്ട് മാസത്തോളമായി താൻ ഒരു പൊതുവേദിയിലോ നാട്ടിലോ ഇറങ്ങാതിരുന്നിട്ടും ഇപ്പോൾ എറണാകുളത്തുനിന്ന് യാത്ര ചെയ്ത് തിരുവനന്തപുരത്തേക്ക് വന്നപ്പോൾ കണ്ണഞ്ചിപ്പിക്കുന്ന വികസനങ്ങളാണ് കാണാനായത്. കേരളം പലകാര്യത്തിലും മാതൃകയാണെന്നും അദ്ദേഹം കൂട്ടിച്ചേർത്തു.

ദാരിദ്ര്യം ഇനിയും ബാക്കി

'അതിദാരിദ്ര്യം മാത്രമെ മുക്തമായിട്ടുള്ളു, ദാരിദ്ര്യം നമ്മുടെ മുന്നിലുണ്ട്' — എന്ന് മമ്മൂട്ടി ഓർമ്മിപ്പിച്ചു. അതിദാരിദ്ര്യ മുക്ത സംസ്ഥാനമായി കേരളത്തെ പ്രഖ്യാപിക്കുമ്പോൾ, അതിനേക്കാൾ വലിയ ഉത്തരവാദിത്വമാണ് മുഖ്യമന്ത്രി ഏറ്റെടുക്കുന്നത്. ഒരുപാട് പ്രതിസന്ധികളെ കേരളം അതിജീവിച്ചിട്ടുണ്ട്. അത്തരത്തിൽ ദാരിദ്ര്യത്തെ അതിജീവിക്കാനും നമുക്കാകും. കേരളത്തിൻ്റെ സാമൂഹിക സൂചികകൾ പലപ്പോഴും ലോകത്തെ അമ്പരിപ്പിച്ചിട്ടുണ്ട്. ലോകത്തിലെ അതിസമ്പന്ന രാജ്യങ്ങളുടെ ഇരുപതിലൊരു ഭാഗം പോലുമില്ലാത്ത കേരളമാണ് ഇത്രയും വലിയ നേട്ടങ്ങൾ കൊയ്യുന്നത്.

സാമൂഹിക ജീവിതമാണ് വികസിക്കേണ്ടത്

രാജപാതകളും വലിയ കെട്ടിടങ്ങളും നിർമിക്കുന്നതുകൊണ്ട് മാത്രം നമ്മൾ വികസിക്കുന്നില്ലെന്ന് മമ്മൂട്ടി വ്യക്തമാക്കി. വികസിക്കേണ്ടത് സാമൂഹിക ജീവിതമാണ്. സാമൂഹിക ജീവിതം വികസിക്കണമെങ്കിൽ ദാരിദ്ര്യം പരിപൂർണമായി തുടച്ചുമാറ്റപ്പെടണം. ഏത് കണ്ണഞ്ചിപ്പിക്കുന്ന വികസനമുണ്ടെങ്കിലും വിശക്കുന്ന വയറിന് മുന്നിൽ ഒരു വികസനത്തിനും വിലയില്ല. വിശക്കുന്ന വയറുകൾ കണ്ടുതന്നെയാണ് വികസനം യാഥാർഥ്യമാക്കേണ്ടത്. ഇന്നത്തെ ഈ പ്രഖ്യാപനം അതിനുള്ള മാതൃകയാകട്ടെയെന്ന് ആഗ്രഹിക്കുകയാണെന്നും അദ്ദേഹം പറഞ്ഞു.

പരസ്പര സ്നേഹവും പരസ്പര വിശ്വാസവും അതിർവരമ്പില്ലാത്ത സാഹോദര്യവുമാണ് നമ്മളെ ഇവിടെവരെ എത്തിച്ചത്. ജനങ്ങൾ ഏൽപ്പിച്ച ഉത്തരവാദിത്തം വിശ്വാസപൂർവം സർക്കാർ നിർവഹിക്കുമെന്ന് തന്നെയാണ് വിശ്വസിക്കുന്നത്. അതിന് ജനങ്ങളുടെ സമർപ്പണവും ഉണ്ടാകണം. ചടങ്ങിൽവെച്ച് അതിദാരിദ്ര്യ നിർമാർജനപദ്ധതിയുടെ റിപ്പോർട്ട് മുഖ്യമന്ത്രി പിണറായി വിജയനിൽനിന്ന് മമ്മൂട്ടി ഏറ്റുവാങ്ങി. കേരളപ്പിറവി ദിനാശംസകൾ നേർന്നുകൊണ്ടാണ് അദ്ദേഹം പ്രസംഗം അവസാനിപ്പിച്ചത്.

കേരളം കൈവരിച്ച ഈ നേട്ടങ്ങളെക്കുറിച്ചുള്ള മമ്മൂട്ടിയുടെ കാഴ്ചപ്പാടിനെക്കുറിച്ച് നിങ്ങളുടെ അഭിപ്രായം അറിയിക്കുക.

Article Summary: Mammootty praises CM Pinarayi Vijayan's commitment to eradicate poverty; highlights development.

#Mammootty #KeralaDevelopment #PinarayiVijayan #PovertyEradication #KeralaPiravi #SocialJustice